ཤིས་བརྗོད་བརྒྱ་སྟོན་བསུ་བའི་དུང་བརྡ།

།

སྲིད་པའི་གངས་རྒྱལ་ཏི་སེའི་འདབས་རོལ་ན།།

ཡ་ཐོག་ཞང་ཞུང་ཝེར་རོའི་མངའ་རིས་སུ།།

རྨད་བྱུང་མཁའ་འགྱིང་གཉན་གྱིས་བྱིན་རླབས་སྲས།།

གདུང་རྒྱུད་ཤེལ་དཀར་འཕྲེང་བ་རིམ་གྱིས་གྲོལ།།

།

རེ་ཞིག་ཞང་ཞུང་རྒྱལ་པོའི་དབང་རླུང་གུད།།

ཐུ་བྷོད་བཙན་པོས་གཡོ་རྒྱུའི་ལས་ལ་སྦྱོར།།

སྟོང་སྡེས་ཁྲི་སྡེ་བརླགས་པའི་དུས་ཙམ་ན།།

སྟོང་རྒྱུང་རིང་མོས་ཞང་ཞུང་རྒྱལ་སྲིད་བསྐྱངས།།

།

འབངས་གྱིས་མ་རློམ་མདོ་སྨད་ཡུལ་དུ་བྱོལ།།

ཞབས་ཀྱི་འདེགས་འཇོག་ཤུལ་ནས་པད་མོ་འཁྲུངས།།

དེར་བརྟགས་དམག་གིས་དེད་པས་ཐུགས་ལ་མཁྱེན།།

རྨ་ཀླུང་དལ་འགྲོར་རྫུ་འཕྲུལ་རྩལ་གྱིས་བསྐྱོད།།

།

རྨ་རྒྱལ་ཤར་གྱི་གནས་མདུན་གང་དེ་ན།།

སྒྲུབ་པའི་གྲོགས་བརྟེན་གཉན་གྱི་རིགས་རྒྱུད་སྤེལ།།

རིམ་གྱིས་རྨ་ཤོད་གཡང་གི་ར་བ་ཞེས།།

མདོ་སྨད་རྔ་གཡང་ཕྱུག་མོའི་པང་བ་རུ།།

།

རིགས་སྲས་བློ་གྲོས་བཟང་པོའི་རྒྱལ་མཚན་གྱིས།།

ཞུ་སྒོམ་ཆེན་པོའི་ཐུགས་བཅུད་རོལ་བའི་མུར།།

རྟོག་འཛིན་འཁྲུལ་བའི་མཚན་མ་དབྱིངས་སུ་ཞིག།

མདོ་སྨད་སྣང་ཞིག་ཆེན་པོའི་བླ་དྭགས་འཆང་།།

།

དེ་སྲས་སྣང་ཞིག་སྟོན་འཕགས་ཆེན་པོ་ཡིས།།

བང་བཙན་བསེ་ཁྲབ་གཉེན་པོའི་ལྷ་ཞོལ་དུ།།

བཤད་སྒྲུབ་བསྟན་པ་འབྱུང་བའི་ཚོགས་ཞིང་དེར།།

གྱེར་བསྟན་སྲིད་པའི་ཀ་ཆེན་རྨང་ནས་བསླངས།།

།

དེ་ཚེ་མདོ་ཁམས་ས་ཡི་ལྟོ་བ་རུ།།

མཚན་སྙན་དཀར་པོའི་བ་དན་མཐོ་རུ་བཏེགས།།

རིགས་རྒྱུད་བྱིན་རླབས་གསེར་རིའི་འཕྲེང་བ་ལྟར།།

བདག་གཞན་དོན་གཉིས་སྒྲུབ་ལ་དགྱེས་ཤིང་བྲེལ།།

།

ཁྱད་འཕགས་སྣང་སྟོན་མུ་ལ་མ་ཏི་མཚན།།

དོན་གྱིས་སྨྲོས་ན་ནམ་མཁའ་བློ་གྲོས་ཞེས།།

འགྲན་བྲལ་མཉམ་མེད་བླ་མའི་རྣམ་རོལ་བ།།

མདོ་སྨད་སྣང་ཞིག་ཆེན་པོའི་གདུང་ལས་འཁྲུངས།།

།

སྡེ་གསུམ་གཞུང་བརྒྱའི་ཟབ་གནད་ཐུགས་སུ་ཆུད།།

རྣམ་དག་འདུལ་ཁྲིམས་གཙང་མའི་བསླབ་པ་བཙུན།།

རིང་ལུགས་འཁྲུལ་མེད་མཉམ་མེད་བླ་མའི་སྲོལ།།

འཛིན་སྐྱོང་སྤེལ་བའི་ཕྲིན་ལས་རྨད་དུ་བྱུང་།།

།

དེ་ཚེ་གདན་ས་རབ་ལེགས་གཡུང་གླིང་གི།

དཔོན་སློབ་སྨྲ་དབང་ཤེས་རབ་གྲགས་པ་ཞེས།།

