མེ་ལོང་ནང་གི་གཟུགས།
རྩོམ་ཡིག་འདི་ཐེངས། 622 བཀླགས་འདུག
/
ཤར་རིའི་སྟེང་གི་འཛུམ་ཁ་བཞད་དེ་རྨི་ལམ་འཚོ་བའི་ངོགས་སུ་ཟེགས།།
ལུས་སེམས་གཉིས་ཀའི་ཕྱག་མདུད་དམ་པས་འཚོ་བའི་རྨི་ལམ་སྒྱུ་ལས་བྱུང་།།
སྤྲིན་ཕུང་བལ་གྱི་ཁྲོམ་རྩལ་སྤྲུགས་ཏེ་དགུན་རླུང་ན་བའི་འཚབ་ཏུ་ཞུགས།།
རུས་ཁྲག་རྣོག་པའི་གསང་སྐུད་ཆད་དེ་རྩུབ་སྤྱོད་དྲག་པའི་གང་ཟག་བཟློག།
/
རུས་པའི་མེ་ལོང་གས་ཆག་བྱུང་སྟེ་ས་རྡུལ་རླུང་གིས་འགྲོན་དུ་བྱེད།།
འ་འགྲོན་མ་མགྲོན་དགུན་ལ་བསུས་པས་རུས་པའི་རྒྱན་གྱི་སེར་གས་རྣོག།
འཛུམ་ཁ་མཆོད་པའི་མེ་ཏོག་གད་ན་དགོད་ཁ་ལྷུང་བའི་སྙིང་ཁུག་གཤགས།།
གློ་མཆིན་ལྡིང་བའི་འཕར་སྒྲས་བབས་ན་རྩུབ་རླུང་རཊ་པའི་སྤྱོད་འདི་བཟློག།
/
སྙིང་གི་ཁྲག་འཛེར་སྐམ་ལ་ཉེ་བས་ཆུ་ཁོལ་རླངས་ཀྱི་གསོན་ཆོས་འཇིགས།།
སྤང་ཁུག་མེད་པའི་གློ་མཆིན་དམར་པོ་གཤིན་རྗེའི་དྲུང་ན་འཕར་ཚད་རྔུབ།།
གདོན་འདྲེ་གང་དང་དམྱལ་བ་ཞེས་བྱ་གསོན་པོའི་རོལ་རྩེད་བྱ་འདིས་མཚོན།།
རུས་དང་ཁྲག་དང་རྐང་སོགས་བེམ་རུང་རྣམ་ཤེས་བཙོས་པའི་ལས་འདི་བཟློག
/
སྒྱུ་མའི་འཕྲུལ་ལ་འཁྲུལ་ཤེས་ལྡན་རུང་འཛུམ་ཁའི་གང་ཟག་ངན་ལས་གཟི།།
བློ་ལྡན་མི་ཡི་སེམས་སྤྱོད་འཇིགས་ན་དམྱལ་བའི་ཞིང་ནི་ངང་གིས་མཇལ།།
སེམས་ཅན་སེམས་ཅན་ཁ་ཏོན་ཆགས་རུང་དུག་སེམས་འཕེལ་བའི་རྒྱུ་ལས་ཅི།།
དེ་ན་འདི་ན་ཉི་ཟླ་ཟུང་གི་འོད་ཀྱི་འཇམ་ཁས་གསལ་ལེར་བཟློག།
/།།
—-ཕྱི་ལོ་ ༢༠༡༦ ཟླ་ ༡ ཚེས་ ༡༣ ཉིན་སེམས་ཅན་ཁྱི་ཞིག་གི་སྣང་ཚུལ་མཐོང་བས་དེ་ལྟར་སྦྱར།
བསམ་ཚུལ་ཕྲིས།