ཁྱོད་དང་ང།
རྩོམ་ཡིག་འདི་ཐེངས། 513 བཀླགས་འདུག
གཤོག་རྩལ་སྔོན་མོའི་རྫུ་བག་ཅན།།
རྟག་མཐའ་བྲལ་བའི་གཤིས་ལ་སོང་།།
ཤུལ་ན་ཡོད་པའི་ངང་བ་བཟང་།།
ཁྱོད་དང་ང་ཡི་མ་འོངས་ཡིན།།
།
རྫུན་གྱིས་སྦྱོར་བའི་འུག་གཏམ་མོ།།
ཀློང་དུ་བརྡོལ་བའི་དབྱིངས་ལ་སོང་།།
ཤུལ་དུ་ཡོད་པའི་བདེན་པའི་གཏམ།།
ཁྱོད་དང་ང་ཡི་ཁེན་ས་ཡིན།།
།
མདུན་དུ་འཚེར་བའི་ཟུག་གཟེར་སྐད།།
དབྱངས་ཀྱིས་ཐིམ་པའི་སྦས་ལ་སོང་།།
ཤུལ་དུ་ཡོད་པའི་གསུངས་སྙན་མོ།།
ཁྱོད་དང་ང་ཡི་རེ་ལྟོས་ཡིན།།
།
རྟག་མི་བརྟན་པའི་ཨ་གསར་མོ།།
ཆུ་ཀླུང་ཆེན་མོའི་གཏིང་དུ་སྦས།།
ཤུལ་དུ་ཡོད་པའི་རྒྱུན་མཛེས་བ།།
ཁྱོད་དང་ང་ཡི་བདེ་སྐྱིད་ཡིན།།
།
རྫས་ཀྱིས་སྦྱོར་བའི་ནག་ནོག་མོ།།
གླིང་གཞན་ཡུལ་དུ་མྱུར་གྱིས་དེད།།
ཤུལ་དུ་ཡོད་པའི་གཤིས་བཟང་བ།།
ཁྱོད་དང་ང་ཡི་བསྙེག་བྱ་ཡིན།།
།
རྒྱུ་མཚན་མེད་པར་གཞན་མི་སྙེགས།།
གཏན་ཚིགས་མེད་པར་འུར་མི་བྱེད།།
ཀུན་དང་མཐུན་པའི་གཏམ་སྨྲ་བ།།
ཁྱོད་དང་ང་ཡི་ཁྱད་ཆོས་ཡིན།།
།
སེམས་ལ་མ་འོངས་ཕུགས་འདུན་ཡོད།།
ལུས་ལ་དུས་ཀྱི་བཟང་སྤྱོད་ཡོད།།
འགྲོ་འདུག་ཀུན་ཏུ་སྤྱོད་ཤེས་པ།།
ཁྱོད་དང་ང་ཡི་ཁྱད་ཆོས་ཡིན།།
།
ཕྱི་ལོ་ ༢༠༡༦ ཟླ་ ༡ ཚེས་ ༡༠ ཉིན།
བསམ་ཚུལ་ཕྲིས།