ཚིག་འདི་ཚོ་སེམས་ཀྱིས་བཞེས་རོགས།
རྩོམ་ཡིག་འདི་ཐེངས། 350 བཀླགས་འདུག
/
རྒྱ་ཧེ་ཧྭེའི་ཚོང་ར་ནང་ན།།
བོད་གླེན་པ་བརྒྱ་ཚོགས་སྟོང་འདུས།།
ལོ་གཅིག་ལ་འབད་པས་བསོག་དངུལ།།
ཉིན་གཅིག་གི་སྡེར་ཁ་བརྗེས་ཐ།།
ཚེ་གཅིག་གི་སྐྱ་ཡའི་ཆེད་ལ།།
རྡོ་བྱུ་རུའི་རིན་གོང་མཐོ་རུང་།།
ཡུལ་ཕ་མའི་ཚེ་བསོག་ཚང་མ།།
རྒྱ་ཁེ་བའི་ལག་ནས་ཚར་ཐལ།
བུ་བུ་མོ་རང་འཐད་ཡིན་ན།།
རྡོ་བྱུ་རུའི་རྫོང་བ་མི་དགོས།།
དུས་མ་འོངས་བདེ་སྐྱིད་ཟེར་བ།།
རྡོ་བཏགས་ནས་ཡོང་ས་མ་རེད།།
བྱམས་སྙིང་རྗེ་ཡོད་དགོས་ཟེར་བཞིན།།
བོད་སྤུན་ཟླའི་སྒོ་སྡུག་བཅད་ཐལ།།
ནོར་ར་ལུག་བཤས་རར་དེད་ནས།།
སྐེ་གཤགས་ནས་ངན་གསོད་བྱས་ཐལ།།
གོང་དམའ་རུང་རྒྱ་བཙོང་བྱས་ནས།།
རིན་མཐོ་རུང་ཕྱིར་ཉོ་བྱེད་ཀྱི།།
བྱམས་སྙིང་རྗེ་ངོ་མ་ཡོད་ན།།
ཤ་ཟ་བའི་སྦྱོད་ངན་སྤངས་རོགས།།
ཤ་ཚོན་པོ་ཟ་ན་འདོད་བཞིན།།
དགེ་མེད་པས་སྒོ་སྡུག་མ་གཅོད།།
རྒྱ་ཚོང་བས་ལྐོག་ཇུས་ཤེས་བཞིན།།
སྡུག་ཐང་ནས་ཐོད་པ་མ་འཇོག།
སྤྱིར་རང་ཅག་བོད་པ་ཚང་གིས།།
རིན་གང་མཐོ་གང་བཟང་ཐམས་ཅད།།
གོང་ཕྱིན་ནས་མི་ཉོ་རྒྱུ་ན།།
རྒྱུ་རྩ་ཆེན་གང་ལེགས་ཐམས་ཅད།།
རིན་ཇེ་དམའ་འགྲོ་རྒྱུ་ལེ་ཡོད།།
བོད་སྒོ་ཟོག་རྟ་ནོར་ལུག་གསུམ།།
ཟས་བཅུད་ཆེན་མར་ཕྱུར་རྩམ་གསུམ།།
གཏེར་རིན་ཆེན་གསེར་དངུལ་ཟངས་ལྕགས།།
ལྭ་རྩ་ཆེན་ཚ་རུ་པགས་པ།།
ཨ་ཤུ་རེ་མི་བཙོང་རྒྱུ་ན།།
རྒྱུ་རྩ་ཆེན་ཡིན་ནོ་ལོས་ཤེས།།
རྒྱ་ཁེ་བས་དོ་སྣང་ལོས་བྱེད།།
རྒྱ་ཧེ་ཧྭེའི་སྣང་བ་ཇེ་མཐོ།།
བོད་རང་ཚུགས་ཡོད་ནོ་ལོས་བསྟོད།།
རྗེ་བླ་མ་བྱིན་རླབས་ཅན་པོ།།
གོང་དཔོན་པོ་ཚེ་བསོད་ཅན་པོ།།
བོད་སྤུན་ཟླ་ནང་མཐུན་ཅན་པོ།།
ཇུས་ཡག་ཐོག་གཅིག་ལ་བཞག་ནས།།
ཚིག་དོན་ཐོག་གཅིག་ནས་བསྡད་ནས།།
གོང་དམའ་མོའི་རང་ནོར་མ་བཙོང་།།
རིན་མཐོ་ན་གཞན་རྫས་མ་ཉོ།།
བོད་བཙན་པོའི་བུ་རྒྱུད་ཡིན་ན།།
རྒྱ་ཁེ་བས་ལག་ནས་མ་འཆི།།
འབའ་འབྲོག་ཕྲུག་ཤ་ཚའི་སྙིང་གཏམ།།
ཆང་བདུད་རྩི་ཞིག་གི་ཚབ་ཏུ།།
ལོ་གསར་བར་ལེགས་སྐྱེས་ཕུལ་ན།།
བོད་གངས་ཅན་སྤུན་ཟླ་ཡོངས་ཀྱིས།།
ཚིག་འདི་ཚོ་སེམས་ཀྱིས་བཞེས་རོགས།
བསམ་ཚུལ་ཕྲིས།