རྩོམ་ཡིག་འདི་ཐེངས། 1580 བཀླགས་འདུག

བོད་མེ་ཕོ་སྤྲེལ་ལོའི་གནམ་ལོ་གསར་བཞད་ཀྱི་དགའ་སྟོན་བསུ་བ་དང་འབྲེལ་ “རྒྱལ་གཤེན་སྙན་ངག་གླིང་གི་ཚོགས་མི་ཚོས་ཕུལ་བའི་ཁ་བྱང་གཅིག་པའི་སྙན་ངག”

།

⟪ཞང་བོད་མཐོ་སྒང་ནས་འཕྱུར་བའི་སེམས་འགྱུ་གསོན་པོ།⟫

།

མེ་ལྕེའི་དཔལ་ཡོན་དགུང་དུ་འབར་བའི་རྩེར།།

མྱུར་མགྱོགས་སྤྲེའུའི་རིག་རྩལ་རབ་རྒྱས་ཤིང་།།

བཀྲ་ཤིས་ཕྱྭ་གཡང་འདོད་རྒུའི་གཟི་འོད་ཅན།།

ཞང་བོད་ཤེས་རིག་འཕེལ་བའི་གྲོགས་སུ་བསུ།།

།

ཁྱུང་ཆེན་མཁའ་ལ་ལྡིང་བའི་ཟིལ་ཤུགས་ཀྱིས།།

གཟི་ཡི་འོད་རླབས་ཞང་བོད་ཀུན་ལ་བཀྱེས།།

གནའ་བོའི་བཙན་རྫོང་དམག་རྟའི་རྨིག་རྡུལ་ཁྲོད།།

ཏི་སེའི་དབུ་ཁྱུད་བྲིས་པའི་ལོ་རྒྱུས་དྲན།།

བྱ་རུ་བཅོ་བརྒྱད་རལ་གྲིའི་འོད་མདངས་ཀྱིས།།

མ་ཕམ་གཡུ་མཚོའི་མིག་མདངས་མཛེས་པར་བྱས།།

བོན་ཆོས་མདའ་དང་འཕང་གི་མཛའ་བརྩེ་ཡིས།།

བསིལ་ལྡན་ལྗོངས་སུ་ལུགས་གཉིས་ཁྱིམ་གཞི་བརྩིགས།།

ཀླུ་སྨྱོན་ཧེ་རུ་ཀས།

རྒྱལ་ཀུན་མཁྱེན་བརྩེ་ལྷ་ལམ་ཡངས་པའི་གཞིར། །

གཤེན་བསྟན་སྣང་བྱེད་ཉི་མ་འབུམ་གྱི་གཟི། །

སྙན་པའི་འོད་སྟོང་སྲིད་འདིར་འགོང་སྙམ་པ། །

ངག་རིག་སྨྲ་བའི་སྡེ་ཚོགས་གླིང་བཞིའི་རྒྱན། །

དགོངས་དོན་སྣ་ཚོགས་སྲོག་ལྡན་དགའ་མའི་དཔལ།།

འཇོ་སྒེག་ལུས་ཀྱི་ཉམས་འགྱུར་རིགས་གཅིག་ཀྱང་།།

ཕུན་ཚོགས་རྒྱན་གསུམ་གཅིག་བས་གཅིག་ལེགས་པ།།

ངག་རིག་རོལ་རྩེད་དུས་ཀུན་རྒྱས་གྱུར་ཅིག།

མཁར་ནག་སྐལ་བཟང་རྒྱ་མཚོས།

རྨུ་ཐག་འོད་ཀྱིས་སྦྲེལ་བའི་གནམ་སའི་ཁྱོན།།

རྒྱལ་གཤེན་དབུ་འཕང་མཐོ་བའི་བླ་མཁར་དུ།།

རྒྱལ་བློན་མངའ་ཐང་དགུང་ལ་འཕུར་བ་ཡི།།

ཞང་བོད་མེས་པོའི་ལོ་ཁམས་གཡང་དུ་ལེན།།

ཕྱི་སྣོད་བསྒུལ་བའི་རླུང་ཆེན་གཡུགས་པ་དང་།།

ནང་བཅུད་བསྲེག་པའི་མཚོན་ཆ་ཕབ་ན་ཡང་།།

