བོན་དཔེ་འགར་གཟིགས་པའི་མྱོང་ཟིན་གཞོན་ནུ་འོད་ལྡན།（ཁག་གཉིས་པ།）

རྩོམ་ཡིག་འདི་ཐེངས། 411 བཀླགས་འདུག

འཕྲུལ་སྒྲོན་རྟགས་རིགས་དགོངས་དོན་གསལ་བཤད་དུ།། གཏན་ཚིགས་རྣམ་གཞག་བློ་འབྱེད་ལྡེ་མིག་གང་།། བསླབ་གསུམ་མགོན་པོ་བསྟན་འཛིན་རྣམ་དག་གིས།། མཚན་ཉིད་དབྱེ་བ་ཐལ་ཆེའི་རྣམ་གཞག་སོགས།། ཞིབ་ཅིང་རྒྱས་སྟོན་མ་རིག་དྲ་བ་གཅོད།། བློ་རིགས་རྣམ་གཞག་ལེགས་བཤད་དགའ་སྟོན་གང་།། གཡུང་མིང་འཛིན་པ་བརྩོན་འགྲུས་གོང་འཕེལ་ནས།། རབ་དཀར་ལྷག་བསམ་པད་མའི་མདངས་བསྣན་ཏེ།། ཡུལ་ཅན་བློ་དང་ཡུལ་གྱི་རྣམ་གཞག་སོགས།། རང་གཞན་ཀུན་ལ་ཕན་ཕྱིར་ལེགས་པར་སྟོན།། ཚིག་དོན་ལོག་རྟོག་ཞུགས་ལ་རྣམ་གཅོད་ཀྱི།། སྒྲ་ཚད་རིག་པའི་བསྟན་བཅོས་རྨ་མེད་པ།། གཏན་ཚིགས་གཞུང་དོན་སྒོ་འབྱེད་བསྡུས་གྲྭ་ཡི།། རྣམ་གཞག་འཇིགས་མེད་སེང་གེའི་ང་རོ་སྟེ།། ཐལ་འགྱུར་འབྲུག་སྒྲས་སྟོང་གསུམ་ཁྱབ་པར་སྒྲོག། མཛེས་མཛེས་གཙུག་ལག་རིན་ཆེན་སྤུངས་པ་ལ།། ཟབ་ཟབ་བོན་གྱི་ཚད་གཞུང་དཔག་བསམ་ཤིང་།། ཡང་ཡང་ཚིག་གི་བརྡར་སྲེག་འབྲས་བུའི་ཕུལ།། ལེགས་ལེགས་ཚད་མའི་སྟོན་པ་རིམ་བྱོན་ནས།། མྱུར་མྱུར་སྒོ་འབྱེད་མུན་པའི་ཐེ་ཚོམ་གཅོད།། དྲན་པ་དང་ནི་ལི་ཤི་ཤ་རི་སོགས།། ཚད་སྟོན་ཕྲེང་བའི་ཕྱི་མོར་ཁུངས་བཅོལ་ཏེ།། འགྲོ་མགོན་དང་ནི་མཉམ་མེད་བླ་མ་སོགས།། བཤད་སྒྲུབ་བསྟན་པའི་ཁུར་ཆེན་འདེགས་ནུས་པ་ཤིང་།། ཁྱད་པར་ཚད་མའི་བསྟན་བཅོས་ཕུན་སུམ་ཚོགས།། ལྷག་དོན་མཁན་ཆེན་ཉི་མ་བསྟན་འཛིན་ནས།། སྡུད་གྲྭའི་རྣམ་གཞག་ཆེ་འབྲིང་ཆུང་གསུམ་དུ།། གཏན་ལ་དབབ་སྟེ་དབྱིག་གི་བློ་གྲོས་མར།། རྒྱ་ཆེན་གཞུང་ལ་ཐོས་བསམ་དོན་གཉེར་བར།། གཏན་ཚིགས་བློ་གྲོས་རིན་ཆེན་ཐང་མར་བརྡལ།། ཕུང་བོ་ལྔ་དང་གཞི་གྲུབ་ཡུལ་ཡུལ་ཅན།། སེམས་དང་སེམས་བྱུང་ཚད་མ་ཚད་མིན་བཅས།། ལེགས་སྟོན་རྒྱུ་འབྲས་