ཀྲུང་དབྱང་གིས་མཉམ་སྡེབ་སློབ་སྦྱོང་སྐབས་ནན་གྱིས་བསྟན་དོན་ལྟར་མི་རིགས་སོ་སོའི་ཁྱད་ཆོས་དང་མཛེས་དཔྱོད་འབུར་དུ་ཐོན་པའི་གཟུགས་བརྙན་མངོན་གསལ་དོད་པོའི་ངང་སྤྱི་ཚོགས་ཀྱི་མིག་མདུན་དུ་གཏོད་རྒྱུར་དོ་སྣང་བྱེད་དགོས་པ་དང་། ལོ་རྒྱུས་ཀྱི་ནང་དོན་ཟབ་མོ་དང་། མི་རིགས་སོ་སོའི་སྣ་མང་ཤེས་བྱ་གཞི་གཅིག་སྦྲེལ་བ་དང་།
ཚན་རིག་གི་བདེན་དཔང་གསར་ཤོས་ལས་མངོན་པ་ལྟར་ན། ལོ་༡༨༠༠ ཙམ་གྱི་སྔ་རོལ་དུ་འཛམ་གླིང་ན་སྙན་གྲགས་འབར་བའི་དར་གོས་འགྲུལ་ལམ་དེ་ཕལ་ཆེར་གངས་ལྗོངས་ས་མཐོར་སྲིང་ཡོད་པ་དང་། དེས་རྒྱ་མཚོ་ངོས་ལས་མཐོ་ཚད་ལ་སྨི་ ༤༥༠༠ ཙམ་ཡོད་པའི་བོད་ལྗོངས་མངའ་རིས་ས་ཁུལ་དུ་ཇ་ལོ་སོགས་ཀྱི་དངོས་ཟོག་སྐྱེལ་ཡོད་པ་རེད།
རྒྱལ་སྤྱིའི་བོན་རིག་པའི་ཚོགས་ཆེན་གྱི་དམིགས་ཡུལ། / སྤྱིར་སངས་རྒྱས་གཡུང་དྲུང་བོན་གྱི་བསྟན་པ་རིན་པོ་ཆེའི་བྱུང་རབས་གནས་སྟངས་སྐོར་གྱི་ལོ་རྒྱུས་ཞིབ་འཇུག་གི་ལམ་ནས་དག་ཐེར་ངོ་སྤྲོད་དང་། སྒོས་སུ་དུས་རབས་ཀྱི་འགྲོས་དང་བསྟུན་པའི་སྒོ་ནས་འཛམ་བུ་གླིང་གི་ཆོས་ལུགས་ཁག་ལ་ཕན་ཚུན་མཐུན་ལམ་དང་འབྲེལ་ལམ་གོང་འཕེལ་ཡོང་བའི་རེ་བ་དང་། ཡང་སྒོས་སུ་བོན་གྱི་བསྟན་པ་འདི་ལ་སྔ་ཕྱི་བར་གསུམ་དུ་གང་ཟག་ཆེ་གེ་མོ་འགའ་ཞིག་ནས་ཆགས་སྡང་རུ་ཏྲའི་དབང་གིས་སྨ་འབེབས་དང་ཟུར་ཟ་ལོག་བཤད་འཁྱོག་བཤད་སོགས་བྱས་པའི་རྐྱེན་གྱིས་ཡང་དག་པའི་ལོ་རྒྱུས་སོགས་མི་ཤེས་པའི་སྐྱེ་བོ་མང་པོ་ཞིག་མགོ་བོ་རྨོངས་སུ་བཅུག་སྟེ་སངས་རྒྱས་གཡུང་དྲུང་བོན་གྱི་བསྟན་པ་འདི་ཉིད་ཡང་དག་པའི་ཆོས་ལུགས་ཞིག་མ་ཡིན་ཚུལ་དང་། ནང་པ་སངས་རྒྱ ས་པ་མ་རེད་ཟེར་བ་དང་། མུ་སྟེགས་པ་རེད་ཟེར་བ་དང་། བོན་ནག་དམར་མཆོད་འབུལ་མཁན་རེད་ཟེར་བ་སོགས་མདོར་ན་བོན་གྱི་རྒྱུད་གཞུང་དང་ལོ་རྒྱུས་སོགས་གང་ལ་མ་གསལ་བའི་བོན་དཀར་བོན་ནག་ཟེར་བ་དང་། འཁྱལ་བོན་གདོལ་བོན་བསྒྱུར་བོན་སོགས་ཆོས་ལུགས་ལོག་པ་ཅན་ཞིག་ཏུ་རློམ་པའི་གང་ཟག་རྣམས་ལ་བོན་ཆོས་ཇི་ལྟར་ཡིན་མིན་ངོ་སྤྲོད་དང་གསལ་བཤད་བྱ་རྒྱུའི་ཆེད་དང་། ཁྱད་པར་དུ་དུས་རབས་བདུན་པའི་ཡར་སྔོན་ལ་ཞང་བོད་ཀྱི་ལྗོངས་སུ་ས་སྐྱེས་རྡོ་སྐྱེས་སུ་བྱུང་བའི་ཞང་བོད་གཉིས་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། རྒྱལ་རབས་ལོ་རྒྱུས། ཡུལ་སྲོལ་གོམས་གཤིས། སྐད་དང་ཡི་གེ སྒྱུ་རྩལ་དང་རིག་གནས། འཚོ་བའི་གནས་སྟངས་སོགས་མཐའ་དག་བོན་རིག་པ་དང་འབྲེལ་བ་མ་ཆགས་པ་ཆེས་མེད་ཀྱང་། ད་བར་དེ་བཞིན་དུ་བློ་གཟུ་བོར་གནས་པའི་སྒོ་ནས་ཡིན་ལུགས་ཚུལ་བཞིན་བཤད་མཁན་དང་ཞིབ་འཇུག་གནང་མཁན་ཆེས་ཉུང་བ་མ་ཟད། བར་དེར་ཆོས་ལུགས་ཀྱི་འཐབ་རྩོད་ནི་དུས་རབས་ནས་དུས་རབས་ལོ་རབས་ནས་ལོ་རབས་སུ་རིམ་པར་བྱུང་བའི་རྐྱེན་གྱིས་བོད་གངས་ཅན་ལྗོངས་ཀྱི་མཁས་པའི་མཚན་ཅན་མང་དག་ཅིག་གིས་ཆོས་ལུགས་རུ་ཏྲའི་དབང་གིས་འཁྱོག་བཤད་དང་ལོག་བཤད་ཇི་སྙེད་ཅིག་ད་བར་ཁྱབ་སྤེལ་སོགས་བྱས་དང་བྱེད་མུས་རྣམས་ལ་ང་དང་ཁྱོད་ཟེར་ནས་རྒོལ་ལན་ཁ་ཕོད་ཀྱིས་དགག་རྩོད་སོགས་ཀྱིས་ཚིག་མཚོན་འདེབས་མི་དགོས་པར་ཡིན་ལུགས་ཇི་བཞིན་བདེན་པའི་ལམ་ནས་བོན་རིག་པའི་གནད་དོན་ཞིབ་འཇུག་མཐིལ་ཕྱིན་པ་ཞིག་རིས་སུ་མ་ཆད་པའི་ཆོས་རྒྱུད་ཁག་གི་སྐུ་ཚབ་མཁས་དབང་རྣམ་པ་དང་རྩོམ་པ་པོ་རྣམjཔས་བློ་གཟུ་བོར་གནས་པའི་སྒོ་ནས་དྲང་བཤད་ཀྱི་མཐའ་བསྡོམས་རྣམས་རྒྱལ་སྤྱིའི་གཟུར་གནས་མཁས་པའི་མདུན་སར་བགྲོ་གླེང་གི་ལམ་ནས་གྲུབ་ཐོ་ཚད་ལྡན་ཞིག་འཇོག་ཐུབ་པའི་རེ་འདུན་ཡོད། རྒྱལ་སྤྱིའི་བོན་རིག་པའི་ཚོགས་ཆེན་གྱི་དགོས་པ། དེ་ལྟར་དུས་རབས་རྙིང་པའི་སྐབས་སུ་ལྷ་སྒྲུང་དང་རྨོངས་དད་ཆགས་སྡང་དང་རུ་ཏྲ་སོགས་ཀྱི་དབང་གིས་དངོས་ཡོད་གནས་ཚུལ་གྱི་ལོ་རྒྱུས་བཤད་མཁན་ཆེས་དཀོན་པས་དེར་བརྟེན་ད་ལན་དུས་རབས་ཉེར་གཅིག་པའི་སྐབས་སུ་འཛམ་བུ་གླིང་འདིར་ཆོས་ལུགས་ཕན་ཚུན་དབར་ལ་མཐུན་ལམ་གོང་འཕེལ་འགྲོ་དང་འགྲོ་བཞིན་པ་མ་ཟད། ལྷག་པར་དུ་དུས་རབས་འདིར་མཁས་པ་ཕལ་མོ་ཆེས་དྲང་བདེན་གྱི་ལམ་ནས་གནའ་བོའི་ཆོས་རིག་གོམས་སྲོལ་སོགས་ལ་བློ་གཟུ་བོར་གནས་པའི་སྒོ་ནས་དཔྱད་བསྡུར་དང་ཞིབ་འཇུག་སོགས་བགྲོ་གླེང་གནང་རྒྱུར་དགྱེས་སྤྲོ་ཆེན་པོ་མཛད་པའི་དུས་ལ་བབ་པར་སོང་ཙང་། ༧ སྐྱབས་རྗེ་རྒྱལ་བ་སྨན་རི་བ་མཆོག་གིས་གནང་བའི་བཀའ་ཡིག དེར་བརྟེན་རྒྱལ་སྤྱིའི་བོན་རིག་པའི་བགྲོ་གླེང་ཚོགས་ཆེན་ཞེས་པ་འདི་བཞིན་ཚོགས་ཐུབ་ན་སྙམ་པའི་རེ་བ་སྙིང་བཅང་ཡོད་ཁར་དགེ་བཤེས་ཕུན་ཚོགས་ཉི་མ་མཆོག་ནས་གཤེན་བསྟན་གླེང་སར་འདི་བཞིན་བོན་གྱི་བགྲོ་གླེང་ཞིག་འཚོགས་ཐུབ་ན་དགེ་མཚན་ཆེ་བར་གསུངས་པ་ལ་བརྟེན་ནས་གཤེན་བསྟན་གླེང་སའི་སྐད་འཕྲིན་གྱི་དྲྭ་ཚོགས་སུ་ཡོད་པའི་གཡུང་དྲུང་བོན་གྱི་མཁས་དབང་བླ་སྤྲུལ་དགེ་བཤེས་རྣམ་པ་གཙོས་གཡུང་དྲུང་སྤུན་གྲོགས་ཚོས་རྒྱབ་སྐྱོར་དང་སྦྲགས་དེ་ལྟར་བོན་གྱི་བགྲོ་གླེང་ཆེན་མོ་ཞིག་འཚོགས་ཐུབ་ན་དགེ་མཚན་རྒྱ་ཆེན་པོ་ཡོང་རེའི་དགོངས་འཆར་མང་པོ་བྱུང་བར་བརྒྱུད། སྤུ་རྒྱལ་བ་དགེ་བཤེས་ཉི་མ་རྒྱལ་མཚན་མཆོག་གིས༼བོན་བགྲོ་གླེང་༽ཞེས་པའི་སྐད་འཕྲིན་གྱི་དྲྭ་ཚིགས་གསར་པ་ཞིག་སྒོ་འབྱེད་ཞུས་པ་དང་སྦྲགས་གཡུང་དྲུང་བོན་གྱི་བླ་སྤྲུལ་དགེ་བཤེས་མཁས་དབང་གཙོས་བོད་ཕྱི་ནང་གཉིས་ནས་བོན་གྱི་གནད་ཡོད་ཀྱི་མི་སྣ་མང་དག་ཅིག་གདན་ཞུས་མཉམ་ཞུགས་ཐོག་རྒྱལ་སྤྱིའི་བོན་བགྲོ་གླེང་ཚོགས་ཆེན་ཞིག་འཚོགས་ཐུབ་པར་རེ་བ་དང་ཡིད་ཆེས་ཀྱི་སྒོ་ནས་ཐག་གཅོད་བྱས་ཏེ་དྲྭ་ཚོགས་སུ་འཆར་གཞི་དང་ཆ་རྐྱེན་སོགས་ཀྱི་སྐོར་ལ་དགོངས་སྐོར་དང་བཀའ་སློབ་ལམ་སྟོན་བཅས་ཀྱི་བགྲོ་གླེང་ལྷུག་པོར་གནང་བར་ཀུན་གྱིས་རྒྱབ་སྐྱོར་དང་བསྔགས་བརྗོད་གནང་བ་མ་ཟད་དྲྭ་ཐོག་ནས་མང་མོས་ཐོག་མཐའ་དོན་ཐག་གཅོད་བྱུང་དོན་གཤམ་གསལ། ཐེངས་དང་པོའི་རྒྱལ་སྤྱིའི་བོན་རིག་པའི་བགྲོ་གླེང་ཚོགས་ཆེན་འདི་བཞིན་འཚོགས་ཡུལ་བལ་ཡུལ་གྱི་རྒྱལ་ས་ཀཋ་མན་གྲུ་ལ་འཚོགས་རྒྱུར་གཏན་འབེབས་ཟིན་ནས་ཚོགས་ཡུལ་དང་བསྟུན་པའི་སྒོ་ནས་རྒྱལ་སྤྱིའི་བོན་རིག་པའི་བགྲོ་གླེང་ཚོགས་ཆེན་གྱི་གོ་སྒྲིག་གནང་མཁན་ནམ་རྒྱུན་ལས་མི་དགུ་འོས་བསྡུའི་ལམ་ནས་གཏན་འབེབས་གནང་ཐུབ་པར་བྱུང་ཡོད། དེ་ཡང་འོས་ཐོབ་རྒྱུན་ལས་རྣམས་སྤྱི་ལོ་༢༠༡༥ཟླ་༣ཚེས་༤ཉིན་དངོས་སུ་ཚོགས་འདུ་ཚོགས་ཏེ་ཚོགས་པའི་མིང་དང་ལས་རྟགས་ལས་ཐམ་ཚོགས་སྟངས་སོགས་གཏན་འབེབས་བྱས། རྒྱུན་ལས་ཀྱི་ལས་གནས་སོ་སོར་བསྐོ་བཞག་ཟིན་ནས་ཕྱི་ཉིན་རྒྱུན་ལས་རྣམས་ནས་༧སྐྱབས་རྗེ་རྒྱལ་བ་སྨན་རི་བའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག་ལ་མཇལ་བཅར་གྱིས་རྒྱལ་སྤྱིའི་བོན་རིག་པའི་བགྲོ་གླེང་ཚོགས་ཆེན་གྱི་དམིགས་ཡུལ་དང་འཆར་གཞི་རྣམས་སྙན་སྒྲོན་ཞུས་པར་༧སྐྱབས་རྗེ་ཡོངས་འཛིན་རིན་པོ་