ཞང་བོད་མེས་རྒྱལ་ཤེས་རིག་གསོན་པའི་བླ།།

བསྐལ་ཆེན་མ་སྟོང་བར་དུ་སྙིང་གིས་བསྐྱོར།།

རྔ་རང་སྒྲས།

ཆུ་མགོ་གངས་ལ་འཁྱུད་པའི་ཞང་བོད་གནས།།

གནའ་བོའི་བློ་དང་ཤེས་རབ་ཕྱོགས་ཀུན་ཁྱབ།།

བོན་སྡེ་ཐེག་དགུའི་དཀྲིས་པའི་དཀྱིལ་འཁོར་ལ།།

གཡུ་རལ་གནམ་ལ་ཟུག་འདྲའི་དཔའ་སྤོབས་ལྡན།།

མངའ་རིས་སྐོར་གསུམ་དབུས་གཙང་རུ་བཞི་དང་།།

མདོ་ཁམས་སྒང་དྲུག་བཅས་ཀྱི་གྲུབ་པའི་ཡུལ།།

སྟོན་བསྟན་གཉིས་ཀྱི་རང་ལུགས་མ་ནོར་བར།།

འཛིན་ཅིང་སྤེལ་ལ་མཁས་པ་ངོ་མཚར་གནས།།

དུར་བྱང་གིས།

གངས་ཀྱི་དབལ་སོ་གྱེས་པའི་མདུན་ཞོལ་ན།།

ཆུ་བཞིའི་བདུད་རྩི་ལུད་པའི་མཆན་ཁུང་གི།

བཅོ་བརྒྱད་ཟིན་བྲིས་བཏབ་པའི་ཁ་ཡིག་ལ།།

ཞེ་གཉིས་ལེའུ་བྲིས་པའི་བམ་པོ་བརྩེགས།།

སུམ་གཉིས་རྨིག་སྒྲས་རྡུང་བའི་གཤིན་པོ་དེས།།

སྙིང་སྟོབས་བྲག་ལ་བརྐོས་པའི་ཡུལ་གྲུ་ནས།།

ལུགས་གཉིས་མིག་ཟུང་ལོང་བའི་བྱི་ཕྲུག་འགས།།

རྡོ་རིང་ས་ལ་བརྡབ་པའི་ལོ་རྒྱུས་དྲན།།

གཟི་མིག་དགུ་པས།

བླ་རི་གངས་དཀར་དབུ་རྩེ་དགུང་དུ་རེག །

ཾབླ་མཚོ་མ་པང་གཏིང་མཐའ་ཀླུ་ཡུལ་འཁྱིལ། །

ཾབླ་བྲག་སྟ་སྒོ་སྲིད་པའི་ཀློང་ལས་འཕགས། །

ཾབླ་གནས་རི་མཚོ་བྲག་གསུམ་གཤིས་ངོགས་སུ། །

མཐོ་སྒང་ཞང་བོད་བླ་མཁར་མཁའ་རུ་བརྩེགས། །

མེས་པོའི་ཤེས་རིག་ཾབླ་སྲོག་གཙང་རྒྱུན་ཐིམས། །

ལོ་རྒྱུས་རྡོ་རིང་བླ་བཾདག་ཀློང་ནས་བཞེངས། །

ལས་རླུང་དགུང་ཾདུ་འཕགས་པའི་དན་རྟགས་ཡིན། །

ཨ་ཀྲོང་རིན་རྒྱལ་གྱིས།

རྒྱལ་གཤེན་སྟོན་པའི་ཐུགས་ཀྱི་མཁྱེན་དགོངས་རྩལ།།

འགྲན་པའི་དོད་དུ་གངས་རྒྱལ་ཏི་སེ་འགྱིང་།།

མེས་པོ་གོང་མའི་མཛད་རྗེས་རྨ་མེད་ཀུན།།

དཀར་པོའི་མདངས་ཀྱིས་ཡོད་ཚད་བརྐུས་པར་ངེས།།

ཤེས་རིག་གཙང་མ་ལྷ་དར་ཡུག་གཅིག་གིས།།

མཐོ་སྒང་དབུ་འཕང་དགུང་དུ་རེག་པར་བརྩམ།།

