། མིག་གི་མཐིལ་ལ་གཙང་བོ་གཤར་བ་དེ།། དགའ་མ་དུར་ལ་སྐྱེལ་ཚུལ་ཡིན་ནམ་ཀྱེ།། ཁོ་བོ་ཆང་ཁང་གཉིས་པའི་འགྲུལ་བ་ལྟར།། ཟློས་གར་ནར་མའི་ལམ་དུ་ཤུམ་ཤུམ་ངུས།། ། ཀུན་ཏུ་སྐྱོ་གདུང་རུམ་ལ་བཅུག་པ་ཡི།། དབུ་སྐྲ་སིལ་མར་གཏོར་བའི་དགེ་མ་བཞིན།། ནགས་ཀྱི་བསྟི་གནས་རྣམས་སུ་ཉུལ་བ་བས།། སེམས་ཀྱི་སྨུག་པ་ཁོག་ལ་འཐིབས་པར་བྱས།། ། མདུན་ན་བཞུར་བའི་བྱ་ཁྱུ་འདི་དག་ཀྱང་།། བདག་གི་སྣང་བའི་ཞིང་གི་མགྲོན་པོ་སྟེ།། མིག་ཆུའི་རྒྱ་མཚོའི་ཁ་རུ་ལྡིང་བ་ཡིས།། སྨྲེང་བ་འབུམ་ཕྲག་དུ་མ་གཡོ་བར་བྱེད།། ། ཡིད་ལ་བབས་པའི་ཁ་བའི་ངམ་ཁ་རུ།། དྲན་པ་ཁྲི་ཡིས་སྣོན་མ་བྱས་པའི་མུར།། རྣམ་ཤེས་ཆུ་ལ་ལྷུང་བའི་སྒྲུང་གཏམ་ཞིག། ཤོག་བུའི་རྩིབ་མ་བརྒྱུད་ནས་འདི་གར་སླེབ།། ། ཕྱི་ལོ་ ༢༠༡༥།༩།༢༧ ཉིན་གྱི་ཞོགས་པར་བླ་རུང་ནས་བྲིས། །  

། ༡༽ ། སྔོ་ལྗང་གཡུ་ལོའི་དབུས་ན་གནས་པའི་མ་ཡུམ་ཤེས་བྱའི་གཏེར་མཛོད་ཉིད།། ཅང་མེད་ཡུལ་གྱར་ང་ཚོའི་གཞིས་ཁྱིམ་དྲོད་ཀྱིས་བསྐྱངས་པའི་ཁོར་ཡུག་ན།། ཡོན་ཏན་ཀུན་འདུས་བརྩེ་བས་ཕྱུག་པའི་བཤེས་གཉེན་དམ་པ་གང་ཉིད་ཀྱིས།། ཐུགས་ཀྱི་རིན་ཆེན་གསེར་འོད་སྤྲོས་པས་བློ་གསར་དུ་མའི་རྨོངས་པ་བསལ།།

། འཆི་བའི་རི་སུལ་རྡུལ་དང་ཁ་བས་གཡོགས་ཤིང་།། ངག་གི་ས་ཆེན་མུན་པའི་ཡོལ་བར་འདྲེས་པའི།། བདག་ཉིད་དུག་ལྔ་ཁུར་བའི་མགྲོན་པོ་ཞིག་སྟེ།། ཉམ་ངའི་གཙང་བོའི་ཁ་རུ་གཅིག་པུར་ལུས་ཀྱང་།། དོན་དམ་ཟེའུ་འབྲུ་རྡོལ་སའི་གླེགས་བམ་ཁུད་ཀྱི།། སྐྱོ་སྣང་མགུར་ལ་འདྲེན་པའི་རིག་འཛིན་གོང་མའི།། ཞལ་དང་སོར་མོས་རེག་པའི་བརྩེ་བ་དཀར་པོའི།། རྗེས་སུ་ཆགས་པའི་འགྲུལ་བ་ང་ཙམ་མ་བྱུང་།།

སྙིགས་མའི་རྒུད་པ་ལས་དང་རྐྱེན་གྱིས་ཤར་ནས་དྲག་ཏུ་བསྐྱོམས་པ་དང་། ། མེ་ལྕེའི་ཚོགས་རྣམས་གདོན་གྱིས་བརླམས་པས་གནམ་སའི་བདག་པོ་ང་ཡིན་ཞེས། ། འཇིགས་རུང་མཚོན་ཆ་སྐར་མདའི་ཟོལ་གྱིས་གངས་རིའི་སྙིང་ཁར་གཟས་པའི་སྐབས། ། ཁ་བའི་རྣམ་ཤེས་སྡུག་གི་མཚན་མོར་བཙན་གྱིས་བཞུ་བའི་ལོ་ནག་དེར། ། །

། སྣང་བའི་རི་མོ་སེམས་ཀྱི་ཟབ་སར་བཞད།། ཚོར་བའི་གྱི་ལིང་རི་ལུང་ཐང་དུ་ཤོར།། རྟོག་འགྱུ་ཕྲ་མོ་ཕ་གིའི་གྲོང་ལ་བྲོས།། ངག་རིག་དགའ་མ་སྒྱུ་མའི་གར་སྟབས་མྱུར།།