སྙིང་གི་ཕྱེ་མ་ལེབ།

རྩོམ་ཡིག་འདི་ཐེངས། 1408 བཀླགས་འདུག

།

ཁྲོམ་ཚོགས་སྤང་ཐང་ཡངས་མོ་ནས།།

མེ་ཏོག་ཅིག་ཏུ་སྒྱུ་འཕྲུལ་བསྟན།།

དེ་དུས་ཁྱོད་ནི་ཕྱེ་ལེབ་སྟེ།།

བདག་གི་མིག་སྔར་འཕུར་ལྡིང་རྩེན།།

གཤོག་གཡས་ལྕགས་ཐག་ཁྲ་བོ་ཞིག།

གཡོན་པས་སྙིང་ཀར་དུམ་བུར་གཏུབ།།

རྨི་ལམ་ཟིན་ཐོ་བྲིས་པ་ནས།།

བདག་ལ་འཕུར་འདོད་ངང་གིས་འཕེལ།།

དེ་དུས་རྣ་བའི་བུ་ག་རུ།།

འོ་ཡི་འཇམ་མཉེན་རེག་བྱུང་བས།།

ཡིད་ཁམས་གྲུ་གསུམ་གྲུ་བཞི་ཞིག།

ཀུན་གཞིའི་ཕོ་བྲང་བང་མཁར་དུ།།

ཁྱོད་ཀྱི་ཞབས་རྗེས་བཀོད་ཡོད་དེ།།

རྣམ་ཤེས་ལུས་དང་མ་འབྲལ་བར།།

གཡོ་འགུལ་འདར་གསུམ་འོང་ས་མིན།།

འདུན་མའི་ལམ་སྟེགས་འཚོལ་བའི་ཤུལ།།

ཁྱོད་ནི་ལམ་གྱི་ཚད་ཤིང་གྱུར།།

གཟུགས་དབྱིབས་གོར་གོར་ཟླུམ་ཟླུམ་ཡིན།།

ཁབ་ལེན་རྡུལ་གྱི་ནུས་དང་འདྲ།།

བདག་གི་དབང་ཤེས་བཀུག་སྟེ་སོང་།།

འདི་ནི་ཐོག་མའི་མཇལ་འཛོམ་རེད།།

འདི་ནི་མཐའ་མའི་འཕྲད་པའང་ཡིན།།

གསེར་ལྟར་རིན་ཐང་བྲལ་བའི་མྱི།།

སྐབས་ཤིག་ཁོག་ཏུ་འཕུར་རྒྱུ་ཡོད།།

དེ་ཡང་སྣང་བརྙན་ཙམ་ཞིག་ཡིན།།

       ༢༠༡༦/༡/༡༤ཉིན་ཉིན་གུང་།