ང་ཡི་གངས་རི་མིག་ཆུའི་ཀློང་དུ་ལྷུང་།། ལོ་ཟླ་འདི་ལ་ཡང་ཡང་འདར་གྱིན་ཡོད།། ཆུ་མོ་གྱེན་བཞུར་ཞིག་གིས་བརླན་ཙམ་བྱེད།། སེམས་ཀྱི་བླ་རི་དེ་ཡང་འབོར་ལ་ཉེ།།

ནུབ་ཀྱི་ཞ་བོའི་རི་ཚོགས་འཐེང་ཞིང་གྱོལ་ཡང་།། སུག་རྗེས་ཚོན་མདངས་འདི་ཚོས་ལ་མོ་ཉག་ན།། འདབ་ལོ་ལྗང་ཁུ་ཡིན་པའི་ལྗོན་པ་ང་ཚོ།། འགྱེལ་བའི་ཁེ་ཚེ་སྒུག་ཅིང་སྡོད་ནས་ཅི་ཡིན།། (༡)

སེམས་ན་གངས་ཀྱི་རྔམ་ཁ་མཐུག་ཅིང་།། ཡིད་ལ་འབྲོང་གི་དགའ་སྐྱོ་འཁོར་བའི།། སྙན་ངག་པ་དེ་ཉིན་དཀར་ཞིག་གི།། ཞོགས་ཀ་དེ་ཡིན་མཚམས་སྤྲིན་དེ་ཡིན།།

ལོ་དང་ཟླ་བའི་བཞུར་རྒྱུན་རིང་མོ་ཇི་ལྟ་ཇི་ལྟར་འདས་ན་ཡང་།། མེས་པོ་དམ་པའི་ལོ་རྒྱུས་གླེགས་བམ་ང་ཡི་རྣམ་ཤེས་ཕྲ་མོས་གྲུབ།། རིགས་དང་རུས་ཀྱི་ཁྱད་པར་འབྱེད་པའི་ཕྱོགས་ཞེན་ལྟ་བ་མཐོ་ན་ཡང་།། ང་ནི་མཐོ་དམན་ཀུན་ལ་མཐུན་པའི་ངོ་གཉིས་མིན་པའི་གྲོགས་མཆོག་ཡིན།།

རིང་ནས་མཛའ་བ་མ་བཏང་བར།། སེམས་ཀྱི་ཐིག་ལེར་འཁྲུངས་པའི་མི།། ཆ་མེད་འཇིག་རྟེན་གང་ཞིག་ནས།། ཡུལ་གྱར་འཚོ་བའི་ལྡེབས་རིས་སུ།།