། འཇིག་རྟེན་གྲོག་མའི་ཚང་སྒོ་རུ།། ཁྲི་ལོ་བརྟན་པ་མེད་ན་ཡང་།། ཁྱེད་ཉིད་བཞུད་པ་སྔ་སོང་ཞེས།། སྐེ་ཤ་ཡང་ཡང་འཐེན་མཁན་མང་།།

།          གྲོང་གི་སྲང་ལམ་འགྲོགས་ན་དགའ་ཡང་སླ།          དྲག་ཆར་རླུང་གིས་སྦུད་དུས་ངུ་ཡང་སླ།།          རྫི་གླུ་སྙན་པོ་བྲག་གི་ཁོངས་སུ་འཁོར།།          བྱིས་དུས་སེམས་ནི་དབྱར་གྱི་འཇའ་ཚོན་འདྲ།།

། མཐོ་བ་གངས་རིའི་རྩེ་ནས་བྱ་བྱེའུ་དཀྲོགས། ། དམའ་བ་གཙང་ཆུའི་ནང་ནས་ཉ་མོ་བདས། ། ཡངས་པོ་སྤང་རིའི་ཁུག་ནས་ནོར་རྗེས་དེད། ། མ་ངེས་གནས་བརྒྱར་འགྲིམས་པའི་ཨ་སྐྱོ་བ། །

། གཅེས་པའི་ཚེ་སྲོག་ཁ་བའི་རི་ལ་མཐུད།། གོམ་པའི་ཁྲག་རྒྱུན་ཚ་བའི་ཀློང་དུ་སྐྱིལ།། རྒས་པའི་ཟུང་ཤུགས་ནུབ་ཀྱི་རི་ལ་རྩེན།། མི་ཚེའི་འགྲུལ་བཞུད་འདི་ཉིད་ཨ་ལ་ལ།།

། སྐྱེས་པའི་ལྟེ་ཁྲག་ས་ལ་འཕོས་པའི་སྐབས། ། ངོ་མཚར་མེ་ཏོག་སྤྲིན་གྱི་ཆར་བ་དང་། ། འཇའ་ཚོན་རི་མོ་གནམ་དུ་ཟུག་པ་སོགས། ། དགེ་ལེགས་མཚན་དཔེའི་སྣང་བརྙན་རྡུལ་ཙམ་བྲལ། ། །