སྙན་ངག་པ་དེ།
རྩོམ་ཡིག་འདི་ཐེངས། 915 བཀླགས་འདུག
སེམས་ན་གངས་ཀྱི་རྔམ་ཁ་མཐུག་ཅིང་
ཡིད་ལ་འབྲོང་གི་དགའ་སྐྱོ་འཁོར་
སྙན་ངག་པ་དེ་ཉིན་དཀར་ཞིག་གི།།
ཞོགས་ཀ་དེ་ཡིན་མཚམས་སྤྲིན་དེ་ཡི
སྡུག་གི་འཁོར་བ་སྨྲེང་བས་གཙེས་
མནར་གཅོད་རི་མོའི་འབུར་ཆ་གཞོམ་
སྙན་ངག་པ་དེ་བདེན་དོན་ཞིག་གི།
གནད་འགག་རྩོད་པའི་སྨྲ་ལྕེ་དེ་ཡི
སྤོབས་པའི་མགོ་བོ་མར་ལ་ཤུད་ན།།
ལ་རྒྱའི་དཔུང་བ་ལྕགས་ཀྱིས་འདེ
སྙན་ངག་པ་དེ་དགུན་འཁྱག་ཅིག་གི།
ཉིན་ཁ་དེ་ཡིན་ཉིན་གུང་དེ་ཡིན།།
སྟོང་ཁམས་མེ་ལོང་གཡའ་དག་ཅིག་ལ།།
ཡིད་བརྙན་ཁྲི་འབུམ་ཆུ་ལྟར་ལྡུག་
སྙན་ངག་པ་དེ་མི་སེམས་ཤིག་ལ།།
བུ་རམ་བསྐུ་བའི་མགྲིན་པ་དེ་ཡིན།
ཡུལ་ནས་རྒྱང་ལ་འཁྱམ་པའི་བུ་དང་།
རྒྱང་ནས་ཡུལ་ལ་ཤིན་ཏུ་འཁྲེང་བའི
སྙན་ངག་པ་དེ་དུས་འགྱུར་ཞིག་གི།།
ངོ་བོ་དེ་ཡིན་རང་བཞིན་དེ་ཡིན།།
མིག་གིས་རང་གི་རྐང་སྣེར་ལྟ་ཞོར།
ཚོར་བས་རྒྱང་གི་རྒྱང་དག་ཟིན་པའི
སྙན་ངག་པ་དེ་ཉེན་ཁ་ཞིག་གི།
ཕྱོགས་སོ་སྟོན་པའི་བརྡ་རྟགས་དེ་
རྨོངས་པར་གྱུར་བའི་རྣམ་ཤེས་ཚོ
བར་དོའི་སྐད་ཀྱིས་བླ་འབོད་བྱེད་
སྙན་ངག་པ་དེ་སྨག་ནག་ཅིག་གི།།
དཀར་མེ་དེ་ཡིན་སྐར་ཆེན་དེ་ཡིན།།
ས་རྡོ་ཆུ་བྲག་མདུན་དུ་སྤུངས་ནས།
ཁ་ཆར་བུ་ཡུག་དབྱངས་སུ་བྱ་བའི།།
སྙན་ངག་པ་དེ་ཤེས་རབ་ཅིག་གི།
ཡང་རྩེར་སོན་པའི་གྲུབ་ཐོབ་དེ་ཡི
འཆར་ཡན་མོག་པོའི་ཡོལ་བའི་ཕག་ན།།
དངོས་ཡོད་བུ་མོ་གཅེར་བུར་གནོན་
སྙན་ངག་པ་དེ་སྐད་ཡིག་ཅིག་གི།
ལང་ཚོ་དེ་ཡིན་འགུག་ཤུགས་དེ་ཡིན།
རང་ཉིད་ཆང་ལ་སྦངས་ཏེ་ངུ་ཞིང་།།
ཆང་གིས་རང་ཉིད་བཀྲུས་ཏེ་དགོད་
སྙན་ངག་པ་དེ་མི་རིགས་ཤིག་གི།
འཆལ་བོ་དེ་ཡིན་དམ་པ་དེ་ཡིན།།
འཁྱོག་བརྗོད་ཚིག་གི་གཞུ་མོའི་
དྲང་དོན་བསམ་བློའི་མདའ་མོ་རྣོ་
སྙན་ངག་པ་དེ་རྣམ་བཞག་ཅིག་གི།།
ངེས་དོན་སྟོན་པའི་གཏན་ཚུགས་དེ་
བློ་གྲོས་ཟབ་རྣམས་ཁྲིད་ཀྱིན་ཁྲི
ཆོས་དག་བདེ་སྟོང་རོ་རུ་བཞུ་བའི།
སྙན་ངག་པ་དེ་རང་བྱུང་ལྷ་ཡི།།
སྤྲུལ་བ་དེ་ཡིན་བྱིན་རླབས་དེ་ཡི
གཅིག་པུའི་སྣང་བ་དུ་མར་གྲོལ་ཡང་
དུ་མའི་དབུས་ན་གཅིག་པུར་ལུས་པའི
སྙན་ངག་པ་དེ་དུས་རབས་ཤིག་གི།།
ཁེར་རྐྱང་མིན་པའི་ཁེར་རྐྱང་དེ་
བསམ་ཚུལ་ཕྲིས།