༈སྨྲ་ལྕེ། ཁྱོད་གྲུབ་རྗེས མེ་ལོང་དུ་འཇའ་དང་འོད་ཟེར་འཕྲོས་ཆོག ལྷན་འཛོམས་ཤིག་མཇུག་བསྒྲིལ་བ་ན ཕན་ཚུན་གྱི་ངོ་གདོང་དང་སྨྲ་བའང་འགག་འགྲོ རི་མོ་རེའི་གཟེབ་ངོས་ནས་ཀྱང་དུས་གཏན་ཏུ་འཇག་འགྲོ

མི་ཡུལ་གྱི་ཡུལ་ལྗོངས་བཀོད་པ།། མཛེས་པ་ལ་ཚོད་ཅིག་མེད་ཀྱང་།། རང་ཡུལ་གྱི་རང་བྱུང་ཁོར་ཡུག། གངས་ལྗོངས་དེ་ནམ་ཡང་མ་བརྗེད།།

སེམས་ཀྱི་རང་བཞིན་དྲི་མས་མ་བསླད་པ།། སྤྲིན་མེད་གཡའ་དག་སྟོན་ཟླའི་ནམ་མཁའ་བཞིན།། དུག་གསུམ་ཉོན་མོངས་སྨྱོ་བའི་གླང་ཆེན་ངར།། རང་སེམས་འདུལ་བའི་ལྕགས་ཀྱུ་ད་སྩོལ་ཅིག།    

རང་བློ་རྨོངས་པའི་ནད་ཀྱིས་བཟུང་ན་ཡང་།། ལེགས་བཤད་སྨན་གྱི་རོ་ལ་མི་བསྟེན་པར།། གཞན་སྐྱོན་ཁབ་རྩེ་འཚོལ་ལ་རབ་བྱང་བའི།། བླུན་པོའི་རྒྱལ་བོ་དེ་ལ་འདི་སྐད་སྨྲ།།