སེམས་ཀྱི་གདུང་བ་དང་ས་མཐའི་སྨིག་རྒྱུ། (མཁས་པའི་དབང་པོ་༧རྗེ་བཙུན་ནམ་མཁའ་ཚུལ་ཁྲིམས་དཔལ་བཟང་པོ་མཆོག་ལ་རྗེས་དྲན་དུ།) / རང་བྱུང་མཛེས་སྡུག་འོད་ཀྱིས་འབར་བ་ས་འཛིན་སྒེག་མོའི་ཡང་རྩེ་ནས།། གནས་ལྔའི་བང་མཛོད་གཏེར་དུ་སྦྲུམ་པ་མུ་ཏིག་ཤེལ་དཀར་བུམ་པ་ཞིག།། གློ་བུར་མུན་པའི་བྲག་ལ་བརྡབས་པ་མི་རྟག་སྒྱུ་མའི་རང་གཟུགས་དེས།། རྟག་འཛིན་གདོན་གྱི་ཚང་དུ་ཡུར་བའི་བྱིས་པའི་ཁྱུ་ཚོགས་སྡུག་ཏུ་བཙུད།། / སྐྱེ་དང་འཇིག་པའི་ཕྲ་རག་ཡོད་ཚད་མིག་གི་དབང་པོས་མཐོང་བ་དང་།། སྐྱོ་དང་གདུང་བའི་སྒྲ་ཡི་རླབས་ཕྲེང་རྣ་བའི་གླེགས་བུར་འཛུལ་ན་ཡང་།། གནས་ལྔ་རིག་པའི་བང་མཛོད་རེ་རེ་གློ་བུར་མཇལ་བར་བསྐལ་བ་འདི།། བདག་ཅག་ས་མཐའི་འགྲུལ་བཞུད་པ་ལ་ཕྲག་ཏུ་ལྕི་བའི་གདུང་བ་ཞིག། ། / མཐའ་མེད་རི་ལུང་བྱེ་བའི་ཕྲེང་བ་ལྕགས་ཀྱིས་སྦྲེལ་བའི་མཚོ་མཐའ་ནས།། དྲན་པའི་གདུང་བ་མཆི་མའི་ཐིགས་པ་འགྲམ་པའི་ཚོས་ཀྱིས་སྐྱོར་བཞིན་དུ།། སྐྱེས་མཆོག་དམ་པའི་གཤེགས་ཤུལ་དེ་རུ་ཡི་གེའི་འཕྲེང་བ་སྤེལ་བ་འདི།། མགོན་པོ་གང་ལ་རྗེས་དྲན་མཚོན་པའི་དད་གདུང་མིག་ཆུའི་ཕྲེང་བ་ཡིན།། / མདོ་སྨད་ས་འཛིན་ཆོལ་ཁའི་རྟ་ཕོར་སྣང་སེམས་དབྱིངས་སུ་ཞིག་པའི་སྡེར།། རྒྱལ་བསྟན་རིན་ཆེན་ནོར་བུའི་ཕྲེང་བ་མཁའ་ལ་མཛེས་པའི་གོང་བུ་ཅན།། ལྷོ་གླིང་འཛིན་མའི་ཁྱོན་དུ་བརྗིད་ཅིང་ཁྱད་པར་འཆད་དང་རྩོད་པའི་སྡེ།། གངས་རི་དཀར་པོའི་ཀློང་ནས་མངོན་པ་དམ་པ་ཁྱེད་ཀྱི་བཀའ་དྲིན་ཡིན།། / བསླབ་པ་རིན་ཆེན་ཆུ་འཛིན་དཀར་པོ་མཁའ་ལ་དལ་གྱིས་འཕྱུར་བ་ལས།། ཟབ་ལམ་གདམས་ངག་འཆ༵ད་པའི་གྲུ་ཆར་སྐལ་ལྡན་ཞིང་དུ་བསིལ་བ་དང་།། ས་ཕྱོགས་ཀུན་ནས་སློབ་བུའི་ཁྱུ་ཚོགས་མ་བོས་ངང་གིས་འདུས་པར་གྱུར།། བསྟན་དང་འགྲོ་བའི་མཆོད་སྡོང་གང་གི་བཀའ་དྲིན་རྒྱ་མཚོ་སུ་ཡིས་གཞལ།། / ལི་ཁྲིའི་གོས་ཀྱིས་མཛེས་པར་བཀླུབས་པ་ཤེས་རབ་ལྷ་ཡི་གདེངས་ཀ་ནས།། ལུང་རིག་མགྲིན་པའི་སྒྲ་བརྒྱ་ལྡིར་ཞིང་རྩོ༵ད་པའི་གར་སྟབས་སྒྱུར་བའི་ཚེ།། ཕྱོགས་འཛིན་ལོག་རྟོག་བྲག་རིའི་ཕྲེང་བ་བྱེ་མའི་ཀླུང་དུ་ཐལ་བར་བརྫིས།། དམ་པ་གང་གི་མཚན་སྙན་ཐོས་ཙམ་རྒོལ་བའི་ཚོགས་རྣམས་རྒྱང་དུ་བཟུར།། / འཇམ་མཉེན་ཕྱག་གི་རོལ་མོའི་སྒྱུ་རྩལ་དྲུག་འགྱུར་དབྱངས་སུ་རྩེན་པ་ལས།། ལེགས་བཤད་རྩོ༵མ་གྱི་རྒྱ་མཚོའི་ཕྲེང་བ་ལུང་དང་རིགས་པའི་རྒྱན་གྱིས་སྤུད།། ཕྱི་རབས་བློ་གྲོས་རྟེན་དུ་བཞེངས་པ་གསུང་རབ་བམ་པོ་བྲག་ལྟར་བརྩིགས།། བདག་ཅག་སྐལ་ལྡན་ཞིང་འདིར་མཛེས་སོ་དམ་པ་གང་ལ་བཀའ་དྲིན་ཆེ།། / སྐྱེ་དང་འཇིག་པའི་འཁོར་ལོའི་ཕྲེང་བར་ཟུག་རྔུའི་སྡུག་བསྔལ་མྱོང་ངེས་ཀྱི།། འཁོར་བའི་རང་བཞིན་ཀུན་ཏུ་གྲུབ་པ་མིག་གིས་མཐོང་བ་ཉིད་ལགས་ཀྱང་།། མགོན་པོ་གང་གིས་མཉམ་མེད་བླ་མ་ཞིང་དུ་གཤེགས་པའི་ཚུལ་བཟུང་སྟེ།། བོན་འཆད་ངང་ནས་ཞི་བར་གཤེགས་སོ་རྒྱལ་བའི་སྲས་པོ་ཁྱེད་ལ་འདུད།། / རྟག་འཛིན་གདུལ་བྱའི་སྣང་ངོར་སྟོན་པ་དུས་ཀྱི་མཐའ་མའི་སྐབས་སུའང་།། “ང་བཞིན་བྱས་ན་ང་བཞིན་འོང་བའི་”ཐུགས་ཀྱི་དམ་ཚིག་གནད་དུ་ཚུགས།། བླ་ཆེན་དྲན་པའི་གསེར་གྱི་གདམས་ངག་ཉམས་དང་རྟོགས་པའི་རྒྱན་དུ་སྤྲོས།། བླ་མེད་ཐེག་པའི་ཁྲི་ལ་བཞེངས་པའི་གྲུབ་པའི་ཡང་རྩེར་ཁྱེད་ཉིད་འཕགས།། / མདོར་ན་འདིར་སྣང་སྒྱུ་མའི་འཁོར་ལོར་ཉིན་མཚན་ཡུག་གིས་འཁོར་བའི་བུ།། …

