གྲོགས་དྲན་པའི་ལེའུ།
རྩོམ་ཡིག་འདི་ཐེངས། 407 བཀླགས་འདུག
རིང་ནས་མཛའ་བ་མ་བཏང་བར།།
སེམས་ཀྱི་ཐིག་ལེར་འཁྲུངས་པའི་མི
ཆ་མེད་འཇིག་རྟེན་གང་ཞིག་ནས།།
ཡུལ་གྱར་འཚོ་བའི་ལྡེབས་རིས་སུ།།
ཐོག་མའི་དབུ་ཁྱུད་འབྲི་བ་ལ།།
ངལ་བའི་ཁུར་བོ་ག་ཙམ་གདའ།།
ཉེ་དང་རིང་བའི་གནས་གང་ཏུ།།
མིག་གི་ལམ་དུ་རབ་འདྲིས་པའི།།
སྐུ་ལ་ཉེ་ཞོ་མི་མངའ་བར།།
བདེ་དགའ་ལོངས་སུ་སྤྱོད་དམ་ཅི།།
ཕ་ཡུལ་མིག་གིས་མ་མཐོང་དུས།།
ཕ་མ་ཞེ་ནས་ཨེ་དྲན་ཐལ།།
གྲོགས་ཀྱི་འདང་བརྩེ་དྲན་དུས་སུ།
གྲོགས་པོ་སྙིང་ནས་དྲན་བྱུང་ངམ།།
ཁྱོད་ཉིད་རྒྱང་དུ་བྱེར་བ་ལ།།
གྱེས་ཁའི་སྐྱེལ་མ་མ་མཆིས་ཏེ།།
སྤྲིན་ནག་གཡོ་བའི་འདུ་འགོད་ལ།།
མི་བཟོད་གཡོལ་བའི་བྲེལ་སྟབས་ཀྱི
གསང་བའི་གཏམ་རྒྱུད་འབའ་ཞིག་སྟེ།
སྐད་ཅིག་ཙམ་གྱི་འཇའ་རིས་བཞིན།།
འཚུབ་མ་དྲག་པོའི་དཔུང་འཇུག་གིས།
ཐག་རིང་བས་མཐའི་གནས་སུ་བདས།།
ངོས་ཀྱིས་ཁྱོད་ཉིད་དྲན་པ་ནི།།
མཛུབ་རྩེར་བགྲང་བས་མི་རྫོགས་ཤི
ཕལ་གྱི་སྐད་ཆས་མི་ཤོད་པའི།།
མི་ལོ་དྲུག་གི་གཏམ་རྒྱུད་ཡིན།།
ཁྱོད་ཉིད་གང་དུ་ཡོད་དམ་ཞེས།།
འདྲི་ཚིག་རང་ལ་དྲིས་པ་ཡང་།།
གྲངས་ཀྱིས་ཟིན་པ་མི་ནུས་སོ།།
རྨི་ལམ་ལྟ་བུའི་འགྲུལ་བཞུད་འདི།
གློག་འགྱུ་ལྟ་བུའི་གྱེས་བྲལ་འདི
ཇི་ལྟར་གླེང་ཡང་མི་རྫོགས་པས།།
མིག་ཆུས་བྲིས་པའི་སྙན་ངག་སྟེ།།
གྲོགས་པོ་དྲན་པའི་ལེའུ་ཞིག།
ནང་ཚོར་རྗེན་པས་ཕྱི་རུ་བཏོན།།
བསམ་ཚུལ་ཕྲིས།