ཆེ་མཆོག་ནས་དགྱེས་ཚོར་ཆེན་པོའི་སྒོ་ནས་ཚོགས་ཆེན་གྱི་བརྗོད་གཞིའི་སྐོར་སོགས་ལ་བཀའ་སློབ་ལམ་སྟོན་བཀའ་དྲིན་ཟབ་མོ་ཐོབ་པ་བྱུང་། / སྤྱི་ལོ་༢༠༡༥ཟླ་༣ཚེས་༡༣ཉིན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་ལ་ཚོགས་གཙོ་དང་ཚོགས་གཞོན་དྲུང་ཆེ་གསུམ་ཆེད་བཅར་གྱིས་མཇལ་ཁ་ཞུས་ཏེ་རྒྱལ་སྤྱིའི་བོན་རིག་པའི་བགྲོ་གླེང་ཚོགས་ཆེན་གྱི་དམིགས་ཡུལ་དང་འཆར་གཞི་སོགས་སྙན་སྒྲོན་ཞུས་པར་བསྔགས་བརྗོད་དང་སྦྲགས་བཀའ་སློབ་ལམ་སྟོན་བཀའ་དྲིན་ཟབ་མོ་ཐོབ་པ་མ་ཟད། ༧ སྐྱབས་རྗེ་ཡོངས་འཛིན་རིན་པོ་ཆེ་མཆོག་གིས་གནང་བའི་བཀའ་ཡིག ༧སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་ནས་རྒྱལ་སྤྱིའི་བོན་རིག་པའི་བགྲོ་གླེང་ཚོགས་ཆེན་འདི་ལ་རྒྱབ་སྐྱོར་དང་མཐུན་འབྱོར་རོགས་རམ་དགོས་པའི་བཀའ་ཡིག་ས་རྟགས་དང་བཅས་པ་ཚོགས་པར་བཀའ་དྲིན་སྐྱབས་འཇུག་གནང་བ་ཟུར་གསལ་ལྟར་ལགས་པས་དེ་དོན་བོན་ལུགས་འཛིན་པ་གཙོས་ཀུན་གྱིས་བཀའ་གསུང་གྱེན་ལྡོག་མེད་པར་རྒྱབ་སྐྱོར་དང་རོགས་རམ་ཅི་ནས་ཀྱང་ཡོང་བའི་ཡིད་ཆེས་ཡོད་ཞུ། རྒྱལ་སྤྱིའི་བོན་རིག་པའི་བགྲོ་གླེང་ཚོགས་ཆེན་གྱི་ལས་རིམ་གྱི་སྐོར། བརྗོད་གཞི་ཁག་གཤམ་གསལ། ༡༽སྟོན་པ་གཤེན་རབ་མཛད་རྣམ་སྐོར། ༢༽ཞང་ཞུང་རྒྱལ་རབས་སྐོར། ༣༽ཞང་ཞུང་ཤེས་རིག་སྐོར། ༤༽ཞང་ཞུང་གི་ས་ཁྱོན་སྐོར། ༥༽ བོན་གྱི་ཐེག་དགུའི་སྐོར། ༦༽བོན་གྱི་རྫོགས་ཆེན་བྱུང་རིམ་སྐོར། …
