།།ཡེ་ནས་དག་པའི་ཤེལ་དཀར་ལྷུན་པོ་འདི།། དགུང་ལ་ཟུག་པའི་སྲིད་པའི་དབུ་རྨོག་ཡིན།། ཞོལ་ནས་བབས་པའི་ཆབ་རྒྱུན་རིང་མོ་དེ།། སྐྱེ་རྒུའི་སྐོམ་གདུང་སེལ་བའི་ཡོན་ཆབ་ཡིན།། ། ལྟོ་ནས་བལྟམས་པའི་གཡུང་དྲུང་འཁྱེར་བ་དེ།། རིམ་དགུའི་སྤོ་ནས་འགྱིང་བའི་མྱི་ཆེན་ཡིན།། ཆབ་དཀར་ཆབ་ནག་བཤོས་པའི་རྒྱུད་པ་དེ།། རིགས་ཀྱི་དམུ་ཐག་འཛིན་པའི་དཔའ་བོ་ཡིན།། ། མཐའ་ནས་གུས་པའི་སོ་སྐྱེས་ཕལ་པ་དེ།། ཁྱེད་ཀྱི་ཞིང་ཁམས་འཚོལ་བའི་གནས་མཇལ་ཡིན།། སོར་བཅུ་ཟུམ་པའི་མཐའ་བཞིའི་མགྲོན་པོ་དེ།། སུམ་ཅུ་རྩ་གསུམ་ཉུལ་བའི་རྐང་ཐང་ཡིན།། ། མདངས་ལ་འཁུ་བའི་གླིང་ལྔའི་གསང་ཉུལ་དེ།། འོད་ཀྱི་ཟིལ་པའི་ཀློང་གི་མེལ་ཚེ་ཡིན།། སྔར་ནས་བོར་བའི་སྤུངས་སོའི་བརྡ་ཆད་དེ།། སྐལ་པའི་ཆོ་རབས་གླེང་བའི་སྨྲ་སྒོ་ཡིན།། ། རྫིང་ནས་བརྡོལ་བའི་ཡོན་ཆབ་དྭངས་མོ་དེ།། མཐའ་བཞིར་རིག་གཞུང་སྐྱེལ་བའི་བང་མི་ཡིན།། གངས་མཚོ་གཡའ་ཡི་འཇིག་རྟེན་མཚར་པོ་དེ།། སྲིད་པའི་འབེལ་གཏམ་འཆད་སའི་དག་ཞིང་ཡིན།། ། བྲག་ལ་གབ་པའི་གླེགས་བམ་རལ་པོ་དེ།། མེས་པོའི་རྐང་རྗེས་འཚོལ་བའི་ར་མདའ་ཡིན།། དུར་གྱི་གཏིང་ན་ལུས་པའི་གཟི་རིགས་དེ།། ལག་རྗེས་གངས་ལ་བཞག་པའི་དཔང་རྟགས་ཡིན།། ། གླིང་གཞིར་བརྡུངས་བའི་གྱི་ལིང་རྨིག་སྒྲ་དེ།། སྲིན་པོ་གདོང་ཚོས་ཅན་གྱི་རོལ་ཆ་ཡིན།། ཕྱོགས་ལ་བཏབ་པའི་དཔའ་བོའི་ཀྭི་བསྭོ་དེ།། སྡང་དགྲ་གློ་སྙིང་གཏོར་བའི་མན་ངག་ཡིན།། ། སྲིད་པའི་གཙུག་ཏུ་ལྡིང་བའི་ཤེལ་དཀར་དེ།། མེས་པོ་གཡུ་རལ་ཅན་གྱི་བླ་རི་ཡིན།། རུ་ཐུར་གནམ་ལ་ཀེར་བའི་འབྲོང་རྒོད་དེ།། ཕ་མེས་སྙིང་སྟོབས་ཅན་གྱི་རུ་མཚོན་ཡིན།། །                     …