རྒྱུན་ཐག་རིང་བའི་ལོ་རྒྱུས་བྱུང་རབས་རྣམས།

གནས་ཆེན་ལྔ་ཡི་སྟེགས་སུ་མངོན་པར་བརྗིད།།

ཉི་ཚེས།

སྟོན་པ་གཤེན་རབ་ཞང་ཞུང་ཡུལ་དུ་འཁྲུངས།།

རྒྱ༵ལ་གཤེ༵ན་བསྟན་པ་གངས་ཅན་བོད་དུ་དར།།

ཤེས་རིག་དབུར་མཚོོ་ཀུན་གྱིས་ལོངས་སུ་སྤྱོད།།

འདི་ནི་གངས་ཅན་བོད་ཀྱི་བསོད་ནམས་རེད།།

གཤེན་རབ་ཞབས་རྗེས་སྙེགས་པའི་ཞང་ཞུང་པ།།

ལོ་རྒྱུས་རྒྱང་ཐག་རིང་བའི་གངས་ཅན་ལྗོངས།།

ཞང་བོད་མེས་པོའི་མཐུན་ལམ་བདག་ཏུ་འཛིན།།

གླིང་བཞི་ཟིལ་གྱིས་གནོན་པའི་བོད་པ་ཚང་།།

གསེར•ཐོག་མདས།

འཛམ་གླིང་འཛིན་མའི་བླ་ཡི་ཡངས་སྟེང་ནས།།

ཞང་བོད་མཐོ་སྒང་ཞལ་ལྕེ་དཔལ་འབར་བས།།

ཚད་མེད་ཞི་བའི་གསས་མཁར་དགུ་སྒྲིལ་རྩེར།།

རླབས་ཆེན་མཁའ་ལྡིང་ལྟ་བའི་གཤོག་དྲུག་རྒྱས།།

གངས་རྒྱལ་ཏི་སེའི་གསང་བའི་མཁར་རུམ་ནས།།

དོན་དམ་པོ་པོའི་རྟགས་མས་ཕྱོགས་ཀུན་བདལ།།

རིན་ཆེན་གཟི་ཡི་ཕྲེང་བའི་མདངས་བཟང་འཚེར།།

དགེ་མཚན་མངོན་པར་མཐོ་བས་ལེཊ་སྐྱེས་བསུས།།

རིག་པའི་ཉི་མས།

ཡ་ཐོག་ཅིག་ལ་ཞང་བོད་སྲིད་པའི་ཏོག།།

ཕ་རབས་ཤིག་ལ་གཤེན་གྱི་ངར་སྐད་མཐོ།།

སྒོ་ཕུག་བར་གསུམ་བྱ་རུའི་འདུལ་ཞིང་ཞིག །

དོན་དུ་གངས་རྒན་སྲིད་པའི་ཆགས་རབས་ཡིན།།

མཐོ་སྒང་ཞིག་ལ་ཕ་ཁྱིམ་གཞིས་ཆགས་ཏེ།།

དམུ་ཐག་ཅིག་ལ་འོད་ཀྱི་བླ་འཁོར་ནས།།

མདོ་སྔགས་རྫོགས་གསུམ་ཞུན་ཐིག་དྲང་མོ་ཞིག།

ཞང་བོད་བླ་མཚོ་འཁྱིལ་བའི་ལོ་རབས་ཡིན།།

སྟོང་སྲས་ལྷ་བུས།

ཞང་བོད་རྒྱལ་ཁམས་མེས་པོའི་བླ་མཁར་སྟེ།།

སྒོ་བཞི་མཛོད་ལྔ་གཡུ་རིས་གཅལ་དུ་བཀྲམ།།

ལྷགས་པས་མུ་ཏིག་རུམ་དུ་བརྫངས་སྐྱེན་དུས།།

སྔ་རབས་དབལ་མེའི་རྩལ་གྱིས་ལྷིང་པོར་བཏང་།།

རྗེས་བཞག་གསེར་ནག་བུ་ཚའི་ནོར་ཞུན་ཏེ།།

བཀོལ་བའི་ཐར་ལམ་བརྙེད་དེ་འོད་ལམ་ལམ།།

བྱིས་པས་ལྗན་ལྗིན་འདམ་ཞིག་བསྐུས་བྱས་ཀྱང་།།

ཡང་དག་ཆབ་ཀྱིས་བཀྲུ་ལ་བང་རྩལ་འགྲན།།

གསང་མྱུལ་བས།

གངས་རྒྱལ་ཏི་སེ་འཛམ་གླིང་གཙུག་གི་ཏོག།

མ་ཕམ་གཡུ་མཚོ་ལྷ་མི་དགྱེས་པའི་ཆབ།།

ཀོང་པོ་བོན་རི་གཤེན་རབ་ཐུགས་ཀྱི་རྟེན།

གཤེན་རབ་བསྟན་པ་ས་སྟེང་ཀུན་ཏུ་ཁྱབ།།

གངས་ཀྱི་རྒྱལ་མོས་གཞི་རྒྱུད་བརྡུངས་པ་ནས།།

གངས་ལ་ཆགས་པའི་དབྱངས་སྙན་ཕྱོགས་སུ་ཁྱབ།།

གངས་དང་ཁ་བའི་འདབ་མ་ལྷུག་ལྷུག་ཏུ།།

གངས་ཅན་ངག་གི་སྒོ་མོར་འཁྲུངས་འདི་རྨད།།

སྙན་བཟང་བྱམས་པས།

ཞང་བོད་བོན་བསྟན་གསེར་ཞུན་གོ་ལའི་ཁྱོན།།

མཐོ་སྒང་མེས་པོའི་བླ་སྲོག་གངས་ལྗོངས་ཏོག།

གཡས་འཁྱིལ་གཤོག་རྒྱང་ངོམ་ནས་མཁའ་ལ་འཕུར།།

རེ་བའི་མྱི་བུ་ཡོད་དགུའི་སེམས་འགྱུ་བཟང་།།

རྒྱལ་གཤེན་ཟུང་དུ་འབྲེལ་བའི་གཡོ་འགུལ་ཞིག།

རྒྱལ་ཁམས་ལྷིང་འཇཊ་འཚོ་བའི་དཔལ་ཡོན་རོལ།།

རྒྱལ་ཁ་གཟི་བརྗིད་ལྡན་པའི་རྒྱབ་ལྗོངས་མཛེས།།

རྒྱལ་བའི་དབུ་འཕང་བ་དན་མཁའ་རུ་སྒྲེངས།།

གྱེར་སྲས་ཀྱིས།

ཁོར་ཡུག་གངས་ཕྲེང་བསྟར་བའི་ཞིང་ཁམས་དེའི།།

འདྲེ་བདུད་སྲིན་པོའི་རིགས་ཚོགས་ཕམ་དུ་བཅུག།

ཐོག་མར་རིམ་དགུ་ཐེག་པའི་ཞབས་རྗེས་བརྩེགས།།

བོད་ཡུལ་བྱམས་བརྩེ་དྲོད་མོའི་ས་བོན་བཏབས།།

གཞི་དང་ལམ་འབྲས་ཟབ་མོའི་སྲོལ་ཞིག་གཏོད།།

རྣམ་གསུམ་བསྟན་པ་དག་པའི་ཞིང་ས་བསྐྲུན།།

བརྗོད་ན་སྤོབས་པ་ཟད་པའི་བཀའ་དྲིན་ཅན།།

ཁ་བའི་མེས་པོ་ངོ་མ་བོན་སྟོན་གཤེན།།

དྲུག་བསྟན་གྱིས།

གངས་ལ་བསྙེས་ཤིང་གཡུ་མཚོ་འཐུང་བ་ཡིས༎

དཔའ་སྟོབས་སེང་གེར་འགྲན་པའི་བྱ་རུ་ཅན༎

སྡེར་མོས་བྲག་རི་བསྙིལ་བའི་ངར་ཤུགས་རྒྱས།།

གཤེན་བསྟན་རུ་དར་འཕྱར་བའི་བླ་སྲོག་མཐོ།།

བཙུན་མོའི་སེམས་ལ་ཞང་པོས་ཁ་ཆུ་བཞུར།།

ཇུས་ངན་རྩེད་མོའི་འཕྲུལ་གྱི་དུས་ར་བགོས།།

བཙན་པོའི་སྙིང་ཁར་དཔུང་གི་རྣོ་ངར་ཟུག།

ཞང་ཞུང་རྒྱལ་རྒྱུད་བཅད་འདི་སྙིང་ལ་གཟན།།

