རྒྱལ་གཤེན་བོན་སྒྲའི་རྩོམ་སྒྲིག་པ་རྣམས་ཀྱིས་༧སྐྱབས་རྗེ་ཡོངས་འཛིན་མཆོག་གི་བརྒྱ་སྟོན་ལ་ཕུལ་བའི་མཉམ་བྲིས་སྙན་རྩོམ།
རྩོམ་ཡིག་འདི་ཐེངས། 565 བཀླགས་འདུག
།
།
ས་ཆེན་བརྗིད་ཀྱིས་གནོན་པའི་གསེར་གྱི་ལྷུན་པོ།
-སྨྲ་སེང་མི་ཡི་རྣམ་རོལ་༧སྨྲ་དབང་ཡོངས་འཛིན་ཆེན་པོ་ཆེའི་བརྒྱ་སྟོན་དུ་ཕུལ་བ།
བྱ་འཕུར་དགེ་བཤེས་ལྷུན་གྲུབ་རྒྱ་མཚོ།
།
རྒོད་པོ་ཁྱུང་གིས་གནམ་འཕང་བཅད་ཅིང་བློ་རིག་གཟི་མོ་དགོངས་ནས་གཏད།།
རྒྱལ་ཁམས་བྱེ་བའི་གཙུག་གི་འཕང་བར་ཁྱུང་ཕྲུག་འཚོ་བའི་ཚང་ཞིག་བཙལ།།
འོད་གསལ་གནམ་གྱི་བྲང་ནས་མཆེད་པའི་དཀར་པོ་དངུལ་གྱི་ཐིག་ལེའི་འོད།།
སྲིད་པའི་གངས་རི་གྱེན་དུ་འགྲེང་བའི་རི་ལུང་སྨུག་པོའི་གཞུང་དེར་འཕོས།།
།
པན་གྲུབ་མཁས་མང་གསེར་གྱི་འཕྲེང་བ་རིམ་པར་བྱོན་པའི་ཞིང་ཁམས་དེར།།
སྐུ་མཆོག་མཚན་དཔེའི་མེ་ཏོག་ཟླུམ་པོ་རྒྱལ་བསྟན་མཛེས་པའི་རྒྱན་དུ་བཞད།།
རྒྱལ་གཤེན་སྟོན་པའི་བསྟན་པའི་དབུ་རྩེ་གནམ་དུ་འདེགས་པའི་ཀ་བར་གྱུར།།
གསེར་གྱིས་བྱུག་པའི་བགྲང་བྱའི་འཕྲེང་རྡོག་བརྒྱ་ལ་ཕེབ་པར་རྟེན་འབྲེལ་ཞུ།།
།
སེར་པོ་གསེར་གྱི་བགྲང་བྱའི་འཁོར་ལོ་རིམ་པས་བགྲོད་པའི་བཞུད་ལམ་དེར།།
ཕྱི་མིག་ཐང་གཅིག་ཡུད་ཀྱིས་འཕང་ཞིང་ཀྱག་ཀྱོག་མང་བའི་ལོ་ཟླའི་ངོགས།།
མཛད་རྗེས་རི་མོ་གསེར་གྱིས་སྤྲས་པར་ཚིགས་སུ་བཅད་པའི་འགྱུར་ཁུག་ཅིག།
དད་འདུན་པད་དཀར་འདབ་མའི་ཀློང་ནས་བརྒྱ་སྟོན་བསུ་བའི་མཆོད་པར་སྤྲོ།།
།
གསོ་བྱེད་སྨན་གྱི་རི་བོའི་ནགས་ཚལ་ཚང་ཚིང་འཁྲིགས་པའི་གནས་མཆོག་ཏུ།།
གྲྭ་རྐྱང་ཞིག་གི་འཚོ་བའི་ལམ་ནས་གདན་སའི་སྒྲིག་སྒོར་ཞུགས་མཛད་ནས།།
འཆད་རྩོད་རྩོམ་གྱི་འཁོར་ལོ་བསྐོར་ཞིང་དཔོན་སློབ་མཚན་སྙན་སྤྱི་བོར་ཕུལ།།
སྐུ་ཚེགས་སྣ་ཚོགས་འཕྲག་ཏུ་མྱོང་བཞིན་བསྟན་འགྲོའི་ཁུར་ཆེན་རྒྱབ་ཏུ་བཞེས།།
།
དུས་ཀྱི་འཁོར་ལོའི་དཀྱོག་མཚམས་ཞིག་གིས་གངས་རིའི་རྩེ་མོ་ཐང་དུ་སྒྱེལ།།
རྣམ་ཤེས་སྟོང་གི་ཆོ་ངེའི་དབྱངས་ཀྱིས་འཇག་མའི་རྩྭ་ཕུང་སྒུལ་བའི་སྐབས།།
ལ་རྒྱའི་བྲང་གཞོང་ཕྱག་གིས་རྡུང་བཞིན་བོན་པོ་ཚང་གི་བསྟན་འགྲོ་ཞེས།།
སྐུ་སྲོག་ལས་ཀྱང་གཅེས་པར་བཟུང་ཞིང་འཁྱམ་པོ་སྟོང་གི་ལམ་སྣེ་མཛད།།
།
དབྱིན་ཇི་རྒྱལ་པོའི་མངའ་ཁུལ་ཅིག་ཏུ་འཚོ་བའི་སྣུམ་ཐིགས་མི་འབྲལ་བར།།
རང་དོན་འཕྲིན་ལས་མེ་ལྕེའི་ཕུང་བོ་དགུང་ལ་མཆེད་པའི་སྐབས་བྱུང་ཡང་།།
བོན་པོ་ཚང་གི་བསྟན་དང་འགྲོ་རྣམས་བརྩེ་ཆེན་ལྕགས་ཀྱུས་མ་བཏང་བར།།
མ་ཡིས་བུ་ལ་བསྐྱངས་པ་ལྟ་བུའི་བཀའ་དྲིན་གཞལ་མཐའ་བྲལ་བ་མཛད།།
།
བསྟན་པའི་མེ་རོ་རྨིང་ནས་གསོ་བར་མེས་པོའི་གསུང་རབ་དཔར་བསྐྲུན་མཛད།།
འབངས་ཀྱི་སྐྱིད་སྡུག་མཉམ་དུ་རོལ་བར་གཞིས་ཁྱིམ་དྲན་མོ་གསར་རྒྱག་གནང་།།
བཤད་སྒྲུབ་བསྟན་པའི་རུ་དར་འཕྱར་བར་ཁྲིད་ལུང་མན་ངག་ཆར་བཞིན་སྙིལ།།
བསྟན་དང་འགྲོ་བའི་དཔུང་གཉེན་དམ་པ་ཡོངས་འཛིན་ཆེན་པོ་ཁྱེད་ཕྱག་འཚལ།།
།
ཐུན་མོང་རིག་གནས་གཞན་སྐད་དང་བཅས་མཁྱེན་པའི་བློ་རྩལ་ཁོང་ནས་རྡོལ།།
ཐུན་མིན་མདོ་སྔཊ་སེམས་ཀྱི་ཉམས་ལེན་ཐུགས་ཉིད་བདེ་སྟོང་དབྱིངས་སུ་འདྲིས།།
གསུང་རབ་རིན་བྲལ་གསེར་གྱི་གླེགས་བམ་རྒྱལ་བསྟན་གསལ་བའི་རྒྱན་དུ་སྤེལ།།
རྒྱལ་གཤེན་ཆེན་པོའི་སྤྲུལ་པའི་གར་འཆང་སངས་རྒྱས་དངོས་བྱོན་སྤྲུལ་པའི་སྐུ།།
།
དུས་ཀྱི་འགྱུར་བས་སེམས་ཀྱི་གཏད་སོ་རླུང་བཞིན་གཡུག་པའི་དུས་སྐབས་འདིར།།
གྲུབ་མཐའི་ཞལ་ཕོར་གཞན་ལ་མ་འདྲིས་རང་ཚུགས་འཁར་བར་དམ་གྱིས་འཇུས།།
གཤེན་རབ་མི་བོའི་ལུང་དང་རིགས་པར་དཔྱད་གསུམ་དག་པས་རྩལ་གྱིས་འགྲེལ།།
ས་ཆེན་འདི་རུ་གཡུང་དྲུང་བོན་ཞེས་གྲུབ་མཐའི་དབྱངས་སྙན་ཁྱེད་ཀྱིས་དཀྲོལ།།
།
བཤད་སྒྲུབ་བསྟན་པའི་རྒྱལ་མཚན་མཐོན་པོ་མཁའ་ལ་རྩེན་པའི་དགོན་སྡེ་དང་།།
ཕྱོགས་བཞིའི་མི་རིགས་འདྲ་མིན་ཁུལ་དུ་བོན་དབྱངས་སྒྲོག་པའི་ཚོགས་སྡེ་བཅས།།
