/ ༧དཔལ་ལྡན་དྲིན་ཆེན་༧རྩ་བའི་བླ་མའི་དགུང་ལོ་དགུ་བཅུར་ཕེབས་པའི་དུས་ཚིགས་འདི་ལ་སྒོ་གསུམ་གུས་པ་ཆེན་པོའི་སྒོ་ནས་ཕྱག་འཚལ་ཞིང་དྭངས་བས་སྐྱབས་སུ་མཆིའོ། ཁྱུང་ཡུལ་ནོར་འཛིན་དགའ་མའི་ཁྱོན་དུ་མཚན་དཔེའི་ཁོ་ལག་རབ་ཏུ་རྫོགས། ། ཁྱུང་ཕྲུག་ཚང་ལས་འཕུར་བ་བཞིན་དུ་གྲྭ་ས་གོང་འོག་བར་གསུམ་ཕེབས། ། ཁྱུང་ཆེན་ལྟ་བའི་དགོངས་རྒྱ་བཀྲོལ་ཏེ་འཛམ་གླིང་མཁས་དགུའི་གཙུག་ན་རྒྱལ། ། ཁྱུང་ཆེན་རྒོད་པོའི་གཤོག་ཟུང་འདི་ཡིས་མུ་མེད་མཐའ་འདས་མཁའ་རུ་བསྐྱོད། །
གཅིག་ཁྲི་ལོ་ཡི་ཕྲེང་བའི་ཡར་ཁུགས་ན།། འོད་ཟེར་དཀར་པོ་ཏི་སེའི་གཡས་སུ་ལྷུངས།། མ་པང་མཚོ་མོ་འཁྱིལ་བའི་འགྲམ་དུ་བབས།། ཁྲི་སྡེས་གཙུག་ཏུ་བཀུར་བའི་མི་དབང་གིས།། ཞབས་ཀྱི་སེན་མོ་སྤྱི་བོར་ཡང་ཡང་རེག།
༼༡༽ བྱ་རྒོད་དེ། འཕུར་སོང་། ཉི་མ་དེ། ནུབ་སོང། སྲིད་པའི་གངས་རིན་པོ་ཆེ།
བརྗོད་པ་རབ་དག་གསུང་གི་ང་རོས་དྲེགས་པ་ཟིལ་གནོན་རྨོངས་པ་བརྩད་གཅོད་འཁྲུལ་པ་ཀུན་བྲལ་ཐུགས་ཀྱི་བརྩེ་བས་བསྐལ་པ་ཀུན་ཏུ་འགྲོ་ལ་རྗེས་ཆགས།། ལེགས་པ་ཀུན་རྫོགས་མཚན་དཔེའི་འོད་ཀྱིས་ཡིད་ཅན་ཀུན་ཡིད་རབ་ཏུ་འགུག་མ་ཐོས་པ་ཙམ་གྱིས་འཇིགས་པ་བརྒྱད་པོ་སྨིག་རྒྱུའི་རི་མོའི་གོ་སར་འཆིང་མ།།
། སྐད་ཀྱི་གཏིང་ནས་ང་རོའི་གདངས་ཤིག་འཐེན།། སེམས་ཀྱི་གསང་ནས་དད་པའི་མེ་ཞིག་འབར།། མཆུ་ཡི་འདབ་མས་འཕྲུལ་གྱི་བརྡ་ཆད་བསྡེབ།། ལྕེ་ཡི་མདུད་པས་ཐེག་ཆེན་བཀའ་གསུང་སྒྲོག། ། རྔ་ཆེན་སྐད་ཀྱིས་སྟོང་གསུམ་གཏི་མུག་དཀྲོག། གཤང་དང་རོལ་མོས་འཇིན་རྟེན་དགོད་སྒྲ་སྦྱིན།། དུང་དཀར་སྒྲ་ཡིས་ངན་འགྲོའི་སྐྱོ་གདུང་སེལ།། ཏམ་བུ་ར་ཡིས་འགྲོ་དྲུག་བདེ་བར་བཀོད།། ། གྱེར་གྱི་གདངས་ལས་གནའ་བོའི་དབྱངས་ཤིག་མངོན།། བམ་པོའི་གསེང་ནས་ཆབ་དཀར་ཆབ་ནག་བརྡོལ།། ལེའུ་བར་ནས་སྒོ་བཞི་མཛོད་ལྔ་འཁྲུངས།། མཐིང་ཤོག་ཧྲག་ནས་ཚལ་དམར་སྤུངས་སོ་ལུད།། ། ཞྭ་དཀར་རྩེ་ནས་ཐུགས་རྗེའི་ལྕགས་ཀྱུ་གུག། གཡུང་དྲུང་རིས་ལས་སྲ་བརྟན་བཀའ་ཞིག་མངོན།། ཟན་གྱི་གཏོར་མས་འཚེ་མེད་ཐབས་ཤིག་བསྟན།། གཙང་མའི་མཆོད་ཆུས་ཉོན་མོངས་སྒྲིབ་པ་འཁྲུ།། ། ༢༠༡༥/༡༠/༢༣