གངས་ཁྲོད་ནས་ལྡིང་བའི་ཁྱུང་ཆེན།
རྩོམ་ཡིག་འདི་ཐེངས། 945 བཀླགས་འདུག
/
ཏི་སེ་གངས་ཀྱི་རྭ་བའི་མཐིལ་དུ་སྤྲེལ་རྒན་རྔ་མ་མ་ཆད་གོང་།།
མ་པང་གཡུ་མཚོའི་རླབས་ཞགས་འགྲོགས་པའི་རིག་པའི་ཟུངས་ཁྲག་རྒྱས་པའི་བུ།།
བླ་བྲག་རྟ་སྒོའི་ཚེ་སྲོག་མཉམ་པའི་མེས་པོའི་གྲུབ་མཐའ་གཡུང་དྲུང་བོན།།
འཛིན་སྐྱོང་སྤེལ་བའི་སྙིང་སྟོབས་ཟླ་མེད་སྨྲ་བའི་སེང་གེ་གཙུག་ན་རྒྱལ།།
/
དཀར་ནག་རྒྱ་ཡི་མཆན་བུས་མ་ལྷད་དྲག་ཆར་རླུང་གིས་མ་བཅོམ་ཞིང་།།
བླ་རི་ཏི་སེའི་རིག་པའི་བཞིན་རས་མ་བསྒྲིབས་རྗེན་གཅེར་གསལ་བ་ཡི།།
བེམ་གཟུགས་མིན་པའི་སྨྲ་ཤེས་དོན་གོའི་ཞང་བོད་ཚིག་མཛོད་རྙིང་པ་སྟེ།།
མཁན་རབས་གསུམ་གྱིས་གཙུག་ཏུ་བཀུར་བའི་ཡོངས་འཛིན་ཆེན་མོ་ཨེ་མ་ཧོ།།
/
ལྷ་འདྲེ་མཐོང་བའི་མངོན་ཤེས་རྫུན་མས་ཡོན་བདག་ཁྱིམ་ཕུག་མ་བྲུས་ཤིང་།།
བརྒྱ་ལོ་དམར་པོའི་བསྔོ་རྟེན་དོན་དུ་རོ་མགོར་འགྲན་རྩོད་མ་བྱས་པ།།
གོ་ལའི་ཐོག་ཏུ་ཞྭ་དཀར་བོན་ཞེས་གནམ་སྤེལ་ས་སྤེལ་མཛད་པ་ཡི།།
བཀའ་དྲིན་དྲན་པའི་རྟོགས་བརྗོད་མཚོ་རླབས་ཡ་ཆུང་སྨུག་པོའི་སྦུབས་ནས་འཕྱུར།།
/
ཉུངས་དཀར་འབྲུ་ལ་ལྷུན་པོ་འུར་བའི་རབ་བཏགས་ཚིག་རྒྱན་འདི་ན་མིན།།
དངོས་བྱུང་རིག་པའི་ར་བ་བརྒལ་བའི་རྫུན་གཏམ་སྙན་ངག་དེ་བས་མིན།།
དབང་མངོན་ཚད་མའི་ཡུལ་དུ་གྱུར་པའི་རླབས་ཆེན་མཛད་ཕྲིན་ཆེ་ལོང་ཙམ།།
གོ་སླའི་ཚིག་གི་སྒྱུ་རྩལ་ལ་བརྟེན་སོར་རྩེའི་གར་སྟབས་བསྒྱུར་ལ་རངས།།
/
སྤུ་རྒྱལ་བཙན་པོའི་སྙིང་ཁམས་དཀྲུག་དུས་བན་བོན་བར་གྱི་གྱོད་གཞི་ལངས།།
ཏི་པོམ་ཐང་གསུམ་ཐུགས་ཡིད་འཁྲུགས་ནས་བོད་ཡུལ་རུ་བཞི་ནད་ཀྱིས་གདུངས།།
བསམ་ཡས་མཁན་པོའི་ཆོས་ཞེན་དབང་གིས་བཙན་པོའི་སྙིང་ཁམས་མདའ་ཡིས་གཏོར།།
