དྲན་པའི་རྒྱང་འབོད།
རྩོམ་ཡིག་འདི་ཐེངས། 472 བཀླགས་འདུག
/
སྟོན་ཆར་སམ་སིམ་འཇོ་བའི་ནམ་སྨད་དེར།།
སྐྱེ་འཆི་རིས་སུ་འཁོར་བའི་བར་གླགས་ནས།།
དྲིན་ཆེན་ཕ་ལོའི་མལ་གྱི་འཁུན་སྒྲ་དེ།།
རི་ཐང་སྐྱ་བོ་ཞིག་གི་གཤིས་སུ་ལྷུམས།།
/
མཐའ་ན་ངུ་ཞིང་གཉོམ་པའི་བུ་དང་ཚ།།
འགྲམ་དུ་བསྐོར་ཞིང་གདུང་བའི་གཉེན་དང་གྲོགས།།
མི་བཟོད་མཆི་མའི་བཞུར་རྒྱུན་ཤམ་ཤམ་བཞུར།།
ཁྱེད་ཞལ་མིག་གིས་འཚོ་བཞིན་ཁོག་ངུ་བརྒྱབ།།
/
བར་དོ་རྗེན་པར་མཐོང་བའི་མིག་དབེན་ཡང་།།
ངུ་ངག་འདྲེས་མའི་བོན་དབྱངས་ནན་གྱིས་གྱེར།།
ལྷ་གཅིག་དབྱངས་ལྡན་དགྱེས་པའི་ཐུགས་རྗེ་ཡིས།།
ཕྱི་མའི་བར་ཆོད་སེལ་བའི་སྐྱབས་བཅོལ་ཞུས།།
/
ཕ་ཉིད་རྒྱང་ལ་ཆས་པའི་ཕྱི་ཉིན་ནས།།
ཡ་ཆུང་སེམས་སུ་སྡུག་གི་ན་བུན་འཐིབས།།
ཁྱུང་སྨན་རྫ་རི་མཐོང་ནས་ཕ་ལོ་དྲན།།
ལ་ཁའི་སྨིག་པ་རིག་ནས་ལྷག་ཏུ་སྨེངས།།
/
མ་ཀའི་སྤང་ཐང་ཡངས་མོའི་ཁུགས་སོ་ན།།
གཡང་དཀར་ལུག་ཁྱུ་མང་པོས་འབའ་སྒྲ་སྒྲོགས།།
ལུས་ལ་སླག་པ་གྱོན་པའི་དུས་ཚིགས་དེ།།
བུ་ངའི་སེམས་སུ་ཤར་ན་ཡིད་རེ་མུགས།།
/
རྫ་ཆུ་ཤག་ཤག་བཞུར་བའི་གཙང་འགྲམ་དུ།།
ནོར་ནག་འབྲི་དང་བེའུས་ངུར་སྒྲ་སྒྲོགས།།
འུར་ཆ་སྐེད་ལ་དཀྲི་བའི་ཕ་ལོ་དེ།།
མུལ་མུལ་འཛུམ་པའི་ཚུལ་ཀྱིས་སེམས་སུ་དྲན།།
/
མཚན་དཀྱིལ་རྨི་ལམ་ནང་ནས་ཁྱེད་དང་འཕྲད།།
སྦྲ་ནག་མེད་པའི་གནས་དེ་སྡུག་ཚུལ་བཤད།།
ངས་ཀྱང་དྲན་ཚུལ་བརྗོད་པའི་བར་གླགས་དེར།།
ཞོགས་པའི་ཁང་བྱེའུ་ཁྲ་མོས་གཉིད་ལས་སླང་།།
/
ལོ་ལ་བཟུང་བའི་བགྲང་འཕྲེང་ཟད་པོ་དེ།།
མིག་གིས་འཚོ་བཞིན་དྲན་པའི་རྟེན་དུ་ཉར།།
གཉེན་གྱི་བརྩེ་བ་རུས་པའི་རྐང་ལ་ཟུག།
དྲན་པའི་གདུང་བ་ཚེ་གཅིག་སྙིང་ལ་གཟན།།
/
རི་ལུང་ཀུན་ཏུ་ཁ་བས་བྲོ་གར་རྩེན།།
ཁང་ཁྱིམ་སྐྱ་བོ་ཇི་འདྲའི་དབེན་ཞིང་འཇགས།།
ཕ་གཅིག་དྲན་པའི་གདུང་བ་མཚོ་ལྟར་འཁྱིལ།།
སྐྱོ་བའི་མིག་ཆུ་དེ་ཡི་འཇིངས་སུ་བྱིངས།།
/
ཉིན་ལུང་གཡང་སྡེ་ཕྱུག་མོའི་སྡེ་གྲལ་ན།།
ཕ་དང་ཨ་ཁུ་གཡས་འཛོམ་གཡོན་སྐྱིད་རེད།།
གཏམ་དང་ཀུ་རེ་ཁྲོད་ནས་རྩེད་ཅིང་དགོད།།
མི་འཛོམ་བུ་ངས་ཁྱེད་ཉིད་སྙིང་ནས་དྲན།།
/
བསམ་ཚུལ་ཕྲིས།