བསྟན་འགྲོའི་བྱ་བར་སྲི་ཞུའི་ལེགས་ཚོགས་འབད་པས་སྒྲུབ་པའི་འཕྲིན་ལས་ཀུན།།
དཔོན་གསས་མཆོག་གི་ཐུགས་བརྩེའི་དྲིན་ལས་འདའ་བ་མེད་པ་ཀུན་གྱིས་རྟོགས།།
།
ཉམས་དང་རྟོགས་པའི་དཀྱིལ་འཁོར་ཆེན་པོ་ཕལ་བས་གཞལ་བར་མི་གྱུར་མོད།།
ཁྱེད་སྐུ་དགྱེས་ཞལ་འཛུམ་པའི་རང་མདངས་ཕྱི་ནས་མཇལ་བ་ཙམ་གྱིས་ཀྱང་།།
ཕྱི་ནང་མི་རིགས་འདི་ཞེས་མེད་པར་མགྲིན་པའི་སྒྲ་དབྱངས་ཕྱོགས་གཅིག་གིས།།
སེམས་ལ་དགའ་དང་དད་པའི་ཚོར་བས་ཐར་བའི་ལམ་སྣེར་འཁྲིད་ཅེས་བརྗོད།།
།
དྲན་པའི་ཐུགས་སྤྲུལ་མཚན་བཟང་ཅོད་པན་རྩ་གསུམ་ལྷ་ཡི་ཚོགས་ཀྱིས་བསྩལ།།
གངས་རིའི་ལྗོངས་ཀྱི་ཚིག་མཛོད་ཆེན་མོའི་ཆེ་བ་རྒྱལ་དབང་ཆེན་པོས་གནང་།།
ཚེ་དབང་རིག་འཛིན་དངོས་སུ་བྱོན་པའི་སྐུ་མཆོག་བདག་ཅག་མིག་གིས་མཇལ།།
བདག་ཅག་བོན་པོའི་བསོད་ནམས་དཔལ་ཡོན་ཐུཊ་ལ་འཆང་བ་བཀའ་དྲིན་ཆེ།།
།
སླད་ཀྱང་བདག་ཅག་རེ་བའི་མིག་གིས་སྐུ་ཉིད་བསྐལ་བརྒྱར་བཞུགས་པའི་ཕྱིར།།
ལྷ་རྣམས་དགྱེས་པའི་མཆོད་པའི་སྤྲིན་གྱིས་གནམ་སའི་གོང་བུ་འདྲིས་གྱུར་ཞིང་།།
དད་དམ་ཤེལ་དཀར་འཕྲེང་བའི་རང་མདངས་གཅིག་ཏུ་སྤུང་བའི་ངང་ཚུལ་ལ།།
བརྩེ་བའི་སྤྱན་གྱིས་ཡང་ཡང་གཟིགས་བཞིན་སྐུ་ཚེ་རྒྱལ་མཚན་རབ་བརྟན་ཤོག།
།
འདི་ན་སྙན་ཚིག་རོལ་མོའི་དབྱངས་ཀྱིས་མཆོད་པའི་སྤྲིན་དཀར་འདེགས་པ་པོ།།
བྱ་འཕུར་བདག་གི་སྐྱེད་མ་༼བླ་མ་མཚོ།༽གཙོས་པའི་འགྲོ་རྣམས་ཐུགས་བརྩེས་མི་འདོར་བར།།
ཚེ་རབས་ཀུན་ཏུ་རྗེས་སུ་འཛིན་ཞིང་མཐར་ཐུག་གཏན་བདེའི་ལམ་བཟང་ཞིག།
བརྩེ་ཆེན་འོད་གསལ་རྒྱ་མཚོའི་ཀློང་ནས་བསྟན་དུ་གསོལ་ཞེས་སྐྱབས་འཇུག་ཞུ།།
།