མཚན་མཚོན་རྣམ་གཞག་སྟེ།། ཀུན་འབྱུང་ཡང་ཁྱད་དགག་སྒྲུབ་རིམ་པ་སོགས།། མ་ལུས་ཚང་བར་སྟོན་ལ་ཉིན་མོའི་མ་གོན།། ད་དུང་དུས་གསུམ་རྣམ་གཞག་འགལ་འབྲེལ་དང་།། སྤྱི་བྱེ་མངོན་ལྐོག་ཚིག་བཀྲའི་རིམ་པ་ཡང་།། དཀྱུས་གཅིག་འཆད་ལ་རྒྱ་བོད་མཁས་པའི་སྲོལ།། མི་ཉམས་གོང་འཕེལ་ཕྱིར་དུ་རྒྱས་སྟོན་པ།། བོན་ལུགས་ཚདག་མའི་རང་མདངས་བཅུད་དུ་ཆེ།། རོང་སྟོན་ཤེས་བྱ་ཀུན་མཁྱེན་དཔལ་དེ་ཡིས།། བོན་ཆོས་ཁྱད་པར་རྣམ་འབྱེད་མེ་ལོང་གང་།། སྙིགས་དུས་རྩོད་ལྡན་དུས་ལ་ལྟ་ངན་གྱི།། རྒོལ་བ་ཚར་གཅོད་རིག་པའི་རལ་གྲི་སྟེ།། གནམ་ལྕགས་ཐོག་མདའ་དེས་ནི་ཡིད་རབ་འཕྲོག། བོན་ལ་མི་སྟེགས་ལྟ་ལོག་མཚན་ཉིད་དང་།། མིང་གི་རྣམས་གྲངས་ཇི་སྙེད་བྱུང་བ་ལ།། ཤེས་དང་ཤེས་མིན་ཀུན་གསལ་འདེབས་སུ།། ལུང་རིགས་རྡོ་རྗེ་རྩེ་མོས་བསྣུན་བྱས་ཏེ།། མ་རུང་དགྲ་བགེགས་བསྒྲལ་ལ་ཕྱིན་པའི་མཆོག། རྒྱལ་རོང་རབ་བརྟན་རྒྱལ་བོའི་ཕོ་བྲང་ནས།། རང་བསྟན་ཐེ་ཚོམ་མ་ལུས་བསལ་བ་དང་།། གཞན་བསྟན་མ་དག་རྒོལ་བར་རྩོད་པ་སྟེ།། བན་བོན་ཁྱད་པར་ཚིག་དོན་ཀུན་བཀྲལ་ནས།། བསྟན་སྐྱོང་བཙན་བརྗིད་སྡོང་བོ་བརྟན་པོར་བཙུགས།། བོན་ཆོས་རྣམ་གཞག་ཁྱད་པར་སྒོ་འབྱེད་འདི།། དཔྱོད་ལྡན་མཁས་པའི་ཚོགས་ལ་ཕུལ་ན་ནི།། མཁས་རློམ་ང་རྒྱལ་ཅན་གྱི་སཉིང་ག་རུ།། བྱམས་སྙིང་ཆེན་པོས་རིག་པའི་ཕུར་བུ་ཞིག། བརྡབས་པ་མིན་ནམ་ཨེ་མ་དཔྱོད་ལྡན་ཀྱེ།། རྣམ་ཀུན་ཁྲོན་པའི་ལག་འགྲོ་ཇི་བཞིན་དུ།། རང་ཙམ་གཏོགས་གཞན་ལ་མི་སེམས་པའི།། དུས་སྙིགས་མཁས་པའི་བརྟུལ་ཞུགས་འཛིན་རྣམས་ལ།། མ་མཐོང་མཐོང་ཕྱིར་མཐོང་བའི་ལམ་སྒོ་ཞིག། བསྟན་བཅོས་འདི་རུ་ཕྱེས་ཡོད་གཟིགས་པར་ཞུ།། ཐམས་ཅད་བདེན་པ་ལྟར་སྣང་མ་ངེས་མོད།། བརྡར་སྲེག་དཔྱད་གསུམ་རིག་པའི་བློ་གྲོས་ཀྱིས།། ཡང་ཡང་གཞལ་ལ་དཔའ་མི་སུ་བྱུང་ཡང་།། ཀུན་སློང་དག་ན་