འཇིགས་མེད་དགའ་བའི་གཞོན་ནུས།

ཕོ་ལོང་གཡག་སྙིང་ཏི་སེའི་ཐད་ནས་ལྡིང་།།

ཁྲི་ལོ་གནམ་གྲགས་མ་པང་རུམ་ནས་བཀྲོལ།།

བཞི་བཅུ་འཕྲུལ་ཡིག་གནམ་སའི་བར་ནས་མཛེས། །

ཞང་བོད་མེས་པོ་ཨེ་མ་ཧོ་ནས་བསྟོད། །

རལ་བའི་མདུད་ནག་རལ་གྲིའི་ངར་ལ་དགའ། །

ཕ་ནོར་ཆ་ལྔ་མགོ་བོ་གཞན་ལ་སྔས། །

ད་དུང་ཨོག་ཚོམ་ཕུར་ཕུར་བྱུག་བྱུག་ངང་། །

ཅི་ཞིག་ཐོབ་པའི་རང་སྣང་བོད་ཀྱི་གཤིས། །

རིས་མེད་པས།

བླ་རི་གངས་དཀར་ཏི་སེ་མཐོ་ཞིང་བརྗིད།།

བླ་མཚོ་མ་ཕམ་གཡུ་མཚོ་ཟབ་ཅིང་ཡངས།།

དེ་ཕྱིར་ཞང་བོད་རིག་གཞུང་རྒྱ་མཚོའི་ཀློང་།།

སྐལ་བའི་མཐའ་ལ་འཕྱུར་བ་སུ་མི་རངས།།

ཞང་བོད་རིག་གཞུང་ཟབ་མོ་རོ་གཅིག་འདྲེས།།

སྙན་དོན་མངོན་པར་འཁྱིལ་བའི་དོ་ཤལ་ཅན།།

ལེགས་བྲིས་སྙིང་བཅུད་བསྟན་པའི་སྙན་ངག་དཔལ།།

སྐལ་བཟང་མིག་གི་ལམ་འདིར་ཨེ་མ་རྨད།།

འབྲོ་སྨྱུག་གིས།

ལོ་རྒྱུས་ཞིག་གི་མཇུག་བྱང་འབྲི་དུས་སུ།།

རིང་ནས་འགྲོ་ལ་སྨན་པའི་རྒྱལ་བའི་སྲས།།

ཆེ་རྒུའི་གཙུག་རྒྱན་གཤེན་རབ་མི་བོ་ཡིས།།

དུས་ཀྱི་མུན་པ་བསལ་ནས་སད་དུ་བཅུག།

བོན་གྱི་གཏེར་སྒོ་འབྱེད་ནས་ཉམས་ཤིག་ཕུད།།

རྣམ་ཤེས་དེ་ལ་བསྲེལ་ནས་རོ་གཅིག་ཏུ།།

རྣ་བ་ཕྱི་ནང་བརླག་ནས་གསལ་བྱས་པའི།།

ལོ་རྒྱུས་རིང་མོ་ཕྱིར་མིག་བལྟས་པ་ཙམ།།

གྲུ་བས།

སྲིད་ཞིའི་མཛེས་ཉམས་འཕྲོག་པའི་གངས་ཀྱི་ཏོག།

རྨད་བྱུང་ཟབ་རྒྱས་འབྱུང་ཁུངས་གནས་ཀྱི་ཡུལ།།

དད་གསུམ་རྐང་འཐུང་འཛུམ་པའི་ཨ་ལོང་གསེང་།།

བྱིན་རླབས་སྦྲང་ཆར་གསར་བའི་དགའ་སྟོན་འཇོ།།

གནས་མཆོག་གངས་དཀར་ཏི་སེའི་ཡང་རྩེ་ན།།

རྒྱལ་གཤེན་ཟུང་འབྲེལ་ལྷམ་མེར་འཛུམ་གྱིས་བཞད།།

བདེན་པའི་རྒྱལ་མཚན་བསྒྲེངས་པའི་མཁན་སློབ་ཀྱིས།།

གཡང་འཁྱིལ་ཕ་ཁྱིམ་དྲོད་མོའི་གཟི་བརྗིད་ངོམས།།

སྐར་འོད་ཀྱིས།