གདོང་དམར་བོད་ཀྱི་བསྟན་སྲིད་མངའ་ཐང་ཡར་ཀླུང་གཙང་པོའི་ཁ་རུ་བསྟབས།།
/
བཙ༵ན་ཚོད་མེད་པའི་བཙ༵ན་པོ་ཚང་གི་བཙ༵ན་རྒོད་དེ་ཚོ་རྩ་འཕར་ནས།།
གྱེ༵ར་གཤེན་དཔའ་བོ་གྱེ༵ར་སྤུངས་ཆེན་པོ་གྱེ༵ར་བསྟན་དོན་དུ་ངུ་རུ་བཅུགས།
མཐུ༵་སྟོབས་ཆེ་བའི་མཐུ༵་ཆེན་མི་དགུས་མཐུ༵་དཔུང་སྨོན་ལམ་བཏབ་པའི་མཐུས།།
བླ༵་ན་མེད་པའི་བླ༵་ཆེན་དྲན་པ་བླ༵་རྒན་ཉིད་ཀྱི་གཟུགས་སུ་ཤར།།
/
དཔའ་བོ་རྒྱ་མཚོའི་ཚོགས་ཀྱི་གྲལ་ནས་ཞང་བོད་རིག་གཞུང་ངས་འཛིན་ཞེས།།
ཕྱག་གཉིས་ཕུ་དུང་གྱེན་དུ་བརྫེས་ནས་དམ་བཅའི་རྒྱལ་དར་མཁའ་ལ་ཕྱར།།
མཁའ་སྤྱོད་བདེ་ཆེན་དག་པའི་ཞིང་ནས་ཁྱུང་ཡུལ་ཕྱོགས་སུ་བང་བརྒྱུགས་བསྲེས།།
རིགས་བཟང་དྲེ་ལྡོང་འཚོས་པའི་སྲས་སུ་སྐུ་མཆོག་མཚན་དཔེའི་མེ་ཏོག་བཞད།།
/
ནོར་གནག་ཕྱུགས་ཀྱིས་རི་ལུང་གང་ཞིང་རྒྱུ་ནག་བང་མཛོད་གྲངས་བརྒལ་བའི།།
ཁྱོ་ཤུག་རྫིག་པོའི་བུ་རྒྱུད་མཐོང་ཚེ་རང་གི་སྐྱེ་གནས་མི་ཤེས་ཀྱང་།།
བླ་ཆེན་གོང་མའི་ཡང་སྲིད་འུར་ནས་གོས་ཆེན་སྦུབས་སུ་བསྙལ་བ་ཡི།།
བསྟན་ངོ་མི་ཤེས་རྒྱུ་ངོ་ཤེས་པའི་ཆབ་སྲིད་སྤྲུལ་སྐུ་ཁྱེད་ཉིད་མིན།།
/
མངལ་གྱི་སྦུབས་རྒྱ་གྲོལ་མ་ཐག་ནས་རླབས་ཆེན་ཁྱུང་གི་ཕྲུ་གུ་བཞིན།།
ངེས་འབྱུང་སེམས་ཀྱི་གཤོག་དྲུག་རྒྱས་ཏེ་ཞེན་ཆགས་ཁྱིམ་གྱི་སྒོང་ཤུན་གཤག།
བཟོ་རྩལ་རི་མོའི་སྤར་མོ་བགྲད་ནས་འབྲི་ཀློག་ནོར་བུའི་གཏེར་ཁ་བླངས།།
ལོ་རྒྱུས་རིག་པའི་གསོན་ཤུགས་བསླབས་ནས་བཅུ་རིག་མཁའ་ལ་ལྡིང་འགོ་བཙུགས།།
/
བྱ་རྒོད་རྙི་ལས་ཐར་བ་བཞིན་དུ་དབུས་གཙང་ནམ་མཁའི་མཐོངས་ལ་རྒོལ།།
ཐོས་བསམ་སྒོམ་པའི་ལྡིང་སྐོར་གཅིག་གིས་རབ་འབྱམས་དཔག་བསམ་རྩེ་ལ་འཛེགས།།
སློབ་དཔོན་ཆེན་པོའི་ཅོད་པན་འཆང་ནས་འཆད་རྩོད་རྩོམ་པའི་སྒྲོ་གུར་འཛུམ།།
