འཛམ་གླིང་ཟླུམ་པོའི་ཏོག་ཏུ་བརྗིད་པ་ལྷུན་པོ་གངས་དཀར་ཏི་སེ་དང་།། རིན་ཆེན་གཡུ་ཡི་མེ་ལོང་རྗེས་འགྲོ་ཡན་ལག་བརྒྱད་ལྡན་མ་པང་མཚོ།། བགྲང་ཡས་སྨན་ཏོག་དྲི་བཟང་དཔག་ཚད་ཁྱབ་པའི་སྤོས་རི་ངད་ལྡན་སོགས།། བྱིན་ལྡན་གནས་རི་འགངས་ཆེན་མང་བའི་ཡུལ་ལྗོངས་མངའ་རིས་སྐོར་གསུམ་དྲན།།
བྱེ་མའི་རྡུལ་གྱིས་ཞིང་ཁར་རི་མོ་བྲིས།། མི་དག་རྔུལ་ཆུ་ཤམ་ཤམ་ཟམ་འོག་ཉལ།། སྟོན་ཀ་ལེན་པའི་ལག་པ་མང་བོ་ཡིས།། དགུན་གྱི་འཚོ་ཚིས་ལྡང་བའི་སྣོད་ཀ་འཚེམ།། གཞོན་ནུའི་མིག་འོད་ཕན་ཚུན་ལྟེང་ཀ་རྩོད།། མཚན་མོའི་རུམ་དུ་སྐར་ཕྲན་མང་བོ་བཀྱེ།། མི་དག་སླར་ཡང་ལག་པར་ཐེམ་ཚོད་ཀྱིས།། སྡེ་གྲོང་སྐྱ་བོ་བལ་དཀར་བཞིན་དུ་བསེད།། ༢༠༡༥།༡༡།༢ཉིན།
དགུན་རླུང་ཤ་རུས་ལ་ཟུག་པའི་གྲང་སྣང་དེ་འདྲ། མི་ལོ་མང་པོར་མྱང་མ་མྱོང་ཞེས་བཤད་ཆོག ལོ་འདིའི་དགུན་རླུང་གིས་སྒུལ་བ་བསམ་ན། སེམས་པ་ཆུ་འཁྱགས་ལ་གྱུར་བའི་གོ་རིམ་ཞིག་ཀྱང་དྲན་བྱུང་།
རྡུལ་གྱིས་གྲུབ་པའི་འཇིགས་རྟེན་ཆུང་ཆུང་ཞེས།། བདེན་པར་གྲུབ་པའི་སྣང་བ་ཨ་ཁ་མ།། དབྱིངས་ཀྱི་ཉི་མ་ཟླ་བ་ཅི་བཞིན་དུ།། བཙལ་ནས་སོང་ན་གང་ཡང་མི་རྙེད་ལ།།
སྲིད་པའི་སྦག་རྫབ་ཀྱི་དོ་ར།། ཚེར་མའི་ཐང་ཆེན་དང་འདྲ་བར།། མི་ཡི་ལུས་རྟེན་ཞིག་བླངས་ཏེ།། ཚེ་ཚད་ཕྱེད་ཀ་རུ་ཟིན་ཡང་།། སྐྱིད་པའི་ཉི་མ་ཞིག་མ་མཐོང་།།