དཔོན་གསས་དགྱེས་པའི་ཚིག་དུམ།།

རྩོམ་ཡིག་འདི་ཐེངས། 333 བཀླགས་འདུག

སྐུ་གསུམ་འདུ་འབྲལ་མེད་པའི་རྣམ་པར་རོལ་བའི་གདོད་མའི་མགོན།།

སྨོན་ལམ་སྔོན་དུ་བཏང་བའི་རྗེས་ཆགས་འགྲོ་དྲུག་ཐུགས་སུ་བཟུང་།།

སྒྱུ་འཕྲུལ་གར་ལས་ཐོན་པའི་སྣ་ཚོགས་སྤྲུལ་པའི་སྣང་བརྙན་གྱིས།།

མྱ་ངམ་འདམ་ནས་མྱུར་དུ་འདྲེན་པའི་མཛད་བཟང་ཐུགས་རྗེ་ཅན།།

དེང་འདིར་སྡུག་བསྔལ་བསལ་བའི་ཤར་བའི་སྐྱ་རེངས་སུ་འབོད་ན།།

ནུས་དགུ་སྟོབས་བཅུ་ཆིབས་ཏེ་གནས་འདིར་འབྱོན་པ་མཛོད་ཅིག་ཀྱེ།།

།

ཀ་ཁའི་དབྱངས་རྟ་འཐེན་ཏེ་སྙུ་གུ་ཕྱག་གི་མཚོན་ཆ་བཞིན།།

གཞུང་ལྔའི་པོད་ཆེན་རྒྱབ་རིར་བརྟེན་ཏེ་ཚད་མ་རྣམ་པ་གསུམ།།

མདུན་དུ་སྐྱོད་པའི་ལམ་ཁར་གདམས་ཏེ་བགྲོད་པའི་ཤུལ་མཚམས་སུ།།

སློབ་བུ་གྲངས་བརྒྱས་དད་པས་པད་མོ་སྙིང་གར་སྦྱར་བར་བྱས་པའི་མུར།།

བསླབ་སྟོན་ཟླ་བའི་འཛུམ་ཟེར་དགུང་སྔོན་གནམ་དུ་འཕགས་ཏེ་བྱུང་།།

མུན་པའི་སྨག་རུམ་ངང་གིས་སེལ་ཚུལ་རྨད་ཅེས་བསྔགས་གྲངས་མང་།།

།

ཚོགས་བསགས་སྒྲིབ་སྦྱོང་སྐལ་མང་སྔོན་ནས་བགྱིས་པའི་ལས་ཤིག་རེད།།

ཉིད་ཀྱི་ཐུགས་དམ་མེ་ཏོག་ཅིག་སྟེ་བདག་གི་ཡིད་ཀྱི་ཕོ་བྲང་དུ།།

དད་མོས་འདུན་གསུམ་བང་རིམ་བརྩེགས་ཤིང་དགའ་མགུ་དང་གསུམ་གྱིས།།

མཆོད་སྤྲིན་བཤམས་ཏེ་གདན་དུ་དྲངས་ན་ཐུགས་རྗེ་ནུས་མཐུ་ཡིས།།

སྐུ་གསུང་ཐུགས་ཀྱི་གསང་བའི་ཡོན་ཏན་མ་ལུས་ཡོངས་རྫོགས་པ།།

བྱིན་གྱིས་རློབས་ཤིག་དཔལ་ལྡན་རྩ་བའི་བླ་མ་རིན་པོ་ཆེ།།

།

ལུས་ཕྱག་ཡན་ལག་ལྔ་དང་ངག་ཕྱག་བསྟོད་ཚིག་ཕྲེང་བར་བསྟབ།།

ཡིད་ཀྱི་ཕྱག་འཚལ་དད་མོས་དང་བཅས་བདག་གིས་མགྲོན་དུ་འབོད།།

ཙི་ཏའི་དབུས་ནས་དགྱེས་བཞད་གྱིས་ཤིག་སྐུ་ཚེ་ཡུན་བརྟན་ཤོག།

སྔོན་སྦྱངས་དལ་འབྱོར་རྟེན་འདི་ཁྱེད་ཀྱིས་སྨིན་གྲོལ་ལམ་འགོད་དགོས།།

བདག་གི་ཐར་པ་ཁྱེད་ཀྱིས་བསྟན་དགོས་དཔོན་གསས་ཁྱེད་ལ་རག།

འཁོར་བར་སྐྱོ་ཤས་ཐར་པར་ངེས་འབྱུང་བློ་གྲོས་སྩོལ་མཛོད་དང་།།

།

སྐྱོ་བ་མཐའ་དག་ཡུད་ཀྱིས་སངས་ཤིག་མཐུ་དབང་རྫོགས་པས་སོ།།

ཐར་པའི་ལམ་དུ་མྱུར་མོར་ཁོད་ཅིག་སྨོན་ལམ་དབང་གིས་སོ།།

བློ་ཁ་ལོག་ན་ཡོ་བར་སྲང་དགོས་ཐུགས་རྗེ་ཆེ་བས་སོ།།

སྐལ་བ་ལྡན་ན་ཡུན་དུ་བཞུགས་རོགས་འཁོར་བར་མ་སྟོང་བར།།

བསོད་ནམས་ཚོགས་ཀུན་མ་ལུས་གཅིག་ཅར་སློབ་མའི་རྒྱུད་དུ་ཕོབས།།

མཁྱེན་བརྩེ་ནུས་པའི་ཁྲི་རུ་བཞུགས་ཏེ་དཀྱུས་རིང་སྤྱན་གྱིས་གཟིགས།།

།

                ༢༠༡༥/༡/༡༢ཉིན།