ཞང་བོད་ཕ་གཞིས་དྲོད་མོའི་མཐོ་སྒང་དུ།།

ཤེས་རིག་སྟོང་གི་དཔལ་ཁ་གཤེན་གྱིས་འབྱེད།།

མི་སྲིན་གཤིས་སྤྱོད་རྩུབ་མོ་གཡུང་དུ་ཕབ།།

ཤ་རུས་གསེང་དུ་ཐིམ་པའི་བླ་སྲོག་གྱུར།།

ལས་རླུང་དྲག་པོ་དུས་རབས་བདུན་ནས་འཕྱུར།།

མེས་པོའི་སྙིང་ནོར་རླུང་ལ་བསྐུར་འགོ་བརྩམས།།

ཞང་བོད་འཕོང་བའི་འགོང་བོས་རྒྱལ་སེམས་དཀྲིགས།།

རྒྱལ་སྲིད་འཐོར་ཞིང་དམངས་རྣམས་སྐྱོ་བས་གདུང་།།

ཤར་ཉི་འོད་ཀྱིས།

མཐོ་མཐོ་ཞང་བོད་བླ་མཁར་དགུ་བརྩེགས་ནས།།

ཡབ་མེས་དག་གི་ཤ་གསེང་རུས་རྐང་ལས།།

ཕན་པའི་སྤྱི་ནོར་སྒོ་བཞི་མཛོད་དང་ལྔ།།

མ་གྱུར་ཁམས་གསུམ་འགྲོ་བའི་གསོས་སུ་བསྐྲུན།།

མ་ཡུམ་གོ་ལ་རིལ་པོའི་རྩེ་མོ་ནས།།

དགྲ་དང་གཉེན་གྱི་རིས་སུ་མ་ཆད་པར།།

བུ་རབས་ཚ་རྒྱུད་ལྷ་ཡི་དམུ་ཐག་འཐེན།།

འགྲོ་འདུག་ཞར་ཞོར་བསམ་དཀར་རྟ་རུ་ཁེན།།

 རྫ་རིན་ཆེན་རྒྱལ་མཚན་གྱིས།

རྒྱལ་ཀུན་མཁྱེན་བརྩེ་ཟླ་བའི་མ་མ་ལས། །

ལུང་རྟོགས་བསྟན་པའི་གཟི་འོད་འཕྲོ་བ་ཅན། །

ཁམས་གསུམ་གདུལ་བྱ་སྐྱོང་བའི་མགོན་གཅིག་པུ། །

དམུ་རྒྱལ་ཐོད་དཀར་སྲས་པོར་སྙིང་ནས་འདུད། །

རྨད་བྱུང་ཚོགས་གཉིས་གསེར་གྱི་སྙིང་པོ་ལས། །

ལེགས་བཤད་མེ་ཏོག་ཕོན་པོ་འཁྲུངས་མཛད་པ། །

སྐལ་བཟང་དོན་གཉེར་བུང་བའི་ཁྱུ་ཚོགས་ལ། །

ལྔ་ཟུང་རིག་པའི་ཉིང་ཁུ་བསྩལ་འདི་རྨད།།

འཕྲིན་ལས་ཉི་མས།

འཛོམས་དུས་འཛུམ་མདངས་སེམས་ལ་ཉར་བ་ན།།

གྱེས་དུས་འགྱོད་པའི་གདུང་བས་རྒུད་མི་སྲིད།།

ནམ་ཞིག་སླར་ཡང་དབྱངས་རྟ་ཐོས་པའི་ཚེ།།

རྗེས་དྲན་འདི་ཡིས་སྐྱོ་ཡང་ཕམ་མི་སྲིད།

སྙན་ངག་འཚོལ་ནས་གང་སར་ཉུལ་མོད་ཀྱང་།

ཚོར་བ་གསོན་པོས་བཞེངས་པའི་དེ་རིང་ནི།

ཚིག་གི་ཚོམ་བུའི་གྲུབ་པའི་དྲན་རྟེན་ཡིན།

ལོ་ཟླ་ཞག་གིས་བཀར་རུང་ཉམས་པ་མེད། །

ཁམས་རྙི་གྲོལ་གྱིས།

ལོ་ཟླ་ཧྲིལ་བོ་དམར་ནག་མེ་ཡིས་བསྒྲིབས།།

