གདོད་ནས་སྲིད་པའི་ལྷ་རི་དཀར་པོ།། ཡེ་ནས་ཀ་དག་ལྷུན་འགྲུབ་རང་བཞིན།། སྲིད་ནས་གངས་རྒན་ཞྭ་དཀར་ཅན་པོ།། གྲུབ་ནས་གདོད་མའི་བླ་རི་བཙན་པོ།། དམུ་ཐག་འོད་ཀྱི་ཐིག་ལེ་དྲངས་པ།། དབུ་རྨོག་དགུང་གི་ན་བུན་དཀྲིས་པ།། བརྒྱད་ཅུའི་གོས་དཀར་རྟག་ཏུ་ཀླུབ་པ།། སྲིད་པའི་གངས་རྒན་འོད་པོ་ཆེན་མོ།། ས་སྒང་ཟླུམ་པོའི་ཏོག་ཏུ་བརྗིད་པ།། ཧི་མ་ལ་ཡའི་རུས་རྒྱུད་གཅིག་པ།། ཆུ་ཆེན་བཞི་ཡི་ཕུག་པའི་ཕུག་པ།། རིན་ཐང་བྲལ་བའི་ཤེལ་གྱི་ལྷུན་པོ།། ཞང་ཞུང་རྒྱལ་གྱི་བླ་རི་གངས་དཀར།། གདོང་དམར་བོད་ཀྱི་དགྲ་ལྷ་ཝེར་མ།། མ་ཕམ་གཡུ་མཚོའི་སྟག་ཤར་གཞོན་པ།། ལྷོ་རྒྱལ་འཛམ་བུའི་ལྟེ་བ་དཀར་པོ།། རིག་འཛིན་གོང་མའི་མི་ཤིགས་གསས་མཁར།། ལམ་པ་འཕགས་པའི་གཡུང་དྲུང་དགུ་ཟམ།། ཁམས་གསུམ་སོ་སྐྱེའི་ཕྱག་སྐོར་སྒྲུབ་གནས།། གྲུབ་མཐའ་ཀུན་གྱི་རིས་མེད་གནས་མཆོག། ‭ ཞང་ཞུང་བགྲེས་པོའི་སྨར་ཡིག་ཆེ་ཆུང་།། སྒང་པ་ཚང་གི་སྤུངས་སོ་བརྡ་ཆད།། ཕྱྭ་གཤེན་པ་ཡི་མོ་རྩིས་གཏོ་དཔྱད།། ཐེག་དགུ་འདེགས་མཁན་སྲིད་པའི་གངས་རྒན།། ལྷ་ཆེན་ཚང་གི་དབང་ཕྱུག་ཆེན་པོ།། ཀླུ་རྒྱལ་གཙུག་ནའི་དབྱིག་གི་བང་མཛོད།། ཡེ་སྲིད་བོན་གྱི་བསྐལ་པའི་ཆོ་རབས།། སྲིད་པའི་བླ་རི་གངས་དཀར་ཏི་སེ།། ༢༠༡༨/༤/༢༥/ཉིན།