ངའི་རེ་བའི་དགའ་སྐྱིད་ཀྱི་དགོད་སྒྲ་དེའི་སླད་དུ། ཁྱོད་ཀྱིས་སྒུག་པའི་དྲོད་ཁོལ་གྱི་ལྷན་འཛོམས་དེའི་ཕྱིར་དུ། ས་དོག་མོར་རེ་བའི་ཞགས་པ་འཕངས་ཤིང་། གནམ་སྔོན་པོར་མགྲོན་གྱི་སྡེར་ཁ་སྒྲིག་དུས། ཁྱེད་རང་སུ་ཞིག་གི་གཡོ་འོག་དུ་ཚུད་སོང་བ་ཡིན་ནམ། དགུན་གཞུང་དེར། ངའི་སེམས་པ་འཁྱག་པས་བསྡམས་སོང་། ། ནམ་རྒྱུན། ཁྱེད་རང་ངའི་དགའ་སྐྱིད་ཀྱི་གུར་ཁང་ལ་ཉུལ་རྒྱུར་ལོབས་ཡོད་ལ། ང་རང་ཁྱེད་ཀྱི་དགོད་སྒྲ་ཡི་ཞིང་ཁམས་སུ་འཁྱམ་རྒྱུར་གོམས་སོང་། དེ་རིང་། ངས་ཤེས་སོང་བ་ནི། ཁྱེད་རང་ངའི་རྨི་ལམ་དུ་འཛུལ་ནས་རྨི་ལམ་ལས་ཤོར་སོང་བས་རྐྱེན་གྱིས། ཁྱེད་ཀྱིས་ངའི་གསང་བ་མང་པོ་བརྐུས་སོང་ལ། གཏམ་རྒྱུད་མང་པོ་བཏུས་སོང་། དགུན་གཞུང་དེར། ངའི་སེམས་པ་འཁྱག་པས་བསྡམས་སོང་། ། ཁྱེད་བཞུད་ཤུལ་དུ། ངའི་མི་ཚེ་ལ་ཁ་ཕྱོགས་མེད་ཅིང་དགོད་སྒྲ་དང་འཛུམ་མདངས་དབེན། ཁྱེད་བཞུད་ཤུལ་དུ། ངའི་འཚོ་བ་ལ་ཁ་དོག་མེད་ཅིང་ཕུགས་བསམ་གྱི་ཁ་ཕྱོགས་བོར། དགུན་གཞུང་དེར། ངའི་སེམས་པ་འཁྱག་པས་བསྡམས་སོང་། ། ད་རེས། གཞུང་རྒྱུད་དྲང་བའི་ཁྱེད་ཀྱི་ཚེ་སྲོག་ལ་འཆི་བདག་རྒྱལ་པོའི་དུག་མདའ་ཕོགས་སོང་། ཨུ་ཚུགས་ཆེ་བའི་ཁྱེད་ཀྱི་ཕུགས་བསམ་ལ་གས་ཁ་ཤོར་སོང་། དགུན་གཞུང་དེར། ངའི་སེམས་པ་འཁྱག་པའི་བསྡམས་སོང་། ། ལོ་ངོ་མང་པོའི་རིང་ལ། ཁྱེད་ཀྱིས་ང་ལ་བལྟས་ཤིང་ངས་ཁྱོད་ལ་ཉན་ནས་ཡོང་། ཁྱོས་ང་བསམ་ཞིང་ངས་ཁྱེད་རང་དྲན་གྱིན་ཡོང་། ངས་ཁྱེད་རང་བཤད་ཅིང་ཁྱོས་ང་རང་དཔྱད་ཀྱིན་ཡོང་། ཁ་སང་། ང་ཁྱེད་ཀྱི་ཉན་ལམ་ན་ཡོད་ཅིང་ཁྱེད་ང་ཡི་ངག་སྒོ་ན་ཡོད་དུས། ཁྱེད་རང་བཞུད་སོང་། དགུན་གཞུང་དེར། ངའི་སེམས་པ་འཁྱག་པས་བསྡམས་སོང་།  

ངའི་མིང་ལ་སྤྲུལ་སྐུ་ཆོས་དབྱིངས་ཡེ་ཤེས་སམ་ཀླུ་སྨྱོན་ལབ་ཀི་ཡོད། རིས་མེད་ཆོས་བརྒྱུད་ཚོགས་པའི་ཚོགས་གཙོ་ས་སྐྱའི་མཁན་པོ་བྱམས་པ་དང་ངེད་གཉིས་ཡུན་རིང་པོར་གཤིབས་པའི་ཆོས་གྲོགས་དམ་གཙང་དེ་འདྲ་ཞིག་ཡིན། ད་རེས་ཁོང་གིས་རྩོམ་པ་པོ་ཞིག་གིས་ཆོས་བརྒྱུད་རིས་མེད་ལ་མཐོང་ཚུལ་སྐོར་སྐད་ཆ་འདྲ་བཤད་ན་ཞེས་གསུངས་སོང་།