བོད་སྲོལ་དེ་ནམ་ཡང་མ་བརྗེད།
རྩོམ་ཡིག་འདི་ཐེངས། 258 བཀླགས་འདུག
མི་ཡུལ་གྱི་ཡུལ་ལྗོངས་བཀོད་པ།།
མཛེས་པ་ལ་ཚོད་ཅིག་མེད་ཀྱང་།
རང་ཡུལ་གྱི་རང་བྱུང་ཁོར་ཡུག།
གངས་ལྗོངས་དེ་ནམ་ཡང་མ་བརྗེད།།
མི་ཡུལ་གྱི་ཁང་རྩེག་ནང་ལ།།
སྡོད་པའི་ཚེ་སྤྲོ་སྣང་ཆེ་ཡང།།
རང་ཡུལ་གྱི་ཕ་ཁྱིམ་སྨུག་པོ།།
སྦྲ་ནག་དེ་ནམ་ཡང་མ་བརྗེད།།
མི་ཡུལ་ནས་རོགས་རམ་བྱེད་མཁན།།
གཏོང་ཕོད་ཅན་སྦྱིན་བདག་བཟང་ཡང་།
རང་ཡུལ་ལ་ཡོད་པའི་དྲིན་ཆེན།།
ཕ་མ་དེ་ནམ་ཡང་མ་བརྗེད།།
མི་ཡུལ་གྱི་གྲོགས་དང་འདྲིས་དུས།
ཕན་ཚུན་ལ་མཛའ་བརྩེ་ཟབ་ཀྱང་།།
རང་ཡུལ་གྱི་སྐྱིད་སྡུག་གཅིག་པའི
སྤུན་ཟླ་དེ་ནམ་ཡང་མ་བརྗེད།།
མི་ཡུལ་གྱི་ཟས་རིིགས་འདྲ་མིན།།
རོ་བཅུད་དེ་ཧ་ཅང་བཟང་ཡང་།།
རང་ཡུལ་གྱི་ལྷད་མེད་ཕ་ཟས།།
རྩམ་པ་དེ་ནམ་ཡང་མ་བརྗེད།།
མི་ཡུལ་ལ་ཡོད་པའི་འཐུང་ཆ།།
ཤིང་འབྲས་ཀྱིས་བཟོས་པ་ཞིམ་ཡང་།།
རང་ཡུལ་གྱི་ཕྱུགས་ལས་བྱུང་བའི།།
ཞོ་འོ་གཉིས་ནམ་ཡང་མ་བརྗེད།།
མི་ཡུལ་ལ་འཚོ་བ་རོལ་སྐབས།།
གཞན་སྐད་དེ་སྤྱོད་དགོས་ཐུག་ཀྱང་
རང་ཡུལ་གྱི་སྲོག་རྩར་གྱུར་བ།།
བོད་སྐད་དེ་ནམ་ཡང་མ་བརྗེད།།
མི་ཡུལ་ནས་ཡིག་རིགས་སྣ་ཚོགས།།
སྦྱོང་རྒྱུ་ཡི་གོ་སྐབས་འབེལ་ཡང་
རང་ཡུལ་གྱི་ཐུན་མིན་ངོ་བོ།།
དབྱངས་གསལ་དེ་ནམ་ཡང་མ་བརྗེད།།
མི་ཡུལ་གྱི་གོན་པ་དེ་དག།
བཟོ་དབྱིབས་དང་གྱོན་སྟབས་བདེ་
རང་ཡུལ་གྱི་ཐུན་མིན་ཁྱད་ཆོས།།
བོད་ལྭ་དེ་ནམ་ཡང་མ་བརྗེད།།
མི་ཡུལ་ནས་རིགས་གཞན་ཕོ་མོའི།
མཛའ་བརྩེ་དེ་ལྷད་མེད་ཡིན་རུང་།།
རང་ཡུལ་གྱི་མི་རིགས་གཙང་ཕྱིར།།
རིགས་མཐུན་ལ་གཉེན་སྒྲིག་མ་བརྗེ
མི་ཡུལ་ལ་སྡོད་པའི་ཚེ་ལ།།
གཞན་སྲོལ་དེ་དང་ལེན་དགོས་ཀྱང་།།
རང་ཡུལ་ལ་ཡབ་མེས་ཤུལ་བཞག།
བོད་སྲོལ་དེ་ནམ་ཡང་མ་བརྗེད།།
བསམ་ཚུལ་ཕྲིས།