དུ་བ་རྐང་ཅིག་ཁ་བའི་རི་ནས་འཕྱུར།།

ལམ་ཁར་བཞད་པའི་ཁམ་སྡོང་སྨུག་པོ་དེའི།།

ལོ་མ་སེར་ལོ་ལྕགས་རྭའི་མཐའ་ནས་སྤུར།།

ཁེར་རྐྱང་རུས་ཀོག་བོད་ཀྱི་གདོང་ལ་གཏུག།

སྐྱོ་སྡུག་ཟད་པོ་ས་མཐའི་རླུང་ལ་བསྐྱོན།།

ཨ་ཐང་ཆད་པའི་ཁ་བའི་འདབ་མ་རེ།།

རི་ཀྱོག་ཅིག་ནས་མི་ཚེ་ཨར་ལ་གཏད།།

ཁམས་རྙི་གྲོལ་གྱིས།

འཕྲུལ་གྱི་ཡིག་མཛོད་མེ་རུ་ཤོར་བའི་མཐར།།

བརྒྱད་ཁྲི་བཞི་སྟོང་བོན་སྒོའི་རྩ་བ་སྟེ།།

ཨ་ཨཱོྃ་ཧཱུྃ་རཾ་ཛཿཡི་ཡིག་འབྲུ་དག།

རིགས་གཙང་ལྷ་རྒྱུད་ཞང་བོད་གཉིས་ཀྱི་སྐལ།།

བོད་ཁམས་སྲིན་པོས་དབང་སྒྱུར་ཁ་གནོན་དུ།།

གཤེན་རབ་འཁོར་དང་བཅས་པ་ཞབས་བཅགས་ཏེ།།

ཤ་དང་དུག་རྣམས་མཆོད་པའི་ཀོང་བུ་རུ།།

མགོ་རྟིང་རྨང་ནས་བསྒྱུར་ཏེ་ཡང་དག་བཟོས།།

ཁམས•རིགས་གཙང་ལྷ་གྲོལ་གྱིས།

རིགས་རུས་ཆེ་བ་འོད་གསལ་ལྷ་ཡིས་བརྫུས།།

གཅེས་ནོར་རིག་གཞུང་མཚོ་མོ་ལྷོད་ཀྱིས་འཁྱིལ།།

མཐོ་སྒང་ཕ་ཁྱིམ་མཐའ་བཞི་སྟོབས་ཀྱིས་འགྱིངས།།

རིན་བྲལ་མེས་པོ་ཞེ་གཉིས་བདག་ཏུ་བསྐོས།།

ཏི་སེ་གངས་རྒྱུད་མུ་ཁྱུད་མཐའ་ནས་བསྐོར།།

ཡི་དྭགས་གཡུང་དྭགས་རྩེད་འཇོའི་གར་ལ་རོལ།།

གཙང་གསུམ་ཆུ་མིག་ཤང་ཤང་དལ་གྱིས་བབས།།

མི་ཡུལ་དག་ཞིང་སྲིད་ན་མངོན་པར་མཛེས།།

བསམ-གངས་ཐིགས་ཀྱིས།

གསེར་གྱི་ཁྱུང་ཆེན་མངའ་རིས་སྟོད་ནས་འཕུར།།

འདབ་གཤོག་གཡབ་མོ་གཤེན་གྱིས་སྐུ་བཀོད་འོག།

དངུལ་གྱི་འཇིག་རྟེན་སྲིད་པའི་རྒྱན་དུ་དབང་།།

ལྷ་སྔགས་དྲག་པོས་ཏི་སེ་དགུང་ལ་བསྟད།།

འཇིག་རྟེན་སྲིད་པ་གསུམ་གྱི་མངའ་འཁོར་དག།

གཉེན་པོ་ལྷ་ཀླུས་འཕྲུལ་གྱིས་ཡངས་པོར་ཕྱེ།།

སྐྱེ་འགྲོ་འཇིགས་པའི་ཀླུ་འབུམ་རྒྱུད་སྡེ་སོགས།།

གནམ་ས་ཆེན་པོར་མི་ཤོང་གླེགས་བམ་བརྩམས།།

ཨ་ཕྲུག་གིས།

གནམ་རིམ་པ་བཅུ་གསུམ་གྱི་ཁྲི་ཡིས་བཏེག་ཅིང་།།

