འཇིགས་མེད་དབང་ཕྱུག
རྩོམ་ཡིག་འདི་ཐེངས། 433 བཀླགས་འདུག
བདེན་འཛིན་ལྕཊ་ཀྱུས་འཛིན་པ་དམ་པའི་དུས།
རྣམ་རྟོག་མཚོ་མོའི་རྦ་རླབས་འཕྱོ་བའི་དུས།།
ཚིག་རྩུབ་མདའ་མོས་མྱི་སེམས་རྨས་པའི་དུས།།
མགོན་པོ་ཁྱེད་ཀྱི་བྱམས་སེམས་མཁོ་བ་ཡིན།།
།
གནས་ལུགས་གནམ་ལྕགས་རྒྱབ་ཏུ་གཡུག་པའི་དུས།།
བདེན་པའི་གཤིས་ལ་མིག་སྔུན་བརྒོལ་བའི་དུས།།
རློམ་སེམས་འདབ་མ་མཁའ་དབྱིངས་རྒྱས་པའི་དུས།།
མགོན་པོ་ཁྱེད་ཀྱི་ཐུགས་སེམས་མཁོ་བ་ཡིན།།
།
གདོད་མའི་སྲོལ་བཟང་རྒྱུན་སྐུད་ཆད་པའི་དུས།།
ལོག་སེམས་བྱ་རྒོད་དགུང་ལ་འཕུར་བའི་དུས།།
རང་སྐད་མཛེས་པོ་ངག་ནས་དོར་བའི་དུས།།
མགོན་པོ་ཁྱེད་ཀྱི་སློབ་གསོ་མཁོ་བ་ཡིན།།
།
གོང་མས་སྨིན་ལེགས་སྒེག་མ་འཚོལ་བའི་དུས།།
འོག་མས་བླ་ཆེན་གོང་མར་སྨོད་པའི་དུས།།
གོང་འོག་འགལ་བའི་རལ་གྲི་ཕྱར་བའི་དུས།།
མགོན་པོ་ཁྱེད་ཀྱི་གནས་ལུགས་མཁོ་བ་ཡིན།།
།
སྡེ་བ་ས་འཚམས་མི་མཐུན་རྩོད་པའི་དུས།།
ཁྱིམ་ཚང་བློ་སེམས་མི་མཐུན་རྩོད་པའི་དུས།།
རྒན་སློབ་མོས་ལམ་མི་མཐུན་རྩོད་པའི་དུས།།
མགོན་པོ་ཁྱེད་ཀྱི་བསླབ་བྱ་མཁོ་བ་ཡིན།།
།
སེམས་སུ་འདོད་པའི་གཙང་བོ་རྒྱས་པའི་དུས།།
ཡིད་དུ་མི་དགེའི་ལས་སྤྱོད་འབར་བའི་དུས།།
སྙིང་དུ་སྨིན་ལེགས་སྒེག་མ་འཆར་བའི་དུས།།
མགོན་པོ་ཁྱེད་ཀྱི་གསུང་ཞིག་མཁོ་བ་ཡིན།།
།
འཇིག་རྟེན་འཁོར་བར་བསོར་སྣང་སྐྱེས་བའི་དུས།།
གསེར་དངུལ་མཛེས་པོ་ཁོག་ཏུ་ཆགས་པའི་དུས།།
ཆགས་སྡང་ཚེར་མའི་རྣོ་ཁ་རྒོད་པའི་དུས།།
མགོན་པོ་ཁྱེད་ཀྱི་བསམ་ཐུགས་མཁོ་བ་ཡིན།།
།
གཞུང་ལུགས་སྟོང་གི་བརྗོད་དོན་དོགས་པའི་དུས།།
ཚད་མའི་བགྲོད་ལམ་ཕྲ་མོ་དོགས་པའི་དུས།།
ཡིད་སེམས་དོགས་པ་སྟོང་གིས་གཡོག་པའི་དུས།།
མགོན་པོ་ཁྱེད་ཀྱི་ཤེས་རབ་མཁོ་བ་ཡིན།།
།
འཇི༵གས་སྐྲག་སྣང་བས་བདག་སེམས་བསྐོར་བའི་དུས།།
མེ༵ད་རྟོགས་ཤེས་རབ་ངེད་ཀྱིས་དོར་བའི་དུས།།
དབ༵ང་ཕྱུ༵ག་ལྷ་ལ་ཡིད་སེམས་འཁོར་བའི་དུས།།
མགོན་པོ་ཁྱེད་ཀྱི་བློ་གྲོས་མཁོ་བ་ཡིན།།
།
8.3.2018.
བསམ་ཚུལ་ཕྲིས།