༧རྗེ་རིན་པོ་ཆེའི་གསོལ་འདེབས་ཐུགས་རྗེས་མྱུར་གཟིགས།
རྩོམ་ཡིག་འདི་ཐེངས། 703 བཀླགས་འདུག
།
ཨེ་མ་ཧོ།།
གང་ཐུགས་སྤྲོས་བྲལ་གཡོ་བ་མེད་པ། །
བསྐལ་བཟང་སྒྲོན་མེའི་བསྐལ་པར་བྱོན་པའི།།
དུས་གསུམ་ཕྱོགས་བཅུའི་སངས་རྒྱས་ཐམས་ཅད།།
སྙིགས་དུས་རྒྱལ་བ་གཉིས་པར་བསྟན་པ།།
མཉམ་མེད་ཤེས་རབ་རྒྱལ་མཚན་མཁྱེན་ནོ།།
ཞེས་ལན་གསུམ་རེ་བརྗོད།
།
གང་གསུང་བདེན་གཉིས་ཚད་གསུམ་ཟུང་འབྲེལ།།
བཀའ་འཁོར་ཐོག་མཐའ་བར་གསུམ་རང་བཞིན།།
བརྒྱད་ཁྲི་བཞི་སྟོང་ལུང་རྟོགས་ཀུན་འདུས།།
སྙིགས་དུས་སངས་རྒྱས་གཉིས་པར་བྱོན་པ།།
མཉམ་མེད་ཤེས་རབ་རྒྱལ་མཚན་མཁྱེན་ནོ།།
ཞེས་ལན་གསུམ་རེ་བརྗོད།
།
གང་སྐུ་བསླབ་གསུམ་རྣམ་པར་དག་པ།།
སྤང་བསྒྱུར་གྲོལ་བའི་ལམ་ཞུགས་དོན་རྟོགས།།
ཐེག་མཆོག་རྒྱལ་སྲས་སེམས་དཔའ་ཀུན་འདུས།།
སྙིགས་དུས་རྒྱལ་བ་གཉིས་པར་བསྟན་པ།།
མཉམ་མེད་ཤེས་རབ་རྒྱལ་མཚན་མཁྱེན་ནོ།།
ཞེས་ལན་གསུམ་རེ་བརྗོད།
།།
དེ་ནས་ནང་རྒྱུད་འབྲས་བུའི་ཐེག་པའི་ལུགས་བཞིན་གསོལ་བ་འདེབས་པ་ནི།
།
བྱིན་རླབས་རྩ་བ་དཔལ་ལྡན་བླ་མ།།
རྒྱལ་བ་དགོངས་རྒྱུད་གྲུབ་ཆེན་རིག་འཛིན།།
སྐུ་གསུམ་འབྱུང་གནས་བླ་མ་ཀུན་འདུས།།
སྙིགས་དུས་སངས་རྒྱས་གཉིས་པར་བསྟན་པ།།
མཉམ་མེད་ཤེས་རབ་རྒྱལ་མཚན་མཁྱེན་ནོ།།
ཞེས་ལན་གསུམ་རེ་བརྗོད།
།
མཐུ་སྟོབས་རྩ་བ་ཡི་དམ་ལྷ་མཆོག།
ཞི་ཁྲོ་ཕུར་གསུམ་མེ་སྟག་ཁྱུང་སོགས།།
གསང་གསུམ་བདག་ཉིད་ཡི་དམ་ཀུན་འདུས།།
སྙིགས་དུས་སངས་རྒྱས་གཉིས་པར་བསྟན་པ།།
མཉམ་མེད་ཤེས་རབ་རྒྱལ་མཚན་མཁྱེན་ནོ།།
ཞེས་ལན་གསུམ་རེ་བརྗོད།
།
འཕྲིན་ལས་རྩ་བ་མ་སྲིང་མཁའ་འགྲོ།།
ཡེ་ཤེས་རྫུ་འཕྲུལ་ལས་ལ་གྲུབ་པའི།།
གནས་གསུམ་མཁའ་འགྲོའི་རྒྱ་མཚོའི་མིང་གཅིག།
སྙིགས་དུས་སངས་རྒྱས་གཉིས་པར་བསྟན་པ།།
མཉམ་མེད་ཤེས་རབ་རྒྱལ་མཚན་མཁྱེན་ནོ།།
ཞེས་ལན་གསུམ་རེ་བརྗོད།
།
དེ་ནས་གསང་བ་བླ་མེད་ཐེག་པའི་ལུགས་བཞིན་གསོལ་བ་འདེབས་པ་ནི།
།
མི་གཡོ་སྤྲོས་བྲལ་གདོད་མའི་མགོན་པོ།།
སྐྱེ་མེད་སྟོང་ཆ་མེད་པ་ལྔ་ལྡན།།
བོན་སྐུ་ཀུན་ཏུ་བཟང་པོ་དངོས་བྱོན།།
སྙིགས་དུས་སངས་རྒྱས་གཉིས་པར་བསྟན་པ།།
མཉམ་མེད་ཤེས་རབ་རྒྱལ་མཚན་མཁྱེན་ནོ།།