བསྟན་འགྲོ་སྤྱི་དང་ཁྱད་པར་དུ་བདག་ཅག་བོན་འབངས་རྣམས་ལ་བཀའ་དྲིན་བསམ་གྱིས་མི་ཁྱབ་པའི་སྙིགས་དུས་ཀྱི་འདྲེན་པ་ཆེན་པོ་སྨྲ་སེང་མི་ཡི་རྣམ་པར་རོལ་བ་༧སྐྱབས་རྗེ་སྨྲ་དབང་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག་དགུང་གྲངས་ ༡༠༠ རུ་ཕེབས་པའི་བསྐལ་བཟང་དགྱེས་སྟོན་ཆེན་མོའི་སྐབས། མགོན་པོ་གང་ཉིད་སྐུ་ཚེ་བསྐལ་བ་རྒྱ་མཚོའི་མཐའ་བར་དུ་མི་འཇིགས་གཡུང་དྲུང་གི་ཁྲི་འཕང་མཐོན་པོར་རབ་ཏུ་བརྟན་པའི་གསོལ་འདེབས་ཤུགས་དྲག་དང་བཅས། མདོ་སྨད་བྱ་འཕུར་བླ་བྲང་གི་གདན་སར་དལ་འབྱོར་གྱི་རྟེན་བཟང་པོ་རྙེད་པ་བྱ་འཕུར་དགེ་བཤེས་ལྷུན་གྲུབ་རྒྱ་མཚོར་འབོད་པས་ཕྱི་ལོ་ ༢༠༢༥ ཟླ་ ༢ ཚེས་ ༡ ཉིན་རྒྱལ་གཤེན་ཞང་བོད་སློབ་གཉེར་ཁང་གི་ཡན་ལག་མཁར་ས་བྱ་འཕུར་ཚང་ཅེས་པའི་ཚོགས་སྡེའི་གནས་སུ་བྲིས་པའོ།། །།
།
།
བརྒྱ་སྟོན་ཨེ་མ་ཧོ།
-སྨྲ་སེང་མི་ཡི་རྣམ་རོལ་༧སྨྲ་དབང་ཡོངས་འཛིན་ཆེན་པོ་ཆེའི་བརྒྱ་སྟོན་དུ་ཕུལ་བ།
གདོང་བཙུན་རྒྱ་ཐར།
།
ཚེ་རིང་ལོ་བརྒྱ་སྐུ་ཡི་རི་དབང་བརྟན།།
ཚེ་རིང་ལོ་བརྒྱར་གསུང་གི་བོན་འཁོར་བསྐོར།།
ཚེ་རིང་ལོ་བརྒྱའི་སྟོན་པ་ཐུགས་རྗེ་ཅན།།
ཚེ་རིང་ལོ་བརྒྱའི་དུས་སྟོན་སྤྲོ་བས་བསུ།།
།
བརྒྱ་ཕྲག་ལོ་ཡི་ཁྲི་ལ་གཟི་བྱིན་འབར།།
བརྒྱ་ཕྲག་བགྲང་བྱའི་མཛད་བཟང་ཟླ་དང་བྲལ།།
བརྒྱ་ཕྲག་ལོ་རྒྱུས་ཀུན་ལས་འཕགས་པ་དེ།།
བརྒྱ་བའི་བསྟན་པའི་གསལ་བྱེད་སྨན་རི་བ།།
།
བརྒྱ་སྟོང་ཁྲི་འབུམ་བྱེ་བའི་གདུལ་བྱའི་མགོན།།
བརྒྱ་ལ་ན་ཡང་གཅིག་འབྱུང་ཨུ་དཔལ་ཙམ།།
བརྒྱ་ཕྲག་ལོར་བཞུགས་བསྟན་དང་འགྲོ་བའི་དོན།།
བརྒྱ་བརྒྱ་ཁྲི་འབུམ་བཞེས་ལ་གསོལ་བ་འདེབས།།
།
བརྒྱ་བའི་འདྲེན་སྟོན་མཆོག་གི་གསུང་གི་བསྟན།།
བརྒྱ་དང་སྟོང་དང་ཁྲི་ཡི་བོན་སྒོ་ཆེ།།
བརྒྱ་བཤད་ཚིག་གི་རྩ་བ་རྫོགས་པ་ཆེའི།།
བརྒྱ་ཆའི་གནད་འགག་འཆད་མཛད་ཁྱེད་ཁོ་ན།།
།
བརྒྱ་ཕྲག་ཁ་རལ་སྙིགས་མའི་ཡང་ཐ་འདིར།།
བརྒྱ་དང་བརྒྱད་ཀྱི་གྲངས་ལྡན་ཕྲེང་བ་ཡི།།
བརྒྱ་དཔོན་ཇི་བཞིན་མཁས་བརྒྱའི་མདོ་འཛིན་པ།།
བརྒྱ་ཕྲག་བགྲང་བྱ་བཞེས་ཁྱེད་བསྟན་པའི་སྲོག།
།
བརྒྱ་བྱིན་ཚངས་པ་ཡིས་ཀྱང་བཀུར་པ་ཡི།།
