རྔ་བ། སྣང་ཞིག བྱ་འཕུར།

།

འདི་ནས་དཔག་ཚད་གྲངས་ཀྱིས་བརྒལ་བའི་སར།།

ཕྱོགས་བཞི་གངས་རིས་སྐོར་བའི་ཡུལ་ཆེན་པོ།

ཁ་བའི་ལྗོངས་ཞེས་གྲགས་སྙན་རྔ་ཆེན་གྱིས།།

གླིང་བཞི་སྒུལ་བའི་ཞིང་ཁམས་དེ་རིང་དྲན།།

ཤར་ཕྱོགས་མདོ་ཁམས་རྟ་ཕོའི་རྗེས་ཤུལ་དུ།།

མངའ་རིས་གུ་གེའི་ཚང་ནས་རྡོལ་བའི་དཔུང་།།

དཔའ་བོའི་རྡོ་རིང་བཞེངས་པའི་གྲོང་ཁྱེར་དེ།།

རྔ་གཡང་ཕྱུག་མོའི་སྣོད་བཅུད་དེ་རིང་དྲན།།

།

འཆད་པའི་བཞུར་རྒྱུན་རྨ་ཀླུང་ཆུ་བོར་འགྲན།།

རྩོད་པའི་རིག་པ་གནམ་ལྕགས་ཐོག་ལས་རྣོ།།

རྩོམ་གྱི་སྡེབ་སྦྱོར་འགྱུར་དྲུག་སྐུད་པར་སྡེབ།

འཆད་རྩོད་རྩོམ་གྱི་ཞིང་ཁམས་དེ་རིང་དྲན།།

།

ཚུལ་ཁྲིམས་དྲི་ངད་གཙང་མས་ས་གཞི་བརླན།།

ཏིང་འཛིན་རིག་པའི་རྩ་ལག་རབ་ཏུ་བརྟན།།

ཤེས་རབ་འབྲས་བུའི་ཁུར་ཆེན་ལྷུག་པར་གྲོལ།།

བསླབ་གསུམ་བསྟན་པའི་ཚལ་ཆེན་དེ་རིང་དྲན།།

།

བན་བོན་གྲུབ་མཐའ་རྣམ་མང་གཞུང་ཆེན་པོར།།

ལུང་རིག་ཚད་གསུམ་སྲང་ལ་གཞལ་བྱས་ནས།།

ཕན་ཚུན་རྩོད་སྒྲུབ་ལུང་རིག་མེ་ཆེན་འབར།།

དག་སྣང་ནོར་བུའི་གཟི་བྱིན་དེ་རིང་དྲན།།

།

སྐུ་བརྗིད་མཚན་དཔེའི་དཀྱིལ་འཁོར་ལྟ་ན་སྡུག།

གསུང་སྙན་བརྒྱད་ཁྲི་བཞི་སྟོང་ངག་ལ་འཁྱིལ།།

ཐུགས་ཆེན་མཁའ་དབྱིངས་ཆེན་པོ་ཀུན་ལ་སྙོམ།།

སྨྲ་སེང་མཁས་གྲུབ་ཚོགས་རྣམས་དེ་རིང་དྲན།།

།

མདོ་རྒྱུད་ཚད་གསུམ་རྒལ་རྟགས་ཐལ་མོར་སྡེབ།།

སྔགས་རྒྱུད་དམ་ཚིག་དཀྱིལ་འཁོར་ཐུགས་ལ་བཀྲ།།

རྫོགས་ཆེན་སྣང་བཞིའིི་ལྟད་མོར་ལོངས་སུ་སྤྱོད།།

མདོ་སྔགས་རྒྱ་མཚོའི་ཞིང་ཁམས་དེ་རིང་དྲན།།

།

སྣང་བ་དབྱིངས་སུ་ཞིག་པའི་དབེན་གནས་སུ།།

ལེགས་བཤད་མགྲིན་པར་འཁྱིལ་བའི་རྔ་སྒྲ་ཡིས།།

མདོ་སྔགས་དབྱངས་ལ་བྱང་བ་འདུལ་བའི་སྡེ།།

བཤད་སྒྲུབ་བསྟན་པའི་རྒྱ་མཚོ་དེ་རིང་དྲན།།

།

