༓ ལྟ་མགུར་གྲགས་སྟོང་འགག་པ་མེད་པའི་སྒྲ་སྙན།
རྩོམ་ཡིག་འདི་ཐེངས། 1040 བཀླགས་འདུག
བོན་སྐུ་སྐྱེ་མེད་ཀྱི་གང་ཤར་དབང་པོ། །རྫོགས་སྐུ་དྲན་གསལ་གྱི་བྱང་ཆུབ་རྡོ་རྗེ། །སྤྲུལ་སྐུ་གང་འདུལ་གྱི་འགྱུར་མེད་ཚུལ་ཁྲིམས། །སྙིང་དབུས་ཟང་ཐལ་གྱི་ཀློང་ནས་བཞེངས་ལ། །བདག་ཅག་སྐལ་ལྡན་ལ་བྱིན་རླབས་སྩོལ་ཤོག །གདོད་ནས་བརྟན་གཡོ་ཡི་བཀོད་པ་འདི་དག །བོན་ཉིད་ཡོ་ལང་གི་རང་རྩལ་འབའ་ཞིག །དུས་གསུམ་གཤེན་རབ་ཀྱི་དགོངས་པའི་གཏད་སོ། །ངོ་བོ་ཟང་ཐལ་འདི་ཁོ་ན་ལགས་སོ། །བོན་ཆོས་ཐ་དད་ཀྱི་མིང་ཙམ་ཞིག་གིས། །ཀུན་གྱིས་ཕྱོགས་རིས་ཤིག་རྒྱང་ནས་བྱེད་ཀྱང་། །གནད་སྲང་རུ་སྦལ་གྱི་ནུར་འགྲོས་བྱས་ན། །དོན་གྱི་དབྱེ་བ་དེ་རིང་ནས་ཟད་སོང་། །བོན་སྐུ་འོད་གསལ་གྱི་རང་ངོ་འཁུམ་ན། །འཁོར་འདས་བདེ་སྡུག་གི་ཆེད་འཛིན་གྲོལ་བས། །ངང་བཞག་ཕྱོགས་ཡན་གྱི་རང་བབ་ཆེན་པོར། །ཨ་ཁྲིད་ཟང་ཐལ་གྱི་ཐིག་ལེ་ཉག་གཅིག །གྲུབ་མཐའ་ཀུན་མཐུན་དང་ཀུན་རྒྱལ་ཡིན་ནོ། །ང་ཚོ་ཞྭ་དཀར་གྱི་གཡུང་དྲུང་བརྒྱུད་པར། །མན་ངག་ཁ་ཁྱེར་ཞིག་གཏན་ནས་མེད་པས། །བོན་གྱི་གསུང་རབ་ནས་བཤད་པའི་ཉམས་ལེན། །ཇི་བཞིན་མཐར་ཕྱིན་གྱི་རྡོ་རུས་སྤྲོད་ན། །ཁོད་སྤུངས་ཆེན་པོ་ཡི་ཕ་རྗེས་བསྙེག་གོ། །ཕྱག་རྒྱ་ཆེན་པོ་དང་དབུ་མ་ཆེན་པོ། །རྫོགས་པ་ཆེན་པོ་ཡི་མཐོ་སྐད་སྒྲོགས་ཀྱང་། །ཟབ་པའི་ཟབ་གནད་དེ་མཐིལ་མ་ཕྱིན་པའི། །གཅིག་རྗེས་གཉིས་ཟློས་ཀྱི་ཆོས་པ་སྡུག་ག །དགེ་སྡིག་ཕན་གནོད་ཀྱི་སྐྱར་གཞི་ཟད་པའི། །ལྷན་སྐྱེས་རིག་པ་ཡི་རང་ཞལ་འཁུམ་པས། །ག་ལེར་གུ་ཡངས་ཀྱི་བློ་བདེའི་ཉི་མ། །སྙིང་ནས་ཤར་བ་ཡི་བོན་པོ་སྐྱིད་དོ། །ཆོས་ཀུན་བདེན་མེད་ཀྱི་སྒྱུ་མར་མ་མཐོང་། །འདིར་སྣང་བདེན་ཞེན་གྱི་སྨིག་སྒྱུའི་ཡོ་ལང་། །ཆབ་རོམ་ནོར་བུ་རུ་འཁྲུལ་བའི་ལོག་ཤེས། །ཐོས་ཆུང་ཆོས་དྲེད་ཀྱི་ཆོས་པ་སྡུག་ག །བདེན་གཉིས་འགལ་མེད་ཀྱི་རང་གཤིས་རིག་པ། །སྣང་བ་བདག་མེད་ཀྱི་ཆུ་ཟླའི་རྫུན་རིས། །རྟེན་འབྲེལ་འཆར་སྒོ་རུ་མ་འགག་བཀྲ་བ། །བདེན་མེད་དོན་མཐོང་གི་བོན་པོ་སྐྱིད་དོ། །མི་རྟོག་སྙིང་པོ་ཡི་ཀུན་གཞིའི་ངོ་བོར། །འཛིན་པ་བདེན་བཟུང་གི་གཏད་སོ་བྱས་པས། །ལོ་བརྒྱར་འབད་ཀྱང་ནི་རང་ཉིད་ངལ་དུབ། །བླུན་སྒོམ་ཨུ་ཚུགས་ཅན་ཆོས་པ་སྡུག་ག །ལྟ་བ་ཀུན་ཤོང་གི་ནམ་མཁའ་ཡངས་པར། །སྒོམ་པ་རབ་གསལ་གྱི་མདུང་སྐོར་བྱས་པས། །སྤྱོད་པ་གཏད་མེད་ཀྱི་ཟང་མ་ཐལ་བྱུང་། །འབྲས་བུ་ལྷུན་གྲུབ་ཀྱི་བོན་པོ་སྐྱིད་དོ། །ཡིན་མིན་བློས་བཏགས་ཀྱི་ཚིག་ལ་འབྱམས་ནས། །ཡོད་མེད་ཁས་ལེན་གྱིས་རང་མགོ་འཁོར་བས། །ཡང་དག་སྙིང་པོ་དང་ཆ་ཙམ་མ་ཉེ། །ཐ་སྙད་རྟོག་གེ་ཡི་ཆོས་པ་སྡུག་ག །ཐོས་པའི་ཤེས་རབ་ཀྱི་རྒྱ་མཚོའི་ཀློང་དུ། །བསམ་པའི་ཉམས་མྱོང་གི་གཟའ་སྐར་བཀྲ་ཞིང་། །སྒོམ་བྱུང་པད་ཚལ་གྱིས་རབ་ཏུ་མཛེས་པ། །ཇི་བཞིན་མངོན་མཐོང་ཅན་བོན་པོ་སྐྱིད་དོ། །ཀུན་བཏགས་བློས་དཔྱད་ཀྱི་སེམས་བྱུང་རྟོག་པས། །དྲན་བསམ་འགྱུར་འཕྲོ་ཡི་ལྷ་སྐུ་བསྒོམས་ཀྱང་། །ཟབ་གསང་རྫོགས་རིམ་གྱི་རྒྱས་མ་ཐེབ་པའི། །ཚུར་མཐོང་བསྐྱེད་རིམ་ཅན་ཆོས་པ་སྡུག་ག །སྣང་བ་འཛིན་མེད་ཀྱི་ལྷ་སྐུར་ཤར་ནས། །གྲགས་པ་བདེ་ཆེན་གྱི་མི་ཤིག་སྒྲ་དབྱངས། །དྲན་རྟོག་བོན་སྐུ་ཡི་ངོ་བོར་ཤར་བའི། །མཐའ་བྲལ་བསྐྱེད་རིམ་ཅན་བོན་པོ་སྐྱིད་དོ། །སྣང་བ་ཡུལ་ཤོར་གྱི་སྦྱོར་བ་དེ་དང་། །དགྲར་འཛིན་གནོད་སེམས་ཀྱི་སྒྲོལ་བ་དང་བཅས། །གསང་སྔགས་འཆལ་སྤྱོད་ཀྱི་བསྟན་སེལ་བཏང་བའི། །སྡིག་ཅན་ཆོས་འགལ་གྱི་ཆོས་པ་སྡུག་ག །སྣང་སྟོང་མཉམ་སྦྱོར་གྱི་འཛག་མེད་བདེ་ཆེན། །གཉིས་འཛིན་དབྱིངས་སྒྲོལ་གྱི་མངོན་སྤྱོད་ཆེན་པོ། །གཡུང་དྲུང་ཐེག་པ་ཡི་གསང་སྔགས་སྤྱོད་པའི། །གོལ་ཤོར་རང་གྲོལ་གྱི་བོན་པོ་སྐྱིད་དོ། །ཆགས་སྡང་རྨོངས་གསུམ་གྱི་རང་རྒྱུད་སྦོས་ནས། །གྲུབ་མཐའི་ཕྱོགས་ཞེན་གྱི་དུག་གིས་སྨྱོས་བཞིན། །བསྟན་པའི་ནང་སེལ་ལ་རབ་ཏུ་དགའ་བའི། །རང་མགོ་རྡོ་བརྡུང་གི་ཆོས་པ་སྡུག་ག །ཀུན་ལ་དག་སྣང་གི་བློ་མིག་ཡངས་པས། །རིས་མེད་བསྟན་པ་ལ་ཤིན་ཏུ་འདུན་ཞིང་། །ཀུན་གྱི་སྙིང་པོ་རྣམས་གཅིག་ཏུ་བསྡུད་མཁས། །ཕྱོགས་མེད་མོས་གུས་ཅན་བོན་པོ་སྐྱིད་དོ། །དགའ་བོ་སྐྱིད་དོ་ལ་གཡུང་དྲུང་བརྒྱུད་པ། །སྐུ་གསུམ་སྣང་ཆ་ཀུན་གཞན་དུ་མི་འདུག །ད་ལྟའི་ཤེས་རྒྱུན་འདིར་ཡེ་ནས་རྫོགས་པས། །ཐག་རིང་ངལ་དུབ་ཀྱི་འཚོལ་དགོས་དོར་ཤོག །རབ་འབྱམས་ཞི་ཁྲོ་ཡི་ཚོམ་བུ་དུ་མ། །སྙིང་དབུས་ལྔ་ལྡན་གྱི་ཐིག་ལེར་རྫོགས་པས། །བོན་སྐུའི་བཙན་ས་རང་བཟུང་ན་ཆོག་གི། །ཞལ་གདངས་མཆེ་གཙིགས་ཀྱི་ལྷ་དེ་བོར་ཤོག །བོན་སྐྱོང་སྲུང་མ་ཡི་བཀའ་སྡོད་རབ་འབྱམས། །རིག་རྩལ་ཐལ་འབྱིན་གྱི་ལྟ་སྒོམ་ཀློང་ན། །དུག་ལྔ་འདུལ་བ་འདིར་གདོད་ནས་འདུག་པས། །དགྲ་འདུལ་གཉེན་སྐྱོང་གི་བཀའ་སྲུང་དོར་ཤོག །ཇི་ལྟར་བྱས་ཀྱང་ནི་བོན་ཉིད་ཆོ་འཕྲུལ། །གང་ལྟར་སྤྱོད་ཀྱང་ནི་གཞི་སྣང་རང་རྩལ། །བབས་ཀྱི་གནས་ལུགས་ལ་འཕོ་འགྱུར་མི་འདུག །གཤེན་རབ་སྟོན་པས་ཀྱང་འདི་བས་མ་བཤད། །གྱེར་སྤུངས་རིག་འཛིན་གྱིས་འདི་བས་མ་གཟིགས། །རྒྱལ་བ་བླ་ཆེན་གྱི་བརྒྱུད་པ་ཀུན་ཀྱང་། །བོན་འདི་ཁོ་ན་ལས་བརྟེན་ནས་སངས་རྒྱས། །གཤེན་རབ་ཐེག་པ་ཡིས་འདུལ་བར་དཀའ་ཚེ། །ཡེ་གཤེན་ཐེག་པ་འདི་ཁོ་ན་ཟབ་བོ། །བོན་སྒོ་བརྒྱད་ཁྲི་ནས་བཤད་པའི་མདོ་དོན། །གནད་གཅིག་ཨ་ཁྲིད་འདི་ཁོ་ནར་འདུས་སོ། །རྣམ་ཀུན་འདི་ཉིད་ལ་བརྩོན་པ་གཅེས་གཅེས། །བདག་དང་མཆེད་ལྕམ་གྱི་ཕོ་མོ་མ་ལུས། །ཕྱམ་གཅིག་གདོད་མ་ཡི་གྲོལ་གཞིར་ཕྱིན་ནས། །བོན་སྐུ་ཀུན་བཟང་གི་ཐུགས་ཀློང་ཡངས་པར། །བོན་ཉིད་རྒྱལ་སྲིད་ལ་མངའ་དབང་བསྒྱུར་ཏེ། །སླར་ཡང་འགྲོ་འདུལ་གྱི་རྫོགས་སྐུའི་བཀོད་པ། །དེ་ལས་ཡང་སྤྲུལ་གྱི་སྤྲུལ་སྐུའི་བཀོད་པས། །འཁོར་བ་ཀ་དག་གིས་དོང་སྤྲུགས་ཤོག་ཅིག །
ཅེས་གཡུང་དྲུང་བོན་གྱི་ལྟ་མགུར་འདི་ཡང་ཞྭ་དཀར་བོན་གྱི་བསྟན་པ་ལ་མཆོག་ཏུ་གུས་ཤིང་ཀུན་མཁྱེན་རྩོད་མེད་བརྒྱུད་པའི་གྲལ་མཐར་འཁོད་པ་མདོ་ཁམས་ཟུར་མང་པ་ཆོས་ཀྱི་རྒྱ་མཚོ་ཀུན་དགའ་བཟང་པོའམ་མིང་གཞན་དཔོན་གསས་མི་ཤིག་ཁྱུང་རྒོད་རྩལ་གྱིས་རྒྱལ་བོན་གྱིས་བྱིན་གྱིས་རླབས་པའི་གནས་མཆོག་གྱོ་ཡི་ལུང་པ་གངས་དཀར་སྟག་སེང་ཁྱུང་རྩེའི་ཉེ་འདབས་ཁོད་སྤུངས་ཆེན་པོའི་གཤེགས་ཤུལ་བདེ་ཆེན་གཡུང་དྲུང་སྟེང་དུ་མིག་སྨན་ཐིག་ལེའི་སྤྱིལ་བོར་བགྱིས་པ་དགེ། །
བསམ་ཚུལ་ཕྲིས།