ས་རིམ་པ་བཅུ་གསུམ་ཞིག་གདན་དུ་ཡོད་པ།།

བོན་སྲིད་ཞི་གཉིས་མེད་ཀྱི་སྲོལ་འབྱེད་ཆེན་མོ།།

མཚན་གཤེན་རབ་མི་བོ་ཞེས་གཙུག་གི་ལྷ་ཡིན།།

ཚེམས་འཕར་པོ་འཕར་ཆུང་གིས་ཨ་དཀར་བཏོན་ཞིང་།།

དོན་སྣང་སྟོང་གཉིས་མེད་ཀྱི་གྱེར་དབྱངས་ཐེན་པས།།

ཕྱག་གཡུང་དྲུང་བསྣོལ་མ་ཡིས་ངན་སོང་བཀག་པ།།

དུས་སྒྲོན་མེའི་བསྐལ་ཆེན་གྱི་གཤེན་སྲས་ཁྱེད་ཡིན།།

གཤེན་སྨྱུག་གིས།

དྲན་པའི་གདུང་བ་རྨ་ཀླུང་རིང་མོའི་གཞུང་དང་འདྲེས།།

སེམས་ཀྱི་སྙིང་གཏམ་ཤོག་སྨྱུག་རེ་རེའི་ལྷོད་ཀྱིས་བྲིས།།

དྲན་པའི་ཡིག་ཆུང་མ་བྲིས་ཤ་རུས་གསེང་ན་གསལ།།

འཕྱོང་རྒྱས་ཟླ་གཞོན་གནས་ཡུལ་གང་དུ་བདེ་པར་བཞུགས།།

གངས་རིའི་འདབ་ཀྱི་རྐང་ལམ་ཕྲ་མོ་གྱ་གྱུ་མ།།

མི་ཚར་འདས་སོང་དེབ་ཐེར་ནག་པོའི་ཕྱི་མིག་ཅིག།

ཨམ་ཚུགས་བསྡམས་ནས་རུས་པར་ཟུག་པའི་ན་ཟུག་འདི།།

རྐང་གླིང་ཕྲ་མོའི་ནམ་ཞིག་དལ་གྱིས་དཀྲོལ་བར་གཅེས།།།

བེ་མིག་གིས།

གནའ་སྔ་མོ་སྔ་མོའི་ཡུལ་ཁམས་ཤིག་ན།།

རྗེ་རྒྱལ་བོའི་མཚན་གྱིས་སྙན་པ་མེད་དུས།།

ཁྱེད་སྟོན་པས་ཤེས་རིག་དར་ཆ་འཆང་སྟེ།།

ཡུལ་བོད་ཁམས་རིག་པའི་མཚོ་མོ་བསྐྱིལ་མྱོང་།།

དུས་དེང་སང་རིག་གནས་ཕྱིར་རྟོག་ཀློང་ན།།

ཁྱེད་བློ་གྲོས་གསེར་གྱི་ཟེགས་མ་རེ་རེ།།

གླིང་གཞན་ན་གསར་སྐྱེས་མེ་ཏོག་བཞིན་དུ།།

སེམས་བསམ་པ་འགུགས་པའི་ལྕགས་ཀྱུར་གྱུར་འདུག

འདྲེ་རྐང་འཇིབ་ཀྱིས།

གནའ་བོའི་མཁར་རྫོང་གི་ཤེས་རིག་རྣལ་མ།།

མཐོ་སྒང་ར་བ་ནས་གྱེན་དུ་ལངས་མྱོང་།།

དཔའ་བོའི་ཆོ་ལོ་ཡིས་མིང་བྱང་ཅན་པོ།།

རྩག་པའི་གོས་ལྭ་ཡི་གནའ་མྱི་མཚར་པོ།།

གངས་སེང་ཁ་འཕྲོད་ཀྱི་ཉི་ཟླའི་དར་ཆ།།

མཐོན་པོའི་གངས་རི་ནས་མཁའ་ལ་བསྒྲེངས་མྱོང་།།

རྟ་མཆོག་རྒོད་པོ་ཡི་རྨིག་སྒྲའི་ཁྲོད་ནས།།

རལ་བ་ལྟག་འཕེན་གྱི་མྱི་རྒོད་མཚར་རོ།།

སྨྱུག་ཐོགས་ཀྱིས།

/