མཁས་བཙུན་བཟང་གསུམ་མངའ་བའི་བཤེས་གཉེན་དེ།།

དགོན་འདིར་སྤྱན་དྲངས་འཆད་ཉན་དབུ་ཡང་བརྙེས།།

།

དམ་པ་ཟུང་གིས་ཐུགས་བསྐྱེད་སྨོན་ལམ་མཐུས།།

བཤད་སྒྲུབ་དབྱར་རྔ་སྒྲོག་པའི་གཤེན་སྡེ་འདི།།

བགྲང་བྱ་བརྒྱ་ཕྲག་འཁོར་བའི་དེང་གི་ཆར།།

བཤེས་གཉེན་བརྒྱ་ཕྲག་དུ་མའི་མ་མར་གྱུར།།

།

ཕྱོགས་བཞིའི་སློབ་ཚོགས་དལ་འགྲོ་རིང་མོའི་རྒྱུན།།

མ་ཡུམ་སློབ་གླིང་དལ་འབབ་མཛོད་དུ་བལྟམས།།

ལྔ་རིག་ནོར་བུའི་གཏེར་དུ་གྱུར་བས་མོད།།

ལྷོ་གླིང་འཛིན་མའི་ཁྱོན་དུ་གྲགས་པ་འབར།།

།

འཆད་པས་སྐལ་ལྡན་བློ་ཡི་པད་མོ་བཞད།།

རྩོད་པས་ཕས་རྒོལ་གཡུལ་ལས་རྣམ་པར་རྒྱལ།།

རྩོམ་པས་བཀའ་ལུང་ཚད་མའི་དཀའ་གནད་བཀྲལ།།

མཁས་པའི་བྱ་བ་གསུམ་ལ་གྲུབ་པ་འབྱོངས།།

།

རིགས་དང་རུས་ཀྱི་ཁྱད་པར་མི་གཙོ་ཞིང་།།

ཡུལ་དང་ལུང་པའི་འཐེན་འཁྱེར་དེ་བས་དབེན།།

དཀར་ནག་རིགས་ཀྱི་སྤུ་རིས་མེད་པའི་ཕྱིར།།

དད་ལྡན་བསོད་ནམས་བསགས་པའི་ཞིང་དུ་གྱུར།།

།

ཕྲག་དོག་ཅན་ལ་ཟུག་རྔུའི་སྣང་བ་སྟེར།།

ལྷག་བསམ་ཅན་ལ་སྤོབས་པའི་ང་རོ་བསྐྱེད།།

རྒྱལ་བསྟན་རིན་ཆེན་གསལ་བའི་སྒྲོན་མེ་སྤར།།

མ་ཡུམ་བཤད་སྒྲུབ་སློབ་གླིང་ཨེ་མ་རྨད།།

།

གོང་ན་སྐྱབས་མགོན་བླ་མའི་ཐུགས་བསྐྱེད་ཟབ།།

བར་དུ་ནང་ཆེན་དྲུག་གི་མཐུ་དཔུང་བརྟན།།

འོག་ཏུ་ལྷ་སྡེ་དམངས་ཀྱི་ལྷག་བསམ་གཙང་།།

མ་ཡུམ་སློབ་གླིང་སྲིད་མཐར་གནས་པའི་རྟགས།།

།

འཁྲུལ་སྣང་དབྱིངས་སུ་ཞིག་པའི་གདན་ས་འདིར།།

མཉམ་མེད་བླ་མའི་རིང་ལུགས་གཙང་མའི་སྲོལ།།

འཛིན་ལ་མི་ངལ་བཤད་སྒྲུབ་སེམས་དཔའི་སྡེ།།

ནམ་ཡང་མི་ནུབ་རིང་དུ་འབར་གྱུར་ཅིག།།

།

      ཞེས་སྨན་རིའི་བཤད་སྒྲུབ་རྒན་གྱི་མིང་ཙམ་འཛིན་པ་སྣང་རྒྱལ་ཤེས་རབ་བསམ་འཕེལ་དུ་འབོད་པས་སྣང་ཞིག་རྒྱལ་བསྟན་ཕུན་ཚོགས་གླིང་ངམ་ཕྱོགས་ལས་རྣམ་རྒྱལ་བཀྲ་ཤིས་གཡུང་དྲུང་གླིང་དུ་མཚན་ཉིད་འཆད་ཉན་གྱི་སྡེ་དབུ་བརྙེས་ནས་མི་ལོ་བརྒྱ་ཕྲག་གཅིག་ཧྲིལ་བོར་འཁོར་བའི་དུས་སྟོན་ལ་ལྷག་བསམ་གཙང་མའི་མཆོད་པ་ཞིག་གི་ཚུལ་དུ༼ཤིས་བརྗོད་བརྒྱ་སྟོན་བསུ་བའི་དུང་བརྡ་༽ཞེས་པའི་རྩོམ་ཐུང་འདི་དགའ་སྤྲོ་དང་ལྷན་ཕྱི་ལོ ༢༠༡༨་ཟླ་༩་ ཚེས་༡༧་ཉིན་རང་ཤག་ནས་ཕུལ།