ཞང་བོད་སྲིད་པའི་ཆ་ལག
རྩོམ་ཡིག་འདི་ཐེངས། 797 བཀླགས་འདུག
།
མི་ལོ་གཅིག་ཁྲི་འདས་པའི་སྔོན་རོལ་ཏུ།།
ཏི་སེའི་མདུན་ཞོལ་མུ་ཁྱུད་ཉེ་འགྲམ་ན།།
གར་ལྗང་མཁར་དུ་ནོར་བུ་སྤུངས་བརྩིག་བཞེངས།།
ཁྲི་ཝེར་གསེར་གྱི་རུ་ཅན་དེ་ན་བཞུགས།།
།སངས་རྒྱས་གཤེན་རབ་མི་བོའི་ཞབས་ལ་གཏུག།
ཁྲི་རྗེ་ལུང་བསྟན་མདོ་སོགས་ཐུགས་ལ་མནོས།།
ཞང་ཞུང་ཡུལ་དུ་བསྟན་པའི་ཉི་མ་དྲངས།།
བོན་སྲིད་ཟུང་གི་ལམ་བཟང་དེ་ནས་དར།།
།
ཕྱི་ཡི་ཕྱྭ་དང་གཡང་རྣམས་ཚུར་ལ་བླངས།།
ནང་གི་བདུད་དང་བགེགས་རིགས་ཕར་ལ་བསྒྲད།།
ཕུན་ཚོགས་སྡེ་བཞིའི་གཞི་མ་བརྟན་དུ་བཙུགས།།
སྒོ་ཕུགས་བར་གསུམ་སྲིད་པའི་རྩེ་མོར་ཕྱིན།།
།
དེ་བཞིན་རུ་ཅན་བཅོ་བརྒྱད་ལས་སོགས་པའི།།
ཞང་ཞུང་འབུམ་སྡེ་དུ་མར་དབང་བསྒྱུར་ཞིང་།།
གསས་ཆེན་ཧོས་ཀྱི་གདུང་ལས་གྲོལ་བའི་རིགས།།
ཞང་རྒྱལ་ཞེ་གཉིས་བར་དུ་གཤེན་ལ་བསྙེན།།
།
མདོ་སྔགས་བསྟན་པའི་ཉི་ཟླ་དགུང་ནས་འཛུམ།།
མཆོག་ཐུན་དངོས་གྲུབ་མེ་ཏོག་ས་ལ་བཞད།།
ཡུལ་མཆོག་རྒྱལ་བ་མཉེས་པའི་ཞིང་ཁམས་སུ།།
ཕུང་མེད་དབྱིངས་སུ་བསྡུས་པའི་ལོ་རྒྱུས་མང་།།
།
བྱ་རུ་ཐོབ་པའི་ཞང་རྒྱལ་བཅོ་བརྒྱད་དང་།།
སྤུ་རྒྱལ་ཐོགས་པའི་བཙན་པོ་ཞེ་གཉིས་སོགས།།
ཡ་གླིང་སྲིད་པའི་ཁ་ལོ་བསྒྱུར་ནུས་པའི།།
ཞང་བོད་རྒྱལ་རབས་རིམ་བྱོན་ད་དུང་དྲན།།
།
ཁྲི་བདུན་གནམ་ལ་གཤེགས་པའི་ཕྱིན་ཆད་ནས།།
གཤེན་བསྟན་ཉི་མ་སྦྲིན་གྱིས་སྒྲིབ་འགོ་ཚུགས།།
བདེན་དོན་ཤུགས་ཀྱིས་བསྐྱོད་པའི་རླུང་བུ་ཡིས།།
དྲི་མེད་གསེར་གྱི་དབང་པོ་འཆར་ཡང་འཆར།།
།
སྤུ་རྒྱལ་བཙན་པོ་རྣམས་ཀྱི་སྐུ་བསོད་ཀྱིས།།
སུམ་ཉིས་ས་ཡི་དཀྱིལ་འཁོར་བཟུང་མོད་ཀྱང་།།
དར་མ་དར་ལ་བབས་པའི་ཉིན་མོ་དེར།།
དགེ་སློང་ཆེན་པོ་སྲོག་གི་གཤེད་མར་གྱུར།།
།
དེ་ལྟར་གནའ་རབས་སྲིད་པའི་ལོ་རྒྱུས་ལ།།
རིས་མེད་ཕྲ་ཞིབ་རིག་པས་དཔྱད་གྱུར་ན།།
བདེན་པའི་གདོང་ལ་རྫུན་མའི་འབག་བཟོས་པ།།
ཆོས་ལྡན་བོད་ཀྱི་ཆོས་པའི་ནག་ཉེས་སོ།།
།
བདེན་པ་སྔོག་ན་མྱེས་པོར་ཡིད་ཆེས་དཀའ།།
རྫུན་པ་མཐུད་ན་དཔྱད་པའི་རིན་ཐང་ཉམ།།
ཁ་རོགས་བསྡད་ན་ཚོར་བས་ལང་ཚོ་ཤོར།།
གང་ལ་བསམ་ན་གཏམ་འདི་བཤད་བྱར་འོས།།
།
བདག་ནི་ལོ་རྒྱུས་སྨྲ་ལ་ཡི་རང་ཡོད།།
བདག་ནི་མཆོག་གསུམ་སྐྱབས་ལ་དད་འདུན་ཡོད།།
བདག་ནི་རིས་མེད་ལམ་ལ་འགྲོ་འདོད་ཡོད།།
བདག་ནི་བདེན་པའི་རྒྱབ་ན་གཟེང་ངེ་ཡོད།།
བསམ་ཚུལ་ཕྲིས།