ཏི་སེའི་ཞོལ་གྱི་གསང་བ།
རྩོམ་ཡིག་འདི་ཐེངས། 1592 བཀླགས་འདུག
/
ལྷ་ནས་འཐེན་པའི་དམུ་ཐག་རིང་མོ་ཆུ་བཞི་འདུས་པའི་མགོ་ལ་ཐིམ།།
སྤུངས་སོ་བཏབ་པའི་བརྡ་ཆད་ཁ་ཡིག་གཡུང་དྲུང་བརྩེགས་པའི་ཟུར་དུ་ལྷག།
གྱེར་དང་གདངས་ཀྱི་མན་ངག་རོལ་ཆ་ལྷ་ཀླུ་མི་ཡི་ཡུལ་དུ་དཀྲོལ།།
ཆབ་དཀར་ཆབ་ནག་གླེགས་བམ་རལ་པོ་སྒོ་ཕུག་བར་པའི་བྲག་ལ་གབ།།
།
རྟ་བདུན་བརྐུས་པའི་གཏམ་རྒྱུད་བར་ནས་གནམ་ལྕགས་འབར་བའི་སྤུན་མཆེད་བཤམས།།
གཏོ་སྒྲོམ་བསྲེགས་པའི་གོ་ཐལ་ཤུལ་ནས་དཔའ་བོའབྲུ་ལྔས་ཕྱིར་སྐེ་སོ།།
རིན་ཆེན་སྤུངས་འདྲའི་ལྷུན་པོའི་ཉག་ནས་ཉང་ཆབ་གཙང་པོར་རྒྱང་ལྟ་ཙམ།།
ལས་ཀྱིས་བཏབ་པའི་སྨན་ཆུང་མ་དེ་རྫུ་འཕྲུལ་ཐབས་ཀྱིས་ལྕམ་དུ་བཀུག།
།
སྲིད་པའི་གཙུག་གཏོར་དབལ་སོའི་སྤོ་ནས་ཉི་ཟླའི་འོད་སྣང་རྒྱན་ལ་འཁུ།།
སུམ་ཅུ་རྩ་གསུམ་ལྷུན་གྱིས་གྲུབ་ཅེས་ཏི་སའི་ཞོར་ལ་གསང་བ་མོད།།
གཅེར་བུ་བ་ཞིག་རྐང་ཐང་བགྲོད་པའི་ལམ་ཡིག་བརླགས་པ་གྲངས་ལས་འདས།།
རུས་གྲུམ་གོག་པོའི་ལྷ་སྒྲུང་བར་ནས་ན་རོ་ཐོགས་པས་ཕམ་སོང་སྐད།།
།
གཡུང་དྲུང་དགུ་བརྩེགས་བྲག་རིའི་བཀོད་པ་རྔ་ཆུང་འགྲིལ་བའི་ཤུལ་དུ་འཕྲུལ།།
ཐོབ་ཤོར་རྩོད་པའི་བན་བོན་དེ་ཚོའི་རྐང་རྗེས་རྫ་རིའི་ཟུར་དུ་ལྷག།
དབང་ཕྱུག་ནག་པོའི་གཏམ་རྒྱུད་རིང་མོ་གངྒའི་ཆུ་བོས་མར་དུ་དེད།།
ཤམ་པ་ལྷ་ཞེས་གཞལ་ཡས་ཁང་ཞིག་གངས་རྒྱལ་ཏི་སའི་ཟུར་ནས་བོར།།
།
ཐུ་བྷོད་བཙན་པོའི་རྨིང་ལ་འཐིམས་པའི་བཟོ་གསོ་སྒྲ་རྩིས་རླབས་རྒྱུན་བབས།།
སྨར་ཡིག་རྒན་གཞོན་ལེགས་ཚོགས་བསྡུས་པའི་ཀ་མད་སུམ་ཅུའི་ཟིལ་པ་འཐོར།།
དད་པའི་ལྕགས་ཀྱུ་སྙིང་ལ་ཟུག་པས་ལྷ་འདྲེའི་ཆོ་འཕྲུལ་ཕྱོགས་མཚམས་གཏོར།།
དགྲ་བཅོམ་ལྔ་བརྒྱའི་རྣམ་ཤེས་མག་མོག་གངས་འཁྱག་སྟུག་པོའི་གཏིང་དུ་ལྷུང་།།
།
ཨརྱ་རིགས་རྣམས་དགུང་ནས་བབས་ཏེ་ཚ་བའི་གྲོང་ལ་གནས་ཚང་འཚོལ།།
ཕྱག་ན་གཡུང་དྲུང་ཐད་དུ་ཁྱེར་བའི་མི་བོ་ཆེ་ཡི་བླ་རིར་སྤུར།།
ཟླུམ་གཟུགས་རྩེ་ནས་རྟོག་ལྟར་འགྱིང་ལ་གསང་བའི་ལྷ་སྒྲུང་བརྗོད་ལས་འདས།།
ཧི་མ་ལ་ཡའི་སྒལ་ཚིགས་བར་གྱི་སྲོག་ཤིང་འཛིན་དེར་ཨེ་མ་ཧོ།།
།
༢༠༡༦/༡/༥ཉིན།
།
བསམ་ཚུལ་ཕྲིས།