ལས་ཀྱིས་མནར་བའི་གྲུ་ཟུར།
རྩོམ་ཡིག་འདི་ཐེངས། 776 བཀླགས་འདུག
སྟོན་གྱི་ལོ་མ་རླུང་གིས་ཁུར།།
རེ་བའི་འདུན་པ་གཙག་གིས་འཚེ།།
སྐྱོ་བས་གདུང་བའི་མཚན་མོ་དེར།།
ཨ་རག་ཁ་ན་ཁྱོད་ཞལ་མཛེས།།
བརྩེ་བའི་འོད་ཅིག་འཆར་རྒྱུ་དཀོ
དུང་བའི་སེམས་ཤིག་འཇགས་ཐབས་བྲལ།
བཅོས་མའི་འཚང་བའི་རྒྱ་གྲོང་དུ།།
ལྷག་མེད་མི་ཞིག་འཚོལ་བར་དཀའ།།
གཞན་ཕན་བོར་བའི་འཇིག་རྟེན་ན།།
འདོད་པའི་ཆགས་སྡང་མེ་ལྟར་མཆེད།།
ཚོར་བའི་རྣམ་ཤེས་ཁབ་ལྟར་རྣོ།།
ཡིད་ཀྱི་བློ་གཏད་སུ་ལ་བྱེད།།
སྙིང་གི་དུང་ཞེན་མེ་ལྟར་ཚ།།
རྨ་མེད་ཟུག་གིས་སྙིང་ཁ་རྨས།།
ཞེ་འདང་བོར་བའི་གྲུ་ཁ་ནས།།
དགོད་པའི་འཛུམ་ཞིག་གང་ན་ཡོད།།
ཡུལ་གྱར་སེམས་པ་གདོན་གྱིས་བཟིས།
དུང་བའི་ཚིག་མདའ་མེ་ཡིས་བསྲེགས།
སྡུག་གིས་མནར་བའི་གྲུ་ཟུར་ནས།།
ཤུགས་རིང་བྲང་གཞུང་བརྡོལ་ཏེ་ཤོ
ཕྱི་ལོ་ ༢༠༡༥ ཟླ་ ༡༠ ཚེས་ ༢༢ ཉིན་ས་རཱ་མཐོ་སློབ་
བསམ་ཚུལ་ཕྲིས།