བྲག་གི་རི་བོ་གོས་སུ་བྱས་ཤིང་།། འདི་སྣང་འཇའ་ཡི་སྒོམ་ཐག་བཅིངས་ཏེ།། ཏིང་འཛིན་ཟས་ཀྱི་མངར་ཁ་ལྡག་པའི།། རིག་པ་འཛིན་པའི་སྡེ་རྣམས་དྲན་བྱུང་།།

། མི་ལོ་གཅིག་ཁྲི་འདས་པའི་སྔོན་རོལ་ཏུ།། ཏི་སེའི་མདུན་ཞོལ་མུ་ཁྱུད་ཉེ་འགྲམ་ན།། གར་ལྗང་མཁར་དུ་ནོར་བུ་སྤུངས་བརྩིག་བཞེངས།། ཁྲི་ཝེར་གསེར་གྱི་རུ་ཅན་དེ་ན་བཞུགས།།  

 སྤྱི་བཤད་ཕྲན་བུ། ། དཔེ་དེབ་དང་སྨྱུག་ཁ་ནས་རྒས་སོང་བའི་གང་ཟག་ཞིག་གི་ངོས་ནས་བཤད་ན། དཔེ་ཀློག་བྱས་ཏེ་ཡོན་ཏན་འཕེལ་བ་ནི་ཟས་ཀྱིས་ལུས་རྒྱས་པ་དང་འདྲ། རང་ཉིད་ལ་སྔར་མེད་ཀྱི་ནུས་པ་བསྐྱེད་ཅིང་མི་ཚེ་དོན་ཡོད་བྱ་བའི་རྨི་ལམ་ཉག་གཅིག་གི་ཆེད་དུ་ཡིན། དཔེ་ཆ་བཀླགས་པས་ད་གཟོད་མཛེས་སྡུག་གི་རི་བོའི་ཡང་རྩེར་སོན་ཐུབ་པ་ངས་བརྗོད་ག་ལ་དགོས། ལྷག་པར་དུ་དཔེ་ཀློག་པ་ཞིག་ཡིན་སོང་ན། ཕུགས་ཀྱི་དམིགས་ཡུལ་ནི་ལས་ཐམས་ཅད་ཀྱི་ལམ་དུ་འགྲོ་བའི་ཕྱོགས་སྟོན་སྒྲོན་མེ་འོད་ཆེན་ཡིན།

  ། ལེགས་བྱས་སྐལ་བཟང་ཚོགས་ཀྱི་རླབས་ཕྲེང་བསོད་ནམས་ཞིང་དུ་བགྲོད་པའི་མཐར།། དལ་འབྱོར་རྟེན་བཟང་གསེར་གྱི་འདབ་བརྒྱ་དབང་ཕྱོགས་གྲུ་འཛིན་མཁར་ཚེས་ནས།། འཇིག་རྟེན་གསུམ་གྱི་རྒུད་པའི་དཔུང་ཚོགས་སྐད་ཅིག་གཅིག་གིས་འཇོམས་མཛད་རྗེ།། ཞྭ་དཀར་བསྟན་འགྲོའི་གཙུག་གི་ནོར་མཆོག་དཔོན་གསས་བླ་མས་འདིར་གསན་མཛོད།། ། འདི་ན་བདག་ཅག་བོན་འབངས་བྱེ་བའི་དད་འདུན་པད་མ་དཀར་པོའི་མདངས།། སྒོ་གསུམ་དད་པས་མཁའ་ལ་རྩེན་བཞིན་རེ་བས་མགྲིན་དབྱངས་གཅིག་སྤུངས་ཏེ།། དཔོན་གསས་བླ་མའི་སྐུ་གསུང་ཐུགས་གསུམ་བདག་ཅག་གཙུག་གི་སྐྱབས་གནས་སུ།། བསྐལ་བ་ནས་ཀྱང་བསྐལ་བར་བརྟན་པའི་གསོལ་བ་འདེབས་པ་ཨེ་གཟིགས་སམ།། ། གང་སྐུའི་མཛད་བཟང་ཉིན་བྱེད་འཁོར་ལོས་འཇིག་རྟེན་གསུམ་དུ་ཁྱབ་གྱུར་ཅིང་།། ཁྱད་པར་བདག་ཅག་བསོད་ནམས་ཞིང་དུ་རྫོགས་ལྡན་དཔལ་ཡོན་རབ་རྒྱས་པས།། ལྷ་ལྡན་ཞིང་བཀོད་དཀྱིལ་འཁོར་བསྐྲུན་ཞིང་བཤད་སྒྲུབ་པད་ཚལ་སྐྱོང་བ་སོགས།། མགོན་པོ་གང་གི་ཐུགས་རྗེའི་བཀའ་དྲིན་སྟོང་གསུམ་གསེར་གྱིས་གཞལ་ནུས་མིན།། ། འོན་ཀྱང་དམུས་ལོང་བདག་ལྟའི་ཚོགས་རྣམས་རྣམ་དཀར་འོད་ཀྱི་འཁོར་ལོའི་ཞིང་།། སྐུ་གསུམ་རྒྱལ་བའི་དཀྱིལ་འཁོར་མཇལ་ལ་ཐག་གིས་བསྐལ་བར་གྱུར་བ་སོགས།། བྱིན་རླབས་ཐུགས་རྗེའི་འོད་ཀྱི་ཉག་ཐག་རེ་བས་གདུང་བའི་འགྲོ་རྣམས་ཕྱིར།། བདག་ཅག་སྐྱེ་རྒུའི་ཡབ་ཆེན་དམ་པར་གཏན་དུ་བཞུགས་པའི་དམ་བཅའ་མཛོད།། །

། རྒྱལ་ཀུན་གསང་གསུམ་འོད་ཀྱི་འཁོར་ལོ་གཅིག་ཏུ་འཛུམ་པའི་གོང་བུ་ལས།། མཁྱེན་དཔྱོད་ཟླ་དཀར་རླབས་ཀྱི་ཕྲེང་བ་སྐྱེ་དགུའི་ཕྲག་པར་འཛུམ་པའི་གཟི།། གསོ་བྱེད་སྨན་གྱི་ལྗོན་པས་མཛེས་པའི་དབེན་པའི་གནས་ཀྱི་རྩེར་འཕགས་ཏེ།། བཀའ་གསུང་བོན་གྱི་སྒོ་བརྒྱ་འབྱེད་མཁས་སྨྲ་སེང་བླ་མར་བརྟན་བཞུགས་གསོལ།།