སྣང་ཁམས་སྤྱི་རྒྱ་རླབས་ཀྱིས་གཅོད་པའི་རིག་པའི་ཁྱུང་ཆེན་ཁྱེད་འདྲ་སུ།།
/
ཐོད་དཀར་སྲས་པོས་ཇི་ལྟར་གསུངས་བཞིན་ལུང་གི་བོན་ལ་འཆད་ཉན་བྱས།།
གྲུབ་ཆེན་བརྒྱད་ཅུས་ཇི་ལྟར་བསྒོམས་བཞིན་རྟོགས་པའི་བོན་ལ་ཉམས་ལེན་མཛད།།
མཉམ་མེད་བླ་མས་ཇི་ལྟར་མཛད་བཞིན་བསླབ་གསུམ་བསྟན་པའི་རྒྱལ་མཚན་ཕྱར།།
ཡོངས་འཛིན་གོང་མའི་ཇི་ལྟར་གདམ་བཞིན་བཤད་སྒྲུབ་བསྟན་པའི་མེ་ཆེན་སྤར།།
/
སྤང་ལམ་མདོ་ཡི་བསྟན་པ་སྤེལ་ཚེ་གཙུག་གཤེན་རྒྱལ་བའི་གཟི་བརྗིད་ངོམས།།
སྒྱུར་ལམ་སྔགས་ཀྱི་གཞུང་ལུགས་འཆད་ཚེ་ཡུམ་སྲས་གཤེན་གྱི་དོ་ཟླ་བྱེད།།
གྲོལ་ལམ་བསྟན་པའི་རྒྱལ་མཚན་ཕྱར་དུས་འཕོ་ཆེན་ཉེར་བཞིའི་རྟུལ་ཤུགས་རྫོགས།།
རྒྱུ་ཐེག་བཞི་ཡི་ཕྱག་ལེན་སྐྱོང་དུས་གཙུག་ཕུད་གཤེན་བཞིའི་ཟློས་གར་བསྒྱུར།།
/
མེ་ལྕེ་དམར་པོས་གངས་རི་བཞུས་དུས་གངས་སྦུབས་ཁྲོད་ཀྱི་དགེ་སློང་འགས།།
དམར་སེར་རྒྱན་དྲུག་དྲུད་མཚམས་བཞག་ནས་སྟོད་གསིག་ར་ཧོ་ལང་བཞིན་བྱས།།
གྲྭ་གྲི་སོར་གསུམ་གློ་ནས་གཡུགས་ཏེ་རལ་གྲི་ཁྲུ་གསུམ་སྐེད་ལ་གཟེར།།
བོན་གཤེན་རིག་འཛིན་དོམ་སྒྲོའི་ཕྱོགས་སུ་བྲོས་བྱོལ་རིམ་པ་གཉིས་པའི་སྐབས།།
/
སྟག་གཟིག་ལྟ་བུའི་ཕོ་རྒོད་དེ་ཚོས་ཁ་ཕོར་ཤོར་ནས་བྲོས་ཤུལ་དུ།།
མེ་སྒྱོག་མེ་མདས་རང་ལུས་གཏོར་ཏེ་ཤ་ཁྲག་ས་ལ་བྱེར་བཞིན་ངང་།།
ཤ་དམར་ལག་པས་ལྕགས་དམར་འཇུས་ཏེ་བལ་བོད་བར་གྱི་ལ་རྒོད་ནས།།
མཉམ་མེད་གདུང་དང་རྟེན་མཆོག་གསུང་རབ་ཁུར་དྲུད་པང་གསུམ་མཛད་ནས་ཕེབས།།
/
ཕྱོགས་ལྷུང་གདོན་གྱིས་ཁྲག་རྩ་སྦོས་པའི་ཆེས་མཐོའི་སྐུ་དྲག་ཕོ་མོ་འགས།།
གཡོ་ཐབས་སྲིད་ཀྱི་འཕྲུལ་འཁོར་བསྐོར་ཏེ་ཞྭ་དཀར་བོན་དང་བཀའ་རྙིང་ས།།
ཞྭ་སེར་བསྒྱུར་བའི་ཇུས་ངན་བཤམས་དུས་སྟག་རྒོད་ཁྱུ་དང་དཔུང་སྦྲེལ་ཏེ།།
