ཐང་ཆད་པའི་མེ་ཏོག (ཚན་པ་བཞི།)

།

ཁོ་ཆད་པའི་དུམ་ཁ་རེ་རེ

དུས་ཚིགས་ཀྱི་རི་བོའི་གཏིང་ནས་འཕག་འཚག་རྒྱག

སྐྱེ་བོ་དག

གཞས་ཀྱི་ཐང་ཆེན་ནས

རྒྱང་རིང་གི་རོལ་དབྱངས་ལ་རྣ་བ་ཆགས

ཐང་ཆད་པའི་མེ་ཏོག

ང་རང་ཧ་ཅང་ངལ་བའི་ལུས་སྟེང་གི་མེ་ཏོག

ངལ་བའང་སྐྱོ་གཞས་འཐེན་པའི་སེམས་ཀྱི་ལོངས་སྤྱོད་ཅིག་ཡིན

ཁ་སང་གི་ང་ལ

གྲིབ་མ་མེད་ཅིང་ངལ་བ་མེད

གསོན་ཤི་བརྒྱབ་པའི་ཐ་སྙད་ཁག་ཅིག

ཤི་བ་ལ་བཏབ་པའི་སྔོན་གྱི་ལམ་གྲོ་རུ་བརྫངས

།

༈ གདུང་བའི་ཁྲོད་ཀྱི། ཁེར་རྐྱང་གི་ཟླ་བ།

།

ས་རུབ་ཁའི་འདར་བཞིན་པའི་སྐར་ཚོགས

གྲང་ངར་དང་རླུང་འཚུབ་རྒོད་པས་འཐོར་ལ་ཉེ་བས

གཅིག་པུར་ལུས་པའི་ཟླ་བ་དྭངས་གཙང་གི་འོད་ཀྱི་ཀློང་ན་ངུ་བཞིན་འདུག

ཁེར་རྐྱང་གི་ཟླ་བས

གཙང་བོས་ཟོས་པའི་སྐར་ཚོགས་ཀྱི་འོད་ཟེར་བཙལ་བཞིན

མཐའ་ཡས་པའི་ནམ་མཁའ་ལ་ན་ནིང་གི་ལོ་རྒྱུས་འབྲི་བཞིན་འདུག

མུན་པ་རབ་ཏུ་སྟུག་པས   ཟླ་བ་ཁེར་རྐྱང་གི་གདུང་བས་མནར་གྱིན་ཡོད

མུན་པ་ཤིན་ཏུ་སྟུག་དོན

ད་ལོའི་ཉི་མ་དེ་ནུབ་པ་སྔ་བས་ཡིན་ནམ

ཡང་ན་དོ་ནུབ་ཀྱི་སྐར་ཚོགས་ལ་འོད་མདངས་མེད་པས་ཡིན

མུན་པ་ཅི་ལྟར་སྟུག་ཀྱང

ཁེར་རྐྱང་གི་ཟླ་བར་སྔར་བཞིན་འོད་མདངས་འཚེར་གྱིན་འདུག

ན་ནིང་བཞིན

སྐར་ཚོགས་ལ་འོད་མདངས་རེ་ཡོད་ན

ཟླ་བ་ཁེར་རྐྱང་ཡིན་དོན་མེད  གདུང་བས་མནར་དོན་ཡང་ག་ལ་ཡོད

གཅིག་པུར་རྒྱུ་བཞིན་པའི་ཟླ་བ་ལགས་ཁྱེད་ཀྱིས་དཀའ་ལས་མྱངས་སོང

།

༈ སྙིང་ཉེ།

།

སྙིང་ཉེ་བའི་མི

མི་ཚོགས་རབ་ཏུ་མང་ནའང

ང་ལ་ཁེར་རྐྱང་གི་གདུང་བ་ཤིན་ཏུ་ལྕི

གལ་ཏེ

ང་རང་བྱེའུ་ཞིག་ཡིན་རྒྱུ་ན

ཡང་ན་རླུང་བུ་ཞིག་ཡིན་རྒྱུ་ན

ཁྱོད་ཀྱི་ནམ་མཁའ་ནས་ལྡིང་སྐོར་རྒྱག་ལ

ཁྱོད་ཀྱི་ཉེ་འགྲམ་ནས་དལ་བུར་ལྡང་ངེས

ཚོན་ཁ་མེད་པའི་ཉི་མ་འདི་ཚོར

ཁངས་ཆར་དང་གྲང་རླུང་བརྟུན་མར་ལྡང་དོན

ཁྱོད་རང་མེད་པས་ཡིན་ནམ   ཡང་ན་ཁྱོད་རང་དྲན་དྲགས་པས་ཡིན་སྲིད

སྙིང་ཉེ

གང་ལྟར་ཁྱོད་སོང་ཤུལ་གྱི་ང་རང

གདུང་བས་གཏམས་པའི་ཆུ་བོ་ཞིག་དང་འདྲ་བར

ཁེར་རྐྱང་གི་ལ་ལུང་དག་ཏུ་དལ་མོར་བཞུར་གྱིན་ཡོད

།

༈ ཁོ་མོར་བྲིས་པའི་སྙན་ངག

།

གྲོང་ཁྱེར་དུ

ལྷིང་འཇགས་ཀྱི་ས་ཚུགས་ཤིག་ཤིན་ཏུ་དཀོན

འུར་ཟིང་ཆེ་བའི་གྲོང་ཁྱེར་འདི་ནས

མི་ཚོགས་ཀྱི་འཚུབ་ཁའི་ཁྲོད་ན

 

འུ་གཉིས་ནི    ཆེས་དྭངས་གཙང་གི་ཆུ་ཕྲན་ཞིག་དང་འདྲ་བར

འཕྲེད་ཀྱི་ལམ་བུ་གན་ནས་ལྷིང་འཇགས་ཀྱི་གནས་ཤིག་ལ་བཞུར་གྱིན་ཡོད

ནར་མ་སོན་པའི་འུ་གཉིས

འཇིག་རྟེན་འདིའི་པང་ཁུག་ཏུ་ཆུང་དྲགས་པས

 

སུ་དང་གང་གིས་ཀྱང་འུ་གཉིས་ལ་ཁ་ཡ་བྱེད་མི་སྲིད

ཐ་ན་སྲོད་ཁར་ལྡང་བའི་རླུང་བུས་ཀྱང

མཚན་མོ་འདིའི་ལང་ཚོ་ཁོ་ན

ཁྱོད་དང་ངའི་མཐར་ཐུག་གི་ཐོབ་བྱ་ཡིན

 

བརྩེ་དུང་གི་རོ་ལ་འཐམ་པའི་ཕྱེ་ལེབ་ཆ་གཅིག

རྨི་ལམ་གྱི་མངར་ཁ་ཁྱེར་ནས་གང་ལ་འཁྱམ་འགྲོ

འགྲོ་འདུག་ལ་སྡོམས་རྩིས་མེད་པས

མཐའ་མཇུག་གི་རི་མོ་དེ་ས་སྲོད་ལ་སིམས་སྲིད་དམ

མུན་པ་སྟུག་པའི་མཐའ་ཡས་ཀྱི་ནགས་ཚལ་དུ

འུ་གཉིས་ལོག་མི་དགོས་པར་སྨོན་ལམ་ཡང་ཡང་བརྒྱབ་མྱོང་ཡོད

 

2016/1/7 མཚན་གུང་དུ་སྦྱར།