། རྣམ་དཔྱོད་ཤེས་རབ་ལྷ་ལམ་ཡངས་པའི་ངོར།། ལེགས་བཤད་ལུང་རིག་རྒྱས་པའི་ཚ་ཟེར་ཅན།། སྨྲ་དབང་རྗེ་བཙུན་དམ་པའི་ཞབས་སེན་རྡུལ།། སྤྱི་བོའི་གཙུག་ཏུ་མཆོད་དོ་དགེ་ལེགས་བསྩོལ།།

གཡུང་དྲུང་བོན་གྱི་འདུས་སྡེ་ཆེན་པོ་མདོ་སྨད་སྣང་ཞིག་དགོན་ཆེན་དུ་མཚན་ཉིད་འཆད་ཉན་གྱི་སྡེ་ དབུ་བརྙེས་ནས་མི་ལོ་ ༡༠༠ འཁོར་བའི་དུས་སྟོན་དུ་ཕུལ་བའི་སྙན་ཚིག་ མ་བཅོས་སེམས་ཀྱི་རོལ་དབྱངས། ། མཁའ་འགྱིང་གཉན་གྱི་ཅང་ཤེས་རྟ་ཕོས་གནམ་གྱི་བང་རིམ་བརྒལ་བའི་མཐར།། འོད་ཀྱི་དམུ་ཐག་གདན་དུ་དྲངས་ཤིང་མགྱོགས་འགྲོས་རླུང་རྩལ་ས་ལ་བཀྲམས།། རིགས་རུས་མེ་ཏོག་འབུམ་གྱིས་བཞད་པའི་སྟོང་གསུམ་ཁ་ལོས་བསྒྱུར་བའི་རྗེས།། སྣང་གསལ་འོད་ཀྱི་གཞལ་ཡས་ཆེན་པོར་འཁྲུལ་སྣང་ཞིག་པའི་གདན་ཞིག་རྙེད།། །

། གཡུང་དྲུང་བོན་གྱི་གདན་ས་ཆེན་པོ་༧དཔལ་གཤེན་བསྟན་སྨན་རིའི་གླིང་ཞེས་ཆེ་དགུའི་གཙུག་ཏོར་དུ་འགྱིང་བ་འདིའི་སྣོད་བཅུད་ཀྱི་བཀོད་པ་ཚིགས་སུ་བཅད་པའི་གཏམ།། ། རྒྱལ་ཀུན་མཁྱེན་རབ་གཅིག་ཏུ་དྲིལ་བ་ལི་ཁྲིའི་མདངས་སུ་ཉེར་འཕོས་ཤིང་།། ཕྱག་གཡས་ཤེས་རབ་རལ་གྲི་རྣོན་པོ་འཁྲུལ་རྟོག་གཅོད་པའི་མཚོན་དུ་རྩེན།། ཕྱག་གཡོན་གླེགས་བམ་རིན་ཆེན་མཁའ་ལ་སྣང་གསལ་འོད་ཀྱི་སྒྲོན་མེ་འབར།། རིག་པའི་ལྷ་མཆོག་སྨྲ་བའི་སེང་ཆེན་སྤྱི་གཙུག་པད་མའི་དབྱིངས་སུ་འཛུམ།།

སྨུག་སྤྲིན་ལང་ལོང་གི་ཁྲོད་ན།། ཅི་ཞིག་བོར་བ་དང་འདྲ་ཞིང་།། གང་ཞིག་དོར་བ་ཡི་ཉམས་ཀྱི།། ཐོབ་རྒྱལ་ལ་འགོ་རུ་སླེབ་སོང་།། /