རང་དབང་འགོག་པའི་བཀག་རྡོ་དེ་ཉིད་བཅུ་གསུམ་ཐོག་གིས་ཏག་ཏག་བཟོས།།
/
ལོ་རབས་སྟོང་གི་ལོ་རྒྱུས་ཁྲོད་དུ་མཁས་བླུན་གང་གིས་མ་བཅོས་པའི།།
དུ་དྲེག་ཁྲོད་དུ་སྐུ་མཚམས་བཞུགས་པའི་གློ་དོལ་ཕྱོགས་ཀྱི་བོན་དཔེ་ཁག།
ཚན་རྩལ་རིག་པའི་འཕྲུལ་པར་བཏབ་ནས་འཛམ་གླིང་དཔེ་མཛོད་གང་སར་བཀྲམ།།
ནུབ་ཕྱོགས་པ་ཡིས་བོན་ལ་བལྟ་བའི་རྒྱང་ཤེལ་དྲུང་མ་ཁྱེད་ཀྱིས་བཟོས།།
/
ཁ་དང་གྲོད་ཁོག་གཅིག་པུ་འབྱར་བའི་བྱེས་ཀྱི་དྭ་ཕྲུག་འཁྱམས་པོ་ཁག།
ལྟོག་ཤི་ཐེབས་ལ་ཉེ་བའི་དུས་སུ་འབྱོར་ལྡན་མི་སྣ་གྲོགས་བཀུག་སྟེ།།
འཕགས་ཡུལ་འཛིན་མའི་བྱང་ཟུར་ཞིག་ཏུ་ཞྭ་དཀར་བོན་གྱི་ཁྱིམ་གཞིས་བཙུགས།།
ཐོབ་རྒྱལ་གསར་པའི་འདུས་སྡེ་བཏབས་ནས་རྒྱལ་བ་སྨན་རིའི་ཁྲི་འཛིན་བསྐོས།།
/
གོང་གི་མཁས་རློམ་སྟག་སེང་དར་མའི་དཀའ་གནད་འདྲི་ས་ཁྱེད་གཅིག་པུ།།
འོག་གི་ཁྱིམ་ཚང་ཁ་མཆུ་ཐུག་ཚེ་བདེ་སྡུག་ཞུ་ས་ཁྱེད་གཅིག་པུ།།
བར་གྱི་གྲྭ་བཙུན་གྲོད་ཁོག་ལྟོག་ཚེ་ཕོར་བ་བཟེད་ས་ཁྱེད་གཅིག་པུ།།
ཁྱེད་ནི་ངོ་མ་བོན་འབངས་ཡོངས་ཀྱི་ཕ་མའི་ནང་གི་ཕ་མ་ཞིག།
/
ས་ཕག་དུས་འགྱུར་རླུང་ནག་འཚུབ་མས་བཤད་སྒྲུབ་མཁར་རྨེང་བསྒྱེལ་དུས་ན།།
ཐོབ་རྒྱལ་གསར་པའི་འདུས་སྡེའི་མགུལ་ནས་འཆད་རྩོད་རྩོམ་པའི་གད་རྒྱངས་བསྒྲོགས།།
རང་བྱུང་མཆོད་རྟེན་དཀར་པོའི་ཡུལ་དུ་བོན་བསྟན་ཁྲག་རྩ་སྐམ་པའི་ཤུལ།།
དགོངས་གཞི་གསུམ་གྱིས་ཆག་ཐིག་བཏབ་སྟེ་ཁྲི་བརྟན་ནོར་རྩེའི་མཁར་རྫོང་བརྡུངས།།
/
གངས་དཀར་ཏི་སེའི་བླ་ཚེ་འཚོ་བའི་བཤད་སྒྲུབ་བསྟན་པ་ཕྱོགས་བཅུར་སྤེལ།།
ནུབ་ཕྱོགས་མཁས་པའི་ཀླད་ཆེན་ནང་དུ་ཞང་བོད་རིག་པའི་རྩ་སྒོ་བཙུགས།།
མཉམ་མེད་བླ་མའི་ཁྱིམ་གཞིས་སྐྱོང་བའི་དགེ་བཤེས་ས་སྟེང་གང་བར་བྱས།།
ཐོད་དཀར་སྲས་པོའི་རིང་ལུགས་ལྷད་མེད་བུ་སློབ་ལག་ཏུ་རྡོག་གེར་བཞག།