བརྒྱ་སྟོང་རྣམ་འདྲེན་སྤྱི་གཟུགས་རིན་པོ་ཆེ།།
བརྒྱ་བའི་སྟོན་པའི་བསྟན་པ་རྣམ་གསུམ་ལ།།
བརྒྱ་གོ་གཅིག་ཆོད་ཁྱེད་འདྲ་ཉིན་སྐར་ཙམ།།
།
བརྒྱ་་ལོ་དངུལ་གྱི་འབུལ་བ་མ་འབྱོར་ཡང་།།
བརྒྱ་ཕྱག་དད་པས་འཚལ་བཞིན་རྒྱང་རིང་ནས། །
བརྒྱ་སྟོན་གསེར་གྱི་མཎྜལ་ཆེན་མོ་ལ།།
བརྒྱ་སྟོང་སྤྲོ་དགའི་མཆོད་པ་འདི་ཙམ་བཏེགས།།
།
བརྒྱ་སྟོན་མཛད་སྒོ་ལྷ་མི་དགྱེས་པའི་དཔལ།།
བརྒྱ་སྟོན་བརྟན་བཞུགས་ཚོགས་བསགས་མཆོད་པའི་ཞིང་།།
བརྒྱ་ཕྲག་བགྲང་བྱའི་ཁུར་འཆང་རིན་པོ་ཆེ།།
བརྒྱ་སྟོང་ཁྲི་ཡང་ཞབས་པད་བརྟན་པར་སྨོན།།
།
།
གཡུང་དྲུང་བོན་བསྟན་འདེགས་པའི་གསེར་གྱི་ཀ་ཆེན།
-སྨྲ་སེང་མི་ཡི་རྣམ་རོལ་༧སྨྲ་དབང་ཡོངས་འཛིན་ཆེན་པོ་ཆེའི་བརྒྱ་སྟོན་དུ་ཕུལ་བ།
རྔ་རང་རིག
།
བསོད་ནམས་ཡེ་ཤེས་ཚོགས་ཀྱི་རྒྱ་མཚོ་ལས།།
གངས་ལྗོངས་ས་འཛིན་ཁྱུང་ཡུལ་མཛེས་པའི་ཞིང་།།
དགེ་ལེགས་དཔལ་གྱིས་ཕྱུག་པའི་གནས་མཆོག་དེར།།
སྐུ་མཆོག་མཚན་དཔེའི་མེ་ཏོག་རྣམ་པར་བཞད།།
།
གཞོན་ནུའི་དུས་སུ་གཞུང་ལུགས་རྒྱ་མཚོ་ཡི།།
གསུང་རབ་ཟབ་མོའི་བདུད་རྩི་གསོལ་བ་ལས།།
བཤད་སྒྲུབ་ནོར་བུའི་མཛོད་ལ་མངའ་བརྙེས་ཏེ།།
མཁས་པའི་སྙན་པ་དཀར་པོ་ཕྱོགས་བཅུར་ཁྱབ།།
།
རྒྱུད་པ་གསུམ་གྱི་བསྟན་པའི་སྲོག་འཛིན་པ།།
དྲིན་ཅན་ཡོངས་འཛིན་རྣམ་གཉིས་ཞབས་པད་ལས།།
དབང་ལུང་མན་ངག་བདུད་རྩིའི་ཆུ་རྒྱུན་གྱིས།།
ཐུགས་ཀྱི་བུམ་བཟང་ཡོངས་སུ་གང་བར་མཛད།།
།
འདུལ་ཁྲིམས་བསླབ་གསུམ་རྣམ་དག་གསེར་གྱི་ཁྲི།།
བླ་མེད་ཕྱིན་བཅུའི་ཉམས་ལེན་རིན་ཆེན་བརྒྱན།།
བྱང་སེམས་སྡོམ་པའི་ཚུལ་ཁྲིམས་དྲི་མེད་པས།།
མདོ་རྒྱུད་ཟབ་མོའི་དགོངས་དོན་ཕྱག་ཏུ་བཞེས།།
།
བསྐྱེད་རིམ་རྣལ་འབྱོར་ཟབ་མོའི་ཉམས་ལེན་གྱིས།།
ལྷ་ཚོགས་དཀྱིལ་འཁོར་རྒྱ་མཚོའི་དཔལ་མངའ་ཞིང་།།
རྫོགས་རིམ་རྩ་རླུང་ཐིག་ལེའི་རྣལ་འབྱོར་གྱིས།།
