ཡིག་འབྲུའི་སྐྱེལ་མ། —རྡུང་ལེན་པ་བདུད་བྷེ་མཆོག་ལ་སྐྱེལ་མའི་ཚབ་ཏུ།
རྩོམ་ཡིག་འདི་ཐེངས། 916 བཀླགས་འདུག
།
འཇིག་རྟེན་གྲོག་མའི་ཚང་སྒོ་རུ།།
ཁྲི་ལོ་བརྟན་པ་མེད་ན་ཡང་།།
ཁྱེད་ཉིད་བཞུད་པ་སྔ་སོང་ཞེས།།
སྐེ་ཤ་ཡང་ཡང་འཐེན་མཁན་མང་།།
།
དཔྱིད་དཔལ་ཚུར་ལ་སླེབས་པའི་དུས།།
ཁུ་བྱུག་ཕར་ལ་ཆས་པ་ཡིས།།
ནགས་གླིང་སྟོང་བར་ལུས་སོང་ཞེས།།
བྲང་ལ་ཁུ་ཚུར་གཞུ་མཁན་མང་།།
།
སྒྲ་སྙན་གཞུང་རྟ་མ་ཆག་ཀྱང་།།
ཁྱེད་སྐུ་རེ་ཞིག་རྫོགས་པ་ཡིས།།
གངས་ཀྱི་རོལ་དབྱངས་ཆད་སོང་ཞེས།།
བརླ་ལ་ཤ་གཅུ་རྒྱག་མཁན་མང་།།
འ
ཉིད་ཀྱིས་པཎ་ཆེན་དྲན་པ་བཞིན།།
བོད་ཡུལ་སྟོད་སྨད་བར་གསུམ་ན།།
རིགས་ཞེན་གད་རྒྱངས་འཐོར་སོང་ཞེས།།
བཞིན་རས་རླན་གྱིས་བཟུང་བ་མང་།།
།
ཚང་མས་མགྲིན་གཅིག་དབྱངས་གཅིག་གིས།།
བོད་ཡུལ་གླུ་བས་བཀང་ན་ཡང་།།
ཁུ་བྱུག་གཅིག་ལས་མེད་དོ་ཞེས།།
དབུགས་རིང་ཁོག་ནས་ཤོར་མཁན་མང་།།
།
དབྱངས་ཅན་ལྷ་མོའི་ཐུགས་ཁ་ཡི།།
བརྩེ་བ་ལྡན་པའི་གངས་ཕྲུག་གིས།།
ཕ་ལོ་གངས་དཀར་སྐྱུར་སོང་ཞེས།།
སྨྲེ་ངག་འུར་འུར་འབྱིན་མཁན་མང་།།
།
ཉིད་ཀྱི་རི་དྭགས་སྐྱོ་གླུ་ལས།།
ཡུ་མོས་ཤེའུ་བཞག་པ་བཞིན།།
ཉན་མཁན་ཁྲི་སྟོང་གཡུགས་སོང་ཞེས།།
མགོ་བོ་ལག་པས་སྐྱོར་མཁན་མང་།།
།
མཛའ་བརྩེ་མི་འདོར་སྲོག་གཏོང་བའི།།
འབུམ་ཚང་སྲས་མོའི་མིག་ཆུ་དག།
ཕྲེང་བར་རྒྱུན་མཁན་མེད་སོང་ཞེས།།
ངོ་མདོག་ཤོར་བའི་བུ་མོ་མང་།།
།
གསེར་མདོག་ཉི་མའི་འོད་ངོགས་ན།།
མི་དལ་ཕྲེང་བ་འདྲེན་བཞིན་དུ།།
གནའ་རྒྱའི་ཚེ་ལོར་དགའ་བ་ཡི།།
སེམས་རྩ་འཁྱག་པའི་ལོ་ལོན་མང་།།
།
རྨ་ཆུ་སྔོན་མོའི་འགྲམ་ངོགས་ན།།
ང་རང་བོད་ཀྱི་བུ་ཡིན་ཞེས།།
རང་ངོ་རང་གིས་ཟིན་མཁན་གྱི།།
དྲན་པ་ཤོར་བའི་བུ་ཕྲུག་མང་།།
།
བཀྲ་ཤིས་འཁྱིལ་བའི་སྐོར་ལམ་ནས།།
གང་ཉིད་དྲན་པའི་སྐྱོ་གདུང་གིས།།
རྒྱུན་པར་སྤྱོད་པའི་ཡིག་འབྲུ་འགའ།།
ཚེག་དང་ཤད་ཀྱིས་བཙེམས་དགོས་བྱུང་།།
།
བསམ་ཚུལ་ཕྲིས།