ཤིང་དཔར་ཆེན་མོ་འཛམ་གླིང་རྒྱན་གཅིག་གི་ལས་གཞིའི་གནས་ཚུལ།

རྩོམ་ཡིག་འདི་ཐེངས། 881 བཀླགས་འདུག

སྔོན་རྒྱལ་རོང་ཁྲོ་སྐྱབས་རྒྱལ་པོའི་རིང་ལ་སངས་རྒྱས་གཡུང་དྲུང་བོན་གྱི་བཀའ་རིན་པོ་ཆེ་ཆ་ཚང་ཤིང་དཔར་ཏུ་བཏབ་སྟེ་འགྲེམས་སྤེལ་བྱས་ཡོད་ནའང་། ཕྱིས་ཀྱི་རིག་གསར་བརྗེས་ཀྱི་སྐབས་སུ་རྐྱེན་དབང་གིས་དཔར་ཤིང་ཡོངས་རྫོགས་བོར་བརླག་ཏུ་གྱུར་ཏེ་མི་རིགས་རིག་གནས་ལ་གོད་ཆགས་ཚབས་ཆེན་ཐེབས། ཉེ་ཆར་རྨ་ལྷོ་གངས་རྒན་རིག་གནས་དར་སྤེལ་ཚད་ཡོད་ཀུང་ཟིའི་སྤྱི་གཉེར་བ་གནམ་ལྷ་བཀྲ་ཤིས་ལགས་ཀྱིས་ཕྱོགས་སོ་སོའི་བླ་མ་དགེ་བའི་བཤེས་གཉེན་དང་ཆེད་མཁས་སློབ་དཔོན་ཆེན་མོ་མི་ཉུང་བ་ཞིག་ལ་དངོས་ཤུགས་བརྒྱུད་གསུམ་གང་རུང་གིས་སྙན་ཞུ་དང་བཀའ་འདྲི་གནང་སྟེ༼བོད་ཀྱི་ཐོག་མའི་རིག་གནས་མྱུར་སྐྱོབ་ཤིང་དཔར་ཆེན་མོ་འཛམ་གླིང་རྒྱན་གཅིག༽ཅེས་སངས་རྒྱས་གཡུང་དྲུང་བོན་གྱི་བཀའ་རིན་པོ་ཆེ་པོད་ ༡༧༨ བཞུགས་པ་ ༢༠༡༦ ལོའི་ཟླ་བདུན་པར་རེབ་གོང་ས་ཁུལ་ནས་པར་བརྐོའི་ལས་གཞི་དངོས་སུ་འགོ་རྩོམ་རྒྱུ་རེད། སྤྱིར་གཡུང་དྲུང་བོན་གྱི་རིག་གནས་ནི་བོད་རང་ས་ནས་དར་བའི་ཡ་ཐོག་བོད་མིའི་བློ་གྲོས་ཀྱི་རྩལ་ལས་བྱུང་བའི་རིག་གནས་གལ་ཆེན་ཞིག་ཡིན་པས། དེང་གི་ཆར་ཡང་རྒྱལ་ཕྱི་ནང་གི་ཆེད་མཁས་ཞིབ་འཇུག་པ་མང་པོ་ཞིག་གིས་ཞིབ་འཇུག་དཔྱད་འབྲས་ལྟར་ན། བོན་གྱི་རིག་གནས་ནི་འཛམ་གླིང་རིག་གནས་ཀྱི་བྱུང་ཁུངས་ཡིན་པར་ངོས་འཛིན་གནང་ཡོད་ལ། བོད་མི་ཀུན་གྱིས་རང་གི་རིག་གནས་འདི་ལ་དོ་སྣང་དང་སྲུང་སྐྱོབ་བྱ་རྒྱུ་ནི་ཁ་ཚ་དགོས་གཏུག་ཏུ་གྱུར་བའི་གནད་དོན་ཞིག་ཡིན། དེ་བས་རྨ་ལྷོ་གངས་རྒན་རིག་གནས་དར་སྤེལ་ཚད་ཡོད་ཀུང་ཟིའི་སྤྱི་གཉེར་བ་གནམ་ལྷ་བཀྲ་ཤིས་ལགས་ཀྱིས་ཞང་བོད་རིག་གནས་སྲུང་སྐྱོབ་དང་བོད་རང་གི་སྲོལ་རྒྱུན་ཤིང་དཔར་ལག་རྩལ་མི་ཉམས་རྒྱུད་འཛིན་དར་སྤེལ་གཏོང་བར་དམིགས་ནས་མ་བསྐུལ་དང་བླངས་སྒོས་བླ་ན་མེད་པའི་ལས་གཞི་ལྕི་མོ་འདི་ཉིད་རང་གི་ཕྲག་ཏུ་བཞེས་པ་རེད། གོ་ཐོས་ལྟར་ན་ཧ་ལམ་ལོ་ངོ་བཅོ་ལྔ་ཙམ་གྱི་རིང་ལ་ལས་ཡུན་སྐྱོང་དགོས་པ་མ་ཟད་དཔལ་འབྱོར་གྱི་ཐད་ནས་ཀྱང་ཕལ་ཆེར་དམངས་སྒོར་ཁྲི་སྟོང་ཚོ་ཉེར་བརྒྱད་ཡས་མས་ཀྱི་འགྲོ་སོང་ཡོད་པས་ལས་གཞི་འདི་ལ་མཚོན་ན་གཞི་རྒྱ་ཤིན་ཏུ་ཆེ་ཞིང་སྔར་བོད་ཁམས་ནས་བྱུང་མྱོང་མེད་པའི་ལས་གཞི་ཆེན་པོ་ཞིག་ཏུ་ཆགས་འདུག