གནས་ལུགས་དོན་གྱི་འོད་གསལ་མངོན་དུ་གྱུར།།
།
ཀ་དག་བོན་སྐུའི་དབྱིངས་སུ་མཉམ་བཞག་པས།།
རིག་པ་ཡེ་ཤེས་ཆེན་པོའི་རང་མདངས་ཤར།།
ལྷུན་གྲུབ་རོལ་པའི་རྩལ་ལས་མ་གཡོས་ཀྱང་།།
སྣང་སྲིད་རང་གྲོལ་ཆེན་པོའི་དགོངས་པ་བརྙེས།།
།
འཁོར་འདས་གཉིས་མེད་དབྱིངས་སུ་རོ་གཅིག་པའི།།
མན་ངག་བདུད་རྩིའི་བཅུད་ཀྱིས་འགྲོ་རྣམས་བསྐྱངས།།
རང་རིག་ཡེ་ཤེས་ཆེན་པོའི་ཀློང་ཡངས་པོར།།
གཞི་སྣང་རང་ཤར་ཆེན་པོའི་དགོངས་པ་རྫོགས།།
།
མདོ་སྔགས་གཞུང་བརྒྱའི་དཀའ་གནད་བརྩོན་པས་གཞལ།།
བསླབ་གསུམ་ནོར་བུའི་རྒྱལ་མཚན་མངོན་མཐོར་བསྒྲེངས།།
སྐལ་བཟང་གདུལ་བྱ་སྟོང་ཕྲག་རྗེས་སུ་བཟུང་།།
གཡུང་དྲུང་བོན་བསྟན་སྲིད་པའི་ཁྱོན་ལ་སྤེལ།།
།
པོ་ཏི་ཉེར་གཉིས་གསུང་གི་བདུད་རྩིའི་གཏེར།།
མཁས་དགུའི་དགོངས་བཅུད་ནོར་བུའི་ཕྲེང་བ་བསྒྲིགས།།
རིག་གནས་ཀུན་ལ་མི་རྨོངས་མཁྱེན་པའི་དཔལ།།
དོན་གཉིས་མཐར་ཕྱིན་འགྲོ་དོན་ལྷུན་གྱིས་གྲུབ།།
།
ཐེག་པ་རིམ་དགུའི་ལམ་བཟང་གསལ་བར་སྟོན།།
སྒོ་བཞི་མཛོད་ལྔའི་ཡང་བཅུད་སྒྲིབ་མེད་གཟིགས།།
བླ་མེད་ཐེག་པའི་ཟབ་དོན་རྒྱ་མཚོའི་གཏེར།།
ཕངས་མེད་མ་ལུས་འགྲོ་ལ་སྩོལ་བར་མཛད།།
།
དེང་འདིར་དགུང་ལོ་བརྒྱ་ཡི་དཔལ་ཐོབ་པ།།
བཀྲ་ཤིས་དགེ་མཚན་ལྷ་ཡིས་མེ་ཏོག་འཐོར།།
སྐལ་ལྡན་བུ་སློབ་ཡོངས་ཀྱི་སྤྱི་བོ་རུ།།
བྱིན་རླབས་དངོས་གྲུབ་རྒྱུན་དུ་འབེབས་པར་ཤོག།
།
ཅེས་པ་འདི་ནི་གང་གི་སློབ་མའི་གྲལ་མཐའ་བ་རྒྱལ་གཤེན་བོན་སྒྲའི་རྩོམ་སྒྲིག་པ་དགེ་བཤེས་མཁྱེན་རབ་རྒྱ་མཚོའམ་རྔ་རང་རིག་ཏུ་འབོད་པ་དེས་གདན་ས་ཁྲི་བརྟན་ནོར་རྩེའི་རང་ཤག་དཔེ་མང་སྤུངས་པའི་དཀྱིལ་འཁོར་ནས་སྨྲ་དབང་ཡོངས་འཛིན་ཆེན་མོ་མཆོག་གིས་བསྟན་འགྲོར་ཕན་པའི་མཛད་འཕྲིན་བླ་མེད་བསྐྱངས་ཏེ་དགུང་ལོ་བརྒྱ་ཕྲག་གཅིག་བཞེས་པའི་སྐལ་བཟང་གི་དུས་ཚོད་ཁྱད་པར་ཅན་འདི་ལ་དད་པའི་ལྷ་ཕྱག་གྲངས་མེད་དང་བཅས།།
བསམ་ཚུལ་ཕྲིས།