། དང་པོ།  ནང་མི་ལྷན་འཛོམས་ངང་སེམས་གཏམ་གླེང་བ་ནི་བདེ་སྐྱིད་ཡིན་པ་ཤེས་པར་གནང་།། གཉིས་པ།  ཟས་རིགས་འཕྲོ་བརླགས་མ་བཏང་བར་ངལ་རྩོལ་མི་མང་གི་བཀའ་དྲིན་ཡིད་ལ་དྲན་པར་གནང་།།

ལོ་ཟླ་གྲངས་མེད་འདས་ཟིན་པའི་རྫོགས་ལྡན་གྱི་དུས་ལ། སངས་རྒྱས་དང་བྱང་སེམས་གང་རུང་གི་ཐུགས་རྗེ་འོད་ཞགས་ཤིག འཛམ་གླིང་གི་ཡང་རྩེ་ནས་འགྲེངས་པའི་ཞིང་འདིར་འཕོས་དུས། རྣལ་འབྱོར་བ།   ཁྱེད་ཀྱི་སྐྱེ་རབས་ཀྱི་ཐོག་མ་དེ་ནས་བྱུང་ལ། འགྲོ་དོན་གྱི་དང་པོའང་དེ་ནས་ཚུགས། །། ཆགས་སྲེད་དང་ལོག་སྤྱོད་ཀྱིས་ཡོངས་སུ་ཁེངས་པའི་འཇིག་རྟེན་འདིར། ཁྱེད་ནི་གསར་འཁྲུངས་ཀྱི་པད་དཀར་བཞིན་ཡིད་དུ་འོང་ལ། ནག་ནོག་གི་དྲི་མ་བྲལ། ངས་ཁྱེད་ཀྱི་ཞི་དུལ་གྱི་སྤྱོད་ལམ་ཁོ་ན་ལས་ཀྱང༌། སྡོམ་ཁྲིམས་ཀྱི་མཛེས་སྡུག་དེ་མཐོང་ཐུབ། རྣལ་འབྱོར་བ། ཚུལ་ཁྲིམས་རྣམ་པར་དག་པའི་དོན་དམ་གྱི་ཚངས་སྤྱོད་པ། ། ཟང་ཟིང་གི་འཁོར་བའི་ཕུན་ཚོགས་ཀྱིས་ཡོད་ཚད་བསླུས་པའི་ཞིང་ཁམས་འདིར། ཁྱེད་ནི་གསེར་སྦྱངས་ཀྱི་ལྷུན་པོ་བཞིན་གཡོ་འགུལ་མེད་ལ། འདུ་འཛི་ཡི་བྱ་བྱེད་དབེན། ངས་ཁྱེད་ཀྱི་གོས་ཧྲུལ་གྱི་རལ་ཁུང་རྐྱང་བ་ལས་ཀྱང༌། ཆོག་ཤེས་ཀྱི་ཡོན་ཏན་དེ་མཐོང་ཐུབ། རྣལ་འབྱོར་བ། བསླུ་བྲིད་ཀྱི་རླུང་ཁ་ལས་ཐར་བའི་ངེས་དོན་གྱི་བྱ་བྲལ་བ། ། སྡུག་བསྔལ་དང་མྱ་ངན་གྱིས་གདུངས་པའི་སྲིད་པ་འདིར། ཁྱེད་ནི་བྱང་སེམས་ཀྱི་གཏེར་མཛོད་མངའ་བའི་རྒྱལ་སྲས་འཕགས་པ་བཞིན། འཕང་མེད་ཀྱི་གཏོང་ཕོད་ཆེ་ལ་སྙིང་རྗེ་ཡི་རང་གཤིས་ལྡན། ངས་ཁྱེད་ཀྱི་མཉམ་རྗེས་དབྱེར་མེད་དུ་གྱུར་བའི་སྤྱན་ཟུང་གི་གཟི་འོད་ལས་ཀྱང༌། སྟོང་སྙིང་ཟུང་དུ་འཇུག་པའི་བླ་མེད་ཀྱི་རྟོགས་པ་དེ་མཐོང་ཐུབ། རྣལ་འབྱོར་བ། དོན་དམ་གྱི་གནས་ལུགས་འཚོལ་བའི་ཟླ་བྲལ་གྱི་རྫོགས་ཆེན་པ། ། འཁོར་བ་རུ་གཏན་སྡོད་ཀྱི་གཞི་བཅའ་བ་ལུས་ཅན་གྱི་ཁྲོད་དུ། ཁྱེད་ནི་དྲི་བཞོན་གྱིས་ཕྱོགས་སུ་ཁྱེར་བའི་སྟོན་ཁའི་སྡོང་ལོ་བཞིན། ཞེན་ཆགས་ཀྱི་སེམས་པ་མེད་ལ་འདི་སྡོད་ཀྱི་འདུན་པའང་མེད། ངས་ཁྱེད་ཀྱི་ཕྱག་འཁར་གྱི་གོས་སྲུབས་རེ་རེ་ལས་ཀྱང༌། ཡེ་གྲོལ་གྱི་རྟོགས་པ་དེ་མཐོང་ཐུབ། རྣལ་འབྱོར་བ། ཕྱོགས་མེད་ཀྱི་རི་ཁྲོད་འགྲིམ་པའི་སྙིགས་དུས་ཀྱི་རྒྱལ་ཁམས་པ། ། སྨག་རུམས་ཀྱིས་ཡོངས་སུ་བསྒྲིབས་པའི་ས་ཕྱོགས་འདིར། ཁྱེད་ནི་ཟླ་ཤེལ་གྱི་དཀྱིལ་འཁོར་བཞིན་གཟི་བྱིན་གྱི་འོད་དཀར་ལྡན་ལ། ཕན་བདེ་ཡི་བསིལ་ཟེར་འཛོམས། ངས་ཁྱེད་གཤེགས་ཤུལ་གྱི་ཞབས་རྗེས་ལས་ཀྱང༌། མཁའ་སྤྱོད་ཀྱི་ཞིང་ཁམས་དེ་མཐོང་ཐུབ། རྣལ་འབྱོར་བ། ངའི་སེམས་ཁོང་ན་འོད་དུ་འཚེར་བའི་ཕྱོགས་སྟོན་གྱི་སྐར་མ་འོད་ཆེན། །  །

        / ཤར་རིའི་སྟེང་གི་འཛུམ་ཁ་བཞད་དེ་རྨི་ལམ་འཚོ་བའི་ངོགས་སུ་ཟེགས།། ལུས་སེམས་གཉིས་ཀའི་ཕྱག་མདུད་དམ་པས་འཚོ་བའི་རྨི་ལམ་སྒྱུ་ལས་བྱུང་།། སྤྲིན་ཕུང་བལ་གྱི་ཁྲོམ་རྩལ་སྤྲུགས་ཏེ་དགུན་རླུང་ན་བའི་འཚབ་ཏུ་ཞུགས།། རུས་ཁྲག་རྣོག་པའི་གསང་སྐུད་ཆད་དེ་རྩུབ་སྤྱོད་དྲག་པའི་གང་ཟག་བཟློག།

། ཨ་མས་ང་ལ་བོད་སྐད་སློབ་དུས།། བདུད་པེའི་གླུ་དང་མཉམ་དུ་ཡོད་ཀི། ཨ་ཕས་ང་ལ་རྟ་རྩལ་སློབ་དུས།། བདུད་པེའི་སྐད་ངག་ཁྲོད་ན་ཡོད་ཀི།