སྦྱིན་པའི་བྱམས་ཆེན་ཡིད་ལ་སྒོམ་པའི་བློས།

ནོར་ལྷའི་ཚོགས་རྣམས་གྲོགས་སུ་ཁུག་གྱུར་ཅིང་།།

ལོངས་སྤྱོད་ཕུན་ཚོགས་འདོད་རྒུ་ནོར་བུའི་དབྱིག།

བསོད་ནམས་ཞིང་འདྲེན་ཚོང་སྡེ་དེ་རིང་དྲན།།

།

རྒན་པོར་བྱམས་དང་སྙིང་རྗེའི་འཛུམ་བག་ལྡན།།

གཞོན་པར་བཀུར་བསྟིའི་བྱ་བ་གཤིས་སུ་འཁུམ།།

ཆུང་རྣམས་རྩེད་འཇོའི་ཐང་ཆེན་ལོངས་སུ་སྤྱོད།།

གཤིས་རྒྱུད་ལེགས་པའི་མི་ཚོགས་དེ་རིང་དྲན།།

།

མཐོ་བརྗིད་གནམ་ལ་ཟུག་པའི་ཁང་ཆེན་དང་།།

ཡིད་འོང་རྣམ་པར་བཀྲ་བའི་གཞུང་ལམ་ངོགས།།

རིག་ལྡན་པིར་གྱིས་བྲིས་སྙམ་དོགས་པས་གནོན།།

སུམ་བརྩེན་ས་གཞིར་འཕོས་འདྲ་དེ་རིང་དྲན།།

།

བརྒྱ་བྱིན་ཆེན་པོས་ལྷ་དམག་གཡུལ་དུ་འབོད།།

གཙུག་ན་རིན་ཆེན་ནོར་བུ་འབོར་ལ་དོགས།།

འདོད་པ་དགུ་འགྱུར་འདོད་པས་བདེ་བར་ཚིམ།།

འཇིག་རྟེན་གསུམ་གྱི་མངའ་ཐང་དེ་རིང་དྲན།།

།

བྱམས་པའི་སྙིང་རྗེ་འོ་མའི་མདངས་ལས་དཀར།།

བརྩེ་བའི་ཕྱག་འདབ་པདྨའི་འདབ་ལས་འཇམ།།

དུས་ཀྱི་བགྲོད་པས་དགུང་གྲངས་བརྒྱད་ཅུར་ཉེ།།

བཀའ་དྲིན་མཚུངས་མེད་ཡུམ་མཆོག་དེ་རིང་དྲན།།

།

བྱ་ཆེན་ཁྲི་འཕང་ནོར་བུ་བརྩེགས་པའི་གཞིར།།

ཤེས་རིག་ནོར་བུའི་དཔལ་ལ་འབད་ཅིང་དུང་།།

འཚོ་བཅུད་སྣུམ་པོས་ཁྱིམ་ཐབ་དྲོན་མོ་ཅན།།

བྱ་འཕུར་གདན་སའི་གཡང་ཁྱིམ་དེ་རིང་དྲན།།

།

ལྕགས་ཀྱི་གྲུ་བོར་ཞུགས་པའི་བར་སྣང་ནས།།

ཕ་ཁྱིམ་དྲན་པའི་སྨུག་པ་མཐུག་པོ་ཞིག།

སྟེས་དབང་བསེར་བུས་སྙིང་ཁར་འཐིབ་མ་ཐག།

ལག་འཁྱེར་ཁ་པར་གཞོང་དུ་དུ་ཡིག་འབྲུར་ཕབས།།

།

      ཕ་ཡུལ་བྲལ་ནས་མི་ཡུལ་དུ་བགྲང་བྱ་ཉི་ཤུ་ལྷག་འདས་པའི་རྒྱལ་ཁམས་པ་བྱ་འཕུར་དགེ་བཤེས་ལྷུན་གྲུབ་རྒྱ་མཚོས་སྤྲིན་གསེབ་ནས་མཐོང་བའི་རྔ་བ་ཞེས་པ་འདི་མེག་སི་ཀོ་ཟེར་བའི་རྒྱལ་ཁབ་ནས་ཕྱིར་ཨ་རིར་ལོག་པའི་གནམ་གྲུའི་ནང་ལག་འཛིན་ཁ་པར་ཐོག་བྲིས་ཏེ་སྤེལ། །