། མི་ལོ་གཅིག་ཁྲི་འདས་པའི་སྔོན་རོལ་ཏུ།། ཏི་སེའི་མདུན་ཞོལ་མུ་ཁྱུད་ཉེ་འགྲམ་ན།། གར་ལྗང་མཁར་དུ་ནོར་བུ་སྤུངས་བརྩིག་བཞེངས།། ཁྲི་ཝེར་གསེར་གྱི་རུ་ཅན་དེ་ན་བཞུགས།།  

མ་གཞི་བོད་ཀྱི་ཆོས་སྲིད་རིག་གནས་ཀྱི་ཐད་ནས་སྐད་ཆ་ཐག་ཆོད་པོ་ཞིག་དང་། རྨང་གཞི་བརྟན་པོ་ཞིག་གླེང་རྒྱུ་ནི་ཆེས་ཁག་པོ་ཞིག་ཏུ་ཆགས་འདུག རྒྱུ་མཚན་བོད་ཀྱི་སྲིད་ལུགས་དང་འབྲེལ་བའི་ཆོས་ལུགས་པ་དག་གིས་རང་གཅེས་གཞན་སྨད་ཀྱི་སྐད་ཆ་གླེང་རྒྱུ་མང་དྲགས་པས། འུ་ཅག་ཕྱི་རབས་པ་དག་ལ་མཚོན་ན་ལོ་རྒྱུས་དང་ལོ་རྒྱུས་མ་ཡིན་པའི་བར་གསེང་ནས་མགོ་བོ་ཉོག་ཏུ་གཏོང་བཞིན་པ་དེ་རེད། དེ་བས་ཁོ་བོས་དེ་དག་ལ་འདི་ལྟར་གླེང་མྱོང་སྟེ། རང་བསྟན་གཅེས་པར་བཟུང་བའི་བཀའ་དྲིན་ཅན།། བདེན་དོན་ལོགས་སུ་བསྐྱུར་བའི་ནག་ཉེས་ཅན།། ཁྱེད་ཚོས་རྒྱལ་ཕམ་རྩོད་པའི་བར་གསེང་ནས།། མི་རིགས་ལོ་རྒྱུས་གཙང་མ་གླེང་ཐབས་བྲལ།། ཞེས་ཀྱང་སྨྲས་པའོ།།