ཞེས་ལན་གསུམ་རེ་བརྗོད།
།
འོག་མིན་འཐུག་པོ་བཀོད་པའི་ཞིང་དུ།།
འགག་མེད་ལྷུན་གྲུབ་ངེས་པ་ལྔ་ལྡན།།
རྫོགས་སྐུ་གཤེན་ལྷ་འོད་དཀར་དངོས་བྱོན།།
སྙིགས་དུས་སངས་རྒྱས་གཉིས་པར་བྱོན་པ།།
མཉམ་མེད་ཤེས་རབ་རྒྱལ་མཚན་མཁྱེན་ནོ།།
ཞེས་ལན་གསུམ་རེ་བརྗོད།
།
འཛམ་གླིང་རྟག་གཟིགས་འོལ་མོ་གླིང་དུ།།
གཉིས་མེད་གང་འདུལ་མ་ངེས་ལྔ་ལྡན།།
སྤྲུལ་སྐུ་བསྐལ་སྟོང་སངས་རྒྱས་དངོས་བྱོན།།
སྙིགས་དུས་རྒྱལ་བ་གཉིས་པར་བསྟན་པ།།
མཉམ་མེད་ཤེས་རབ་རྒྱལ་མཚན་མཁྱེན་ནོ།།
ཞེས་ལན་གསུམ་རེ་བརྗོད།
།།
ཡང་གསང་ལྷན་སྐྱེས་སེམས་ཉིད་ཀྱི་སྒོ་ནས་གསོལ་བ་འདེབས་པ་ནི།
།།
ཀ་དག་ཡེ་སྟོང་སྤྲོས་བྲལ་ཀུན་གཞི།།
མ་བཅོས་གཡེང་མེད་སྐྱོང་བའི་ལམ་མཆོག།
འབྲས་བུ་ལྷུན་གྲུབ་མཐར་ཕྱིན་སྐུ་གསུམ།།
སྙིགས་དུས་རྒྱལ་བ་གཉིས་པར་བསྟན་པ།།
མཉམ་མེད་ཤེས་རབ་རྒྱལ་མཚན་མཁྱེན་ནོ།།
།
ཞེས་ལན་གསུམ་རེ་བརྗོད་ཅིང་སྙིང་ཁོང་རུས་པའི་གཏིང་ནས་རྩེ་གཅིག་གསོལ་བ་དྲག་ཏུ་གདབ་ན། རྒྱལ་བ་མཉམ་མེད་ཆེན་པོ་སངས་རྒྱས་དངོས་སུ་ལགས་ཕྱིར། རང་རེའི་རྗེས་འབྲང་རྣམས་ལ་ཐུགས་རྗེ་ཡེ་ཤེས་སྤྱན་གྱིས་གཟིགས་པར་ཐེ་ཚོམ་མེད་དོ།།
།།
སྨོན་ལམ་ནི།
།།
ལྷ་ཡི་ལྷ་མཆོག་ཉིད་ལ་གསོལ་བཏབ་མཐུས།།
བསླབ་གསུམ་བོན་བསྟན་དར་རྒྱས་འཕེལ་བ་དང་།།
འདི་ཕྱིའི་དོན་གཉིས་ལྷུན་གྲུབ་མཐར་ཕྱིན་ནས།།
མཉམ་མེད་བླ་མའི་བསྟན་པ་རྒྱས་བྱེད་ཤོག།
ཅེས་བྱའོ།།
།།
སྤྱིར་རང་རེ་བོན་གྱི་བསྟན་པ་རྒྱ་ཆེ་མི་ཡོང་བ། སྤྱིར་བླ་མ་ལྷ་ཡི་གཙོ་བོར་བཟུང་སྟེ་གསོལ་བ་གདབ་མ་ནུས་པ་དང་། རྩ་བའི་བླ་མའི་བཀའ་དམ་ལ་མ་སེམས་པའི་སྐྱོན་ཡིན་འདུག་པས། རྗེས་འཇུག་རྣམས་ལུས་སྲོག་ལོངས་སྤྱོད་གཏམ་དང་སྙན་གྲགས་ལུས་སྲོག་གང་ལ་ཐུག་ཀྱང་། བླ་མའི་དམ་ཚིག་གཙོར་འཛིན་ནས། གསོལ་འདེབས་བླ་མའི་རྣལ་འབྱོར་ལ་བརྩོན་པར་ཞུ་ཞུ།
།།
ཞེས་པ་ཉམས་སུ་ལེན་པ་སྒོ་རིགས་མཁན་མིང་ཉི་མ་བསྟན་འཛིན་གྱིས་གཡས་རུ་མཁར་སྣའི་རི་ཁྲོད་དུ། མཉམ་མེད་ཆེན་པོ་སངས་རྒྱས་དངོས་སུ་ཡིན་པ་དེ་བཞིན་དད་འདུན་དྲག་པོ་ཤར་ཏེ་བརྩམས་པའི་དགེ་དེས་བོན་བསྟན་རྒྱས་གྱུར་ཅིགཐ་ཚན་མུ་ཙུག་སྨར་རོ།།
།
བསམ་ཚུལ་ཕྲིས།