/
དྲན་དབང་ཕལ་གྱིས་མ་དཔྱད་བཞག་པའི་གསང་བ་སྔགས་ཀྱི་མཆན་འགྲེལ་བཏབ།།
རྩིས་པ་ཕལ་ཆེར་མགོ་བོ་འཁོར་བའི་གཤེན་གྱི་འཁྲུངས་ཚེས་ངོ་སྤྲོད་མཛད།།
ལྷ་བཟོ་ཕལ་ཆེར་ཕྱག་ཉེས་ཤོར་བའི་སྟོན་པའི་ཕྱག་མཚན་ལུང་མཐུན་བྱས།།
རྟོག་གེ་ཕལ་ཆེར་གཞན་རྗེས་འབྲང་དུས་རང་གཞུང་ཁུངས་མའི་ཡིན་ལུགས་བཀྲལ།།
/
ཚན་རྩལ་རིག་པའི་ཀླད་ཆེན་རྒྱས་པའི་སྐྲ་སེར་སྤྲེའུའི་གླིང་ཆེན་དུ།།
སེམས་ཁམས་ཞི་བདེའི་ཁོ་ལག་སྐྲུན་པའི་གཤེན་བསྟན་དར་རྒྱས་གླིང་ཆེན་བཏབ།།
ཐོག་མཐའ་བར་གྱི་གཉན་འཕྲང་ཁྲོད་དུ་བོན་གྱི་རང་མདངས་མ་ཉམས་པའི།།
ཞང་ཞུང་སྒོ་པའི་རྫོང་ཆེན་ནང་དུ་ལྷ་བྲིས་སྨན་གྱི་སློབ་གླིང་བཙུགས།།
/
ཁྱུང་དཀར་རྒྱལ་པོའི་མ་དགོན་ཆེན་མོ་དུས་འགྱུར་རླུང་གིས་སྤུར་བའི་ཤུལ།།
མཁས་གྲུབ་ཤེས་དགེ་བསྟན་བདག་བསྐོས་ནས་དགོན་སྡེ་སྐྲུན་པའི་བཀའ་དཀོད་མཛད།།
མཁན་རབས་ཉི་ཤུ་རྩ་བདུན་པ་དང་མ་གྲོས་ཐུགས་ཡིད་གཅིག་མཐུན་ཏེ།།
བསྟན་པའི་བླ་སྲོག་འཆད་ཉན་གཟིགས་ཏེ་བཤད་གྲྭ་ཆེན་མོ་དབུ་འཛུག་གནང་།།
/
ཕྱོགས་མེད་རྒྱས་པའི་དག་སྣང་ཡིན་ནམ་བླུན་རྟགས་ཕྱི་རུ་སྟོན་པ་གང་།།
རིམ་པ་དགུ་ཡི་ར་བ་བརྒལ་བའི་ཛ་ཧོ་བམ་ཧོའི་ལམ་ལུགས་འདིར།།
བཀའ་ལུང་ཚད་མ་དཔང་དུ་བཙུགས་ཏེ་སྲེག་བཅད་བརྡར་བའི་གསེར་བཞིན་དུ།།
རང་གཞུང་ཁུང་མའི་ཡིན་ལུགས་བཀྲལ་བའི་གསུང་འབུམ་ཚེས་ཀྱི་གྲངས་ལས་བརྒལ།།
/
སངས་རྒྱས་བཀའ་ཡི་རྒྱབ་བརྟེན་མེད་ན་ཡིད་ཆེས་མེད་པའི་མཚན་ཉིད་པ།།
མཐོང་ཚད་ལེན་པའི་ཨ་གསར་མེད་པའི་རང་ཚུགས་ཐུབ་པའི་དྲང་སྲོང་བ།།
རིས་སུ་མེད་པའི་གྲུབ་མཐའ་ཀུན་གྱི་གཞུང་ལུགས་ལྟ་བའི་ཞིབ་འཇུག་པ།།
མཐོན་པོའི་ཁྲི་ལ་སྔར་ནས་འཁོད་ཀྱང་དྲེགས་ཉམས་མེད་པའི་དགེ་སྦྱོར་བ།།
/
