ང་ནི་རབ་ཏུ་བྱུང་ཡོད་བུ་མོ་དགོངས་པ་མ་ཚོམས།
རྩོམ་ཡིག་འདི་ཐེངས། 402 བཀླགས་འདུག
ལས་ཀྱི་གོ་གྲུ་འཁོར་བའི་འཇིངས་སུ་ཕྱིན་པས།།
བདེ་སྡུག་རགས་པའི་ཚོར་བ་ལུས་ལ་འཁོར་ཡོང་།།
སྣང་བའི་འདོད་པ་ཡུན་གྱིས་བསྐྱལ་ན་བསམ་ཡང་།།
རབ་ཏུ་བྱུང་བས་བུ་མོ་དགོངས་པ་མ་ཚོམས།།
།
ཀུན་ཉོན་ལས་ཀྱིས་བསྐྱེད་པའི་ལན་ཆཊ་ཤིག་གིས།།
བརྩེ་གདུང་ལན་བུའི་སྣེ་མོ་ཁྱེད་ལ་གཏད་ཀྱང་།།
འདི་སྣང་སེམས་ཀྱི་གཏད་སོ་གཅིག་ཀྱང་དབེན་པས།།
ང་ནི་རབ་ཏུ་བྱུང་ཡོད་དགོངས་པ་མ་ཚོམས།།
།
རྟོགས་པས་རྟེན་འབྱུང་དེད་ནས་རི་ལ་སོང་དེ།།
ངེས་འབྱུང་སྐྱི་བསེར་རླུང་བུས་དྲན་པ་སྒུལ་དུས།།
ཚོགས་དྲུག་དབང་བོའི་འདུན་པ་ཆོས་ལ་ཕྱོཊ་པས།།
རབ་ཏུ་བྱུང་བས་བུ་མོ་དགོངས་པ་མ་ཚོམས།།
།
སྙིང་གཏམ་ཁམ་གང་སོ་དཀར་རྩེ་ནས་ལུད་པའི།།
བྱམས་པའི་ཏིང་འཛིན་རྨི་ལམ་ཡུལ་དུ་འཁྲུལ་ཡང་།།
རྟོགས་པའི་རྟ་ལྗང་དབེན་པའི་རི་ནས་ཚེས་པས།།
རབ་ཏུ་བྱུང་བས་བུ་མོ་དགོངས་པ་མ་ཚོམས།།
།
མཛེས་འཛུམ་ཐོ་རངས་ཡིད་ཀྱི་དྲན་པ་དཀུ་བའི།།
ཞལ་དཀྱིལ་པད་མ་དཀར་བོ་གསར་དུ་བཞད་ཀྱང་།།
ལས་ཀྱི་རྟེན་ཐག་འཁོར་བའི་གྲོང་ནས་བཅད་པས།།
རབ་ཏུ་བྱུང་བས་བུ་མོ་དགོངས་པ་མ་ཚོམས།།
།
བུ་མོ་མ་སྡུག་ཐུགས་ནི་སྐྱོ་སོང་མ་གསུངས།།
ལྡོག་མེད་བཙུན་པའི་འདུན་པ་བདག་ལ་ཆེ་བའི།།
ནམ་ཞིག་ཆགས་པའི་གདུང་བ་སེལ་བའི་ཚབ་ཏུ།།
རབ་ཏུ་བྱུང་བས་ཆོས་ཤིག་ཁྱོད་ལ་བཏང་ཡོང་།།
།
སྤྱི་ ༢༠༡༦ ཟླ་ ༡ ཚེས་ ༧ ཉིན།
བསམ་ཚུལ་ཕྲིས།