གཡས་བོན་ཞེས་གསང་མཚན་ཞིག་ལ།། ལེགས་པོ་ཞེས་གདགས་སུ་གསོལ་བའི།། སྒོམ་ཆེན་ཞེས་སྙན་དུ་འབར་བའི།། ཞུ་ཚང་གི་དབུ་བླར་བྱོན་ཡོད།།

        སེམས་སུ་འཁོར་བ། ཉི་མའི་བྲང་ཁོག་ནས་འབུར་བའི་དྲོད་ཀྱི་མྱོས་བུམ། ཆར་བའི་སྙིང་ག་ནས་འཐོར་བའི་ཚེ་ཡི་བརླན་བག རྡོ་བའི་རྒས་གཉེར་ལས་འགྲིལ་བའི་དུས་ཀྱི་རུས་པ།

ང་ཡི་ཕུགས་འདུན་གསོན་པོ་གཙང་བོའི་ངོས་སུ་ཡིབ་པ།། སྨུག་རྒྱུ་མཁའ་རུ་ཟུག་ན་འོད་ཀྱི་མེ་ཏོག་གད་དམ།། གཏམ་རྒྱུད་གང་ཡང་བྱུང་སྲིད་རྨི་ལམ་གློ་ཁ་ཨེ་རེད།། གདངས་ལ་ཉམས་ཤིག་མེད་ན་སྙིང་ལ་ཁ་ཚས་གདུང་བ།།

སེམས་ཚོར་ངར་མ་མེ་ལྕེ་བཞིན་དུ་མཆེད།། མཚན་ལྗོངས་ཟླ་འོད་རི་བོའི་ཕག་ཏུ་ཡིབས།། དྲན་པའི་ན་ཟུག་ཁབ་རྩེ་རྣོན་པོ་ལྟར།། གས་ཆག་ཤོར་བའི་སྙིང་ཆུང་ཁ་རུ་གཙེ།།

རྨི་ལམ་དཀར་པོའི་འཇིག་རྟེན་མལ་དུ་བཞག། རི་ཆུའི་འཕྲང་རིང་སེམས་ཀྱིས་ཉུག་པའི་རྗེས།། དྲན་པའི་མཚོ་མོ་སྐྱོམས་པའི་རླབས་རིས་ལས།། ཟེགས་མ་ཆུང་ཆུང་ཞིག་གི་འཛུམ་མདངས་གད།།