ཁྱེད་ཀྱིས་དྲང་བདེན་ལོ་རྒྱུས་འཆད་ཚེ་ནུབ་ཕྱོགས་མཁས་པའི་ང་རྒྱལ་ཆོམ།།
ཁྱེད་ཀྱི་རྩོད་པའི་རིག་ལམ་མཐོང་ཚེ་ལྷ་རམས་དགེ་བཤེས་དྲན་པ་འཐོར།།
ཁྱེད་ཀྱི་རྩོམ་པའི་སྒྱུ་རྩལ་མཐོང་ཚེ་སྨྱུག་ཐོགས་ཕར་ཆེར་མིག་ཆུ་ཤོར།།
ཁྱེད་ཀྱི་ཆོ་གའི་གྱེར་དབྱངས་ཐོས་ཚེ་དྲེགས་ཆེན་དབུ་མཛད་ང་རོ་ཞི།།
/
ཁྱེད་ཀྱི་དཀའ་དཔྱད་སྙིང་རུས་མཐོང་ཚེ་ང་ཚོའི་ཨུ་ཚུག་རྨི་ལམ་བཞིན།།
ཁྱེད་ཀྱི་སྣ་བརྒྱའི་ཡོན་ཏན་མཐོང་ཚེ་དྲན་དབང་ཕལ་ཆེར་ཁུག་སྟོང་བཞིན།།
ཁྱེད་ཀྱི་སྒོམ་སྒྲུབ་ཉམས་ལེན་མཐོང་ཚེ་སྒོམ་ཆེན་ཕལ་ཆེར་ནད་པ་བཞིན།།
ཁྱེད་ཀྱི་བསྟན་པའི་ཕྱག་རྗེས་མཐོང་ཚེ་བླ་སྤྲུལ་ཕལ་ཆེར་གཟུགས་བརྙན་བཞིན།།
/
ཁྱེད་ཀྱི་ཡོན་ཏན་ཇི་ཙམ་བརྗོད་ཀྱང་ནམ་མཁའ་བཞིན་དུ་ཕ་མཐའ་བྲལ།།
ཁྱེད་ཀྱི་མཛད་ཕྲིན་ཇི་ཙམ་བགྲངས་ཀྱང་སྐར་ཚོགས་བཞིན་དུ་གྲངས་ལས་འདས།།
ཁྱེད་ཀྱི་བསྟོད་པ་ཇི་ཙམ་བྲིས་ཀྱང་དེ་ཙམ་འབྲི་རྒྱུ་མང་དུ་ལྷག།
ཁྱེད་ཀྱི་རྟོགས་བརྗོད་ཚུལ་བཞིན་བྲིས་ན་གླེགས་བམ་མི་ཡུལ་ཤོང་ཐབས་བྲལ།།
/
འོད་དཀར་དཔག་མེད་ཚེ་བུམ་ཐོགས་ནས་བསྟན་འཛིན་འདི་ཡི་སྐུ་ཚེ་སྲིངས།།
སྡེ་དྲུག་སྲུང་མའི་མངོན་སྤྱོད་རོལ་པས་བསྟན་འཛིན་འདི་ཡི་གནོད་བྱེད་སྒྲོལ།།
པོམ་རྟ་སྒྲ་གསུམ་ཐུགས་དམ་མ་གཡེལ་བསྟན་འཛིན་འདི་ཡི་ཁ་འཛིན་མཛོད།།
སྤྱི་བོ་གནམ་གཏད་བོན་འབངས་ཡོངས་ཀྱིས་བསྐལ་བརྒྱར་བཞུགས་པའི་གསོལ་བ་ཐོབས།།
/
སྔོན་བསགས་ལས་ཀྱི་བསོད་ནམས་སྟོབས་ཀྱིས་བླ་མ་མཆོག་གི་འཁོར་དུ་སྐྱེས།།
སྒོ་གསུམ་གུས་པའི་ཨ་ལོང་སྣེ་རུ་ཐུགས་རྗེའི་ལྕགས་ཀྱུ་མྱུར་དུ་ཐེབས།།
དད་གུས་ཡིད་ཀྱི་རྦ་ཀློང་འཁྲུགས་ཏེ་བསྟོད་ཚིག་ཟེགས་མ་འཐོར་བ་འདི།།
རྒྱལ་བ་ཁྱེད་ཀྱི་གསང་གསུམ་མཛད་ཕྲིན་བསྐལ་བརྒྱར་བརྟན་པའི་རྒྱུ་གྱུར་ཅིག།
/
བསམ་ཚུལ་ཕྲིས།