སྨན་རིའི་དགེ་བཤེས་གསོ་བྱེད་རིན་ཆེན་བསྟན་འཛིན་ལགས་ནས་ཨུ་རུ་སུ་ཡི་གྲོང་ཁྱེར་ཨང་གཉིས་པ་སང་སི་པིས་ཊ་སི་སྦུར་གི་ཟེར་བའི་ཉེ་འདབས་མཐའ་ཡི་རྒྱ་མཚོའི་འགྲམ་དུ་གཡུང་དྲུང་བོན་གྱི་དགོན་པ་གསང་སྔགས་གཡུང་དྲུང་བདུད་འདུལ་གླིང་དང་གསོ་རིག་འབུམ་བཞིའི་སློབ་གྲྭ་ཞང་བོད་གསོ་རིག་བདེ་ཕན་སློབ་གླིང་བཅས་གསར་བསྐྲུན་གནང་བའི་བརྒྱུད་རིམ་དང་དེའི་གནས་ཚུལ་མདོར་བསྡུས། །
གཡུང་དྲུང་བོན་གྱི་ཐུན་མིན་ཐ་སྙད་རིགས་རྒྱའི་སྐད་ཡིག་ཏུ་བསྒྱུར་བའི་ཚོགས་ཆུང་འདི་ད་ལོ་བར་ཐེངས་དྲུག་ལ་འཚོགས་ཤིང་། ཚོགས་ཐེངས་གསུམ་པ་ནས་བཟུང་«གཡུང་དྲུང་བོན་མཉམ་འབྲེལ་ལྷན་ཚོགས»ཀྱིས་སྤྱིའི་བཀོད་སྒྲིག་འོག་ལོ་ལྟར་འདི་བཞིན་འཚོགས་རྒྱུར་གཏན་འཁེལ་གནང་། ད་ལོ་ཡང་གཡུང་དྲུང་བོན་མཉམ་འབྲེལ་ལྷན་ཚོགས་ཀྱི་ཚོགས་གཞོན་མཁན་ཤེས་རབ་གཡུང་དྲུང་དབང་རྒྱལ་དང་། གཡུང་དྲུང་བོན་མཉམ་འབྲེལ་ལྷན་ཚོགས་ཀྱི་ཚོགས་གཞོན་ཉག་སྤྲུལ་བསོད་ནམས་རྒྱ་མཚོ་ལགས་རྣམ་པ་གཉིས་ཀྱིས་དབུ་ཁྲིད་འོག་སྤྱི་ལོ་ ༢༠༡༥ ལོའི་ཟླ་ ༡༢ པའི་ཚེས་ ༢༥ ནས་ཚེས ༢༩ བར་ཉིན་ལྔའི་རིང་སི་ཁྲོན་ཁྲིན་ཏུའུའི་གྲོང་ཁྱེར་དུ་«བོན་གྱི་ཐ་སྙད་རྒྱ་ཡིག་ཐོག་ཕབ་བསྒྱུར་གཏན་འབེབས་གྲོས་ཚོགས»ཐེངས་དྲུག་པ་དངོས་སུ་འཚོགས་ཡོད། མཁྱེན་གསལ་ལྟར་ད་ལྟའི་དུས་རབས་འདི་དང་། ཡང་ན་དེང་སང་གི་སྤྱི་ཚོགས་འདི་ལ་རྒྱལ་བསྟན་རིན་པོ་ཆེ་བརྗོད་བྱ་གཙོ་བོ་ཡིན་པའི་ཞང་བོད་ཀྱི་རིག་གནས་གང་ཞིག་འཛམ་བུ་གླིང་གི་མི་རིགས་ཀུན་གྱིས་ལོངས་སུ་སྤྱོད་དགོས་ན་མི་རིགས་གཞན་པའི་སྐད་ཡིག་བེད་སྤྱད་དེ་འགྲེལ་སྤེལ་བྱས་ན་སྟབས་བདེ་ཞིང་ཁྱབ་རྒྱ་ཡང་ཤིན་ཏུ་ཆེན་པོ་ཡིན་པར་བཤད་མ་དགོས་ལ། དེ་ལས་ཀྱང་རྒྱ་ཡིག་དང་དབྱིན་ཡིག་ལྟ་བུའི་ལམ་ནས་རང་བསྟན་འདི་མི་རིགས་དེ་དག་ལ་ངོ་སྤྲོད་ཅིག་བྱ་ཐུབ་ན་དགེ་མཚན་ཆེ་ལ་གནས་ལུགས་དང་མཐུན་པ་ཞིག་ཡིན་པའི་མ་ཚད། སྐད་རིགས་དེ་དག་གི་ལམ་ནས་འགྲེམས་སྤེལ་ཁྱབ་བསྒྲགས་ཞུ་བར་ངེས་པར་དུ་མ་མཐའི་ཆ་རྐྱེན་ཨང་དང་པོ་ནི་རང་གཞུང་དང་རང་གི་རིག་གནས་གང་ཡིན་ཡང་དེའི་ཐ་སྙད་མི་རིགས་སུ་དང་གང་གི་སྐད་ཡིག་ཐོག་ཏུ་བཀོད་ཚེ་གཅིག་གྱུར་གྱི་ཐ་སྙད་ཅིག་ཡོད་དགོས་པ་དང་། གལ་ཏེ་བོན་གྱི་ཐ་སྙད་གང་ཞིག་གཅིག་གྱུར་གྱི་ལམ་ནས་འབྲི་ཚུལ་གྱི་ལམ་ཁ་བརྟན་འཇགས་ཤིག་བཟོ་མ་ཐུབ་པར་རང་རང་སོ་སོའི་ཞལ་ལ་གང་ཡོང་དང་། སེམས་ལ་གང་དྲན་ལྟ་བུའི་ལམ་ནས་བོན་གྱི་ཐ་སྙད་མང་པོ་མི་རིགས་གཞན་གྱི་སྐད་ཡིག་ཐོག་ཏུ་ཕབ་བསྒྱུར་གནང་ན་ཕན་པ་ལས་གནོད་པ་ཆེ་བ་དང་། དགེ་མཚན་ལས་ཞན་ཆ་ཆེ་བ་སོགས་ཀྱི་རྒྱུ་རྐྱེན་མང་པོ་ཞིག་གིས་རྐྱེན་བྱས་ཏེ་འདི་འདྲའི་སྒྲིག་འཛུགས་ཞིག་གསར་དུ་བཙུགས་ཤིང་། ད་ཆར་བོད་མདོ་དབུས་ཁམས་གསུམ་ནས་ཕེབས་པའི་བོན་གྱི་བླ་སྤྲུལ་སོགས་ལོ་ཙཱ་བ་མང་པོ་ཞིག་མཉམ་དུ་བསྡུས་ཏེ་ད་ཕན་བོན་གྱི་ཐ་སྙད་དང་འདོན་ཆོག་སྐོར་མང་ཙམ་ཞིག་རྒྱའི་སྐད་ཡིག་ཐོག་ཏུ་ཕབ་བསྒྱུར་བྱས་དང་བྱེད་ཀྱིན་ཡོད་པའི་གྲུབ་འབྲས་གཡུར་དུ་ཟ་བ་ཞིག་སྨིན་ཡོད་པ་བཤད་མ་དགོས་པ་ཟུར་བལྟས་ལེབ་མཐོང་ཞིག་དང་། བསྟན་མི་དགོས་པར་མཐོང་དུ་ཡོད་པ་ཞིག་ཀྱང་ཡིན་པ་དང་། བོན་ལ་ཤ་ཞེན་ཆེ་ཞིང་རྒྱལ་གཤེན་གྱི་བསྟན་པ་རིན་པོ་ཆེར་བརྩི་བཀུར་མཐོ་བའི་བོན་གྱི་ཤེས་ལྡན་མི་སྣ་མང་པོས་ལོ་ལྟར་འདི་འདྲའི་རླབས་ཆེན་གྱི་ཚོགས་འདུའི་རྒྱུན་མུ་མཐུད་ནས་བསྐྱངས་དང་སྐྱོང་བཞིན་ཡོད་པའི་གནས་ཚུལ་ཐུང་ངུ་འདི་སྐད་སྒྱུར་ཚོགས་པས་ཧི་མ་ལ་ཡའི་བོན་དྲ་བ་རུ་བཀོད་པ་ལས་ཅུང་མདོ་རུ་བསྡུས་པ་ཞིག་འདིར་བཀོད་པའོ། །