བོད་ཀྱི་ཆོས་རིག་ལ།། ཕན་པའི་ལེགས་སོ་ཡིན་སྙམ་བསམ་བློ་ཐོངས།། བོན་རྣམས་ཐམས་ཅད་ཡང་མཛོད་རྣམ་འབྱེད་ཀྱི།། འཕྲུལ་གྱི་ལྡེ་མིག་ཞེས་བྱའི་གཞུང་དེ་ལ།། རྒྱལ་བའི་བཀའ་ལུང་འཇལ་བའི་ཐིགས་ཤིང་དང་།། མན་ངག་གཏན་ཚིགས་རིག་པའི་དངོས་གཞི་སྟེ།། ཤེས་རབ་རྣམ་འབྱེད་འཕྲུལ་ལྡེར་དཀྱུས་གཅིག་མཇལ།། དེ་ཡང་རྒྱུང་ཡར་བླ་ཆེན་ཁོད་སྤུངས་ནས།། རྒྱུད་ལུང་མན་ངག་ཀུན་གྱི་བཅུད་བསྡུས་ནས།། རང་གཞན་ཐེག་ཀུན་འཇུག་པའི་སྒོ་མོ་རུ།། ལོ་རྒྱུས་གཞལ་བྱ་འཇལ་བྱེད་གསུམ་འཆད་པས།། བདག་ཉིད་དུག་ལྔའི་ཚལ་ལས་ལེགས་པར་བསྐྱབས།། རྒྱལ་བ་བཞུགས་དུས་མ་ངོར་པྲ་ཕུད་ཀྱིས།། གཡུང་དྲུང་སེམས་དོན་ཞུས་ལ་རྟགས་བྱུང་སྟེ།། ཨ་དང་མ་གཉིས་དཀར་དམར་ཉག་ཐག་འཁྲུལ།། སེམས་ཅན་འཁོར་བའི་སྐྱོན་རྣམས་གཟིགས་གྱུར་ཏེ།། སྐྱེ་འགག་གཉིས་མེད་ལམ་ནས་ཚོགས་འཁོར་བསྐོར།། དེ་ཡང་གཏན་ཚིགས་ངེས་པའི་གལ་མདོ་སྟེ།། ཏན་ཏྲ་ཉི་མའི་འཁོར་ལོ་ཞེས་བྱ་བར།། པྲ་ཕུད་ཁོང་ནས་མཁས་པ་རྒྱན་དྲུག་དང་།། ལོ་པཎ་མང་པོར་གསེར་ཕྱེ་ཕུལ་ནས་སུ།། བཀའ་དང་ཚོགས་ཀྱི་འཁོར་ལོ་བར་མེད་བསྐོར།། ཤ་རི་དབུ་ཆེས་པྲ་ཕུད་ལ་གདམས་པའི།། ཤ་རིའི་གལ་མདོ་ཡིན་ལུགས་བརྗོད་པའི་ཚེ།། གཤེན་རྣམས་དགྱེས་པས་རང་སར་གཤེགས་པ་དང་།། བསྟོད་པའི་སྙན་ཚིག་སྟོར་བཞིན་མན་ངག་བཅུད།། མཉམ་དུ་བླངས་པའི་ཚུལ་དེས་བོན་རྣམས་རྒྱལ།། བོན་རྣམས་ཡང་རྩེ་བླ་མེད་ཐེག་པ་སྟེ།། རྫོགས་པ་ཆེན་པོའི་གནས་ལུགས་གཏན་དབབ་ལ།། ཚད་མའི་རིགས་ལམ་རྐྱེན་གྱི་གཙོ་བོ་རུ།། དེ་སྔ་བདག་གི་བླ་མས་ནན་གསུངས་པ།། ད་ནི་ངེས་ཤེས་ཅུད་ཟད་འདྲོངས་འདི་སྐྱིད།། གཏན་ཚིགས་གལ་མདོ་རིགས་པའི་ཚད་མ་རུ།། བོན་རྣམས་སེམས་ཉག་གཅིག་ཏུ་འདུས་ཚུལ་དང་།། རིག་པ་བྱང་ཆུབ་སེམས་ཀྱི་སྒོམ་ལུགས་སོགས།། རྒྱས་ཤིང་ཞིབ་ཏུ་འཆད་པའི་གཏན་ཚིགས་ཀྱི།། སྒྲ་དོན་གཏན་ལ་དབབ་ལུགས་རིམ་བཞིན་འབྱུང་།། བོན་སེམས་གཉིས་མེད་སྣང་སྟོང་དབྱེར་མེད་ཀྱི།། རྫོགས་ཆེན་མན་ངག་ཚད་མའི་གཞུང་གནད་འདིར།། བེེ་རོ་ཙ་ནས་བོན་ཆོས་དབྱེར་མེད་དང་།། ཉི་ཟླ་བཞིན་དུ་མཐའ་རྒྱས་སྨོན་ལམ་ཡང་།། ལུང་དུ་བསྟན་ན་བདག་འདྲ་བཤད་ཅི་འཚལ།། སྙ་ཆེན་ལི་ཤི་སྟག་རིངས་དེ་ཡིས་ནི།། གཏེར་དུ་སྦས་པའི་བོན་གྱི་མན་ངག་སྟེ།། ལུང་གི་ཚད་མ་ཞེས་བྱའི་གཞུང་དེ་ཡང་།། གོ་བར་དཀའ་ཡང་དགའ་བས་ལན་གཅིག་ཀློག། མངོན་དཔག་བོན་སྐུ་གཉིས་མེད་དེ་ནས་རྟོགས།། མཁས་པ་མི་བཞིའི་དགོངས་པ་ཇི་བཞིན་དུ།། བླ་ཆེན་དྲན་པས་བྱང་སེམས་གབ་པ་ཡི།། འགྲེལ་བ་བཞི་རྫོགས་རིག་པའི་རྒྱ་མཚོ་གང་།། ཁུ་ཚ་ཟླ་འོད་ཉིད་ཀྱིས་སྤྱན་དྲངས་པའི།། གཏེར་མའི་བོན་འདི་ད་རེས་བདག་ཡང་མཇལ།། ལྟ་དགོངས་རྒྱུད་ལུང་མན་ངག་ཀུན་གྱི་སྙིང་།། ཀུན་བཟང་བཀའ་ཡི་མཐར་ཐུག་བྱང་སེམས་ཀྱི།། གབ་པ་འདི་ལ་གཞུང་འགྲེལ་རྣམ་བཞི་ཡི།། ལུགས་སོགས་ཇི་བཞིན་གསལ་བའི་མེ་ལོང་སྟེ།། སྤྱི་ཁོག་ཡན་ལག་བཅོ་བརྒྱད་འདི་ན་འཆད།། རྫོགས་ཆེན་ལ་བརྟེན་བྱང་སེམས་གསུང་ལུགས་འདི།། མི་མཐུན་ཐུབ་པའི་གསུང་ལུགས་ཡིན་བྱེད་ཀྱི།། གནས་ལུགས་ཟབ་མོ་བླ་མས་གསུང་མྱོང་བས།། རྩ་རྒྱུད་བྱང་སེམས་གབ་པ་དགུ་སྐོར་དང་།། ཡན་ལག་ལ་སོགས་བོན་རྣམས་འདི་རུ་བཀྲལ།། ཐེག་པ་ཆེ་ཆུང་གོང་འོག་རྣམ་འབྱེད་ཀྱི།། གལ་མདོ་གཏན་ཚིགས་དྲི་མེད་གསལ་སྒྲོན་ནང་།། མ་རྟོགས་ལོག་རྟོག་དྲི་མ་བཀྲུ་ཕྱིར་དུ།། རྩོད་ཟློག་ཚུལ་གྱིས་གོང་འོག་དོན་ལ་གཞོལ།། མཛུབ་ཁྲིད་ཐ་སྙད་ཚིག་གིས་རྗེན་པར་སྟོན།། གང་དག་རྨོངས་པའི་ཚོགས་ལ་ཕན་བྱེད་ཀྱི།། སྨན་མཆོག་དོན་གཉིས་ལྷུན་འགྲུབ་འབྱུང་གྱུར་བ།། ཡང་དག་ལྟ་བས་དོན་ལ་དབབ་ལུགས་ཏེ།། གནད་ཀྱི་ཞུན་མ་འདི་རུ་འཁྱིལ་ལགས་པས།། སྒོ་གསུམ་བག་དང་ལྡན་པས་ཡང་ཡང་ལེན།། གསལ་གསལ་དྲི་མེད་གསལ་སྒྲོན་སྒྲོན་མེ་འདི།། ཟབ་ཟབ་བོན་སྒོ་ཟབ་ཡངས་ཡངས་པའི་ཁམས།། ལེགས་ལེགས་ལུང་རིགས་ལེགས་སྟོན་སྟོན་པའི་ཕུལ།། མཛེས་མཛེས་དགག་སྒྲུབ་མཆོག་མཛེས་མཛེས་པའི་རྒྱན།། སྨིན་སྨིན་བདག་སོགས་རྒྱུད་སྨིན་སྨིན་གྲོལ་འཐོབ།། རྒྱ་ཞང་བོད་སོགས་བརྡ་ལ་ཀུན་བྱང་བའི།། གཡུང་མིང་འཇིགས་མེད་ནམ་མཁའ་རྡོ་རྗེ་ནས།། རབ་བྱུང་དྲུག་པར་སྦྱར་བའི་བསྟན་བཅོས་ཏེ།། གངས་ཅན་བོད་ཀྱི་བརྡ་སྐད་མིང་གཞི་ཡི།། ལུགས་སྟོན་དགོས་འབྱུང་ནོར་བུའི་གཏེར་ཆེན་མཐོང་།། གསུང་བསྟན་གདུང་སོབ་སློབ་མ་རྒྱན་དྲུག་རིང་།། རྒྱ་བོད་ཞང་དང་བྲུ་ཤ་ཨོ་རྒྱན་སོགས།། རང་རང་ཡུལ་དུ་བོན་རྣམས་སྒྲ་བསྒྱུར་མཛད།། དེ་ཡང་རིག་གནས་ལྔ་ཡི་རྣམ་གཞག་སོགས།། མ་ལུས་སྟོན་ལ་བསྟན་པའི་རྒྱན་དུ་གྲུབ།། ཁྱད་པར་འཛམ་གླིང་མི་ལ་སྐད་རིགས་ཏེ།། སུམ་བརྒྱ་དྲུག་ཅུ་ཡོད་པ་དེའི་གྲོལ་ཕུགས།། ལྷ་སྐད་རིགས་དྲུག་ཡིན་ལུགས་བརྗོད་པ་དང་།། ཤམ་བྷ་ལ་སྟེ་འོལ་མོ་གླིང་ཆེན་གྱི།། སྐད་རིགས་བརྒྱ་དང་རེ་བཞི་དེའང་སྨོས།། སྐབས་བབ་རང་གཞན་གྲུབ་མཐའི་རྗོད་བྱེད་ཀྱི།། ཚིག་སྦྱོར་བརྡ་སྐད་མིང་གཞི་མང་མོད་ཀྱང་།། སྤང་བླང་ཞིབ་དཔྱད་ལམ་ནས་འདིར་བཀོད་པ།། དཔྱོད་ལྡན་དགྱེས་པའི་མཆོད་པ་ཡིན་ངེས་པས།། འདི་ཡང་བརྡ་སྤྲོད་བསྟན་བཅོས་རྨད་དུ་བྱུང་།། སྟག་གཟིགས་སྤུངས་སོ་ཞང་ལུང་སྨར་ཆེ་ཆུང་།། བོད་ཀྱི་རྫབ་གཤར་དཀར་ནག་གཉིས་པོ་སྟེ།། རྒྱ་གར་ལཉྫ་ཝཱརྟུ་ལ་སོགས་པ།། བྱེ་བྲག་མང་ཡང་ངོ་བོ་འཕྲུལ་ཡིག་སྟེ།། བཞི་ཅུ་ཐམ་པ་ཡིན་པས་འགྱུར་མེད་གསུངས།། འདིར་ནི་བོད་ཡིག་དཀར་ནག་གཉིས་པོ་སྟེ།། ཨཱ་ལི་ཀཱ་ལིའི་འཇུག་རིམ་སྟོན་པ་དང་།། ཕྲད་དང་རྣམ་དབྱེ་སོགས་ཀྱི་འཇུག་ཚུལ་རྣམས།། གངས་ཅན་བརྡ་སྤྲོད་མང་པོར་མཐུན་བྱས་ཏེ།། སྤེལ་ལ་བློ་ལྡན་དགའ་བའི་བུ་རམ་ཉིད།། གཞན་ཡང་དུས་གསུམ་སྐུལ་ཚིག་རེའུ་མིག་ཏུ།། སྤྲོས་ལ་དབྱངས་གསལ་སྔོན་འཇུག་རྗེས་འཇུག་དང་།། ཡང་འཇུག་ལ་སོགས་ཕོ་མོ་མ་ནིང་གི།། རྟགས་ཀྱི་འཇུག་ཚུལ་རྣམས་ཀྱང་འཁོད་པས་ན།། སུམ་རྟགས་ནོར་བུའི་མཛོད་ཆེན་ཅི་ལ་མིན།། ཞུ་ཡས་ཉི་མ་གྲགས་པས་མཛད་པ་ཡི།། ཞང་བོད་སྒྲ་བསྡེབས་དབུ་ཕྱོགས་བཞུགས་པ་གང་།། གོ་དཀའི་མིང་དང་ཐ་སྙད་གསལ་བྱེད་ཀྱི།། ཤན་སྦྱར་ནོར་བུ་རྡུལ་སྤུངས་ཡིན་པས་ན།། བོན་ལ་གཅེས་རྣམས་མ་ལུས་འཛིན་པ་གལ།། བཙུན་པ་ཚུལ་ཁྲིམས་བསྟན་པའི་རྒྱལ་མཚན་གྱིས།། གཞན་གྱིས་དྲིས་པའི་དྲིས་ལན་བདེན་གཏམ་ལ།། དཔྱིད་ཀྱི་ཕོ་ཉ་ཞེས་བྱར་བོན་ལུགས་ཀྱི།། དྲན་པ་ཡབ་སྲས་གསུམ་གྱི་གནས་ཚུལ་དང་།། ལྷག་དོན་ཨོ་རྒྱན་པད་མའི་དངོས་རྣམ་བརྗོད།། ཨོ་རྒྱན་པད་མ་རྫུས་སྐྱེས་མིན་ཚུལ་དང་།། གཡུང་དྲུང་མཐོང་གྲོལ་ལ་སོགས་མིང་གི་གྲངས།། མང་དུ་ངེས་པའི་ཚུལ་དག་སྐབས་དེ་ཡི།། ལོ་རྒྱུས་དངོས་ལ་གང་སྦྱར་ར་སྤྲོད་པའི།། བདེན་གཏམ་དཔྱིད་ཀྱི་ཕོ་ཉ་དབྱངས་དང་ལྡན།། ཁྱད་པར་གཤེན་བསྟན་གསར་རྙིང་རྩོད་པ་དང་།། བོན་ཆོས་དབྱེ་འབྱེད་ལོག་ལྟའི་གཡུལ་ངོ་རུ།། བདུད་ཟློག་མཐུན་པའི་མཛའ་ཟམ་དགོས་པ་ཡི།། སྙིང་གཏམ་སྙིང་ནོར་གཅེས་བཞིན་འཆད་གྱུར་བས།། དང་དུ་ལོངས་ཤིག་སྐལ་ལྡན་གཞོན་ནུ་ཀྱེ།། གཤེན་གྱི་དྲང་སྲོང་ཤྲི་ངྷ་ཛ་ཡིས།། སྦྱར་བའི་བསྟན་བཅོས་མངོན་བརྗོད་རིན་ཆེན་ཕྲེང་།། དགེ་སྦྱོང་གཡུང་དྲུང་རིན་ཆེན་རྒྱན་གྱིས་ནི།། གོང་བསྒྲིགས་ཁ་སྐོང་བགྱིས་ཏེ་རྗེས་རབས་ལ།། སྐྱེས་སུ་བསྩལ་བ་ཨེ་མ་མཐོང་མཚར་ཆེ།། རྒྱལ་བ་སྲས་བཅས་བྱང་སེམས་འཕགས་པ་དང་།། ལྷ་ཀླུ་མི་གསུམ་འགྲོ་བ་ཇི་སྙེད་ཀྱི།། མིང་གཅིག་དུ་མར་འཇུག་པའི་ཚུལ་དག་ནི།། འདྲ་འབྲེལ་རྒྱུ་འབྲས་རྟེན་རྫས་ལ་སོགས་ཀྱི།། མིང་གི་བཏགས་ལུགས་ལ་སོགས་གསོང་བོར་སྨྲ།། མིང་ལ་དབྱེ་ན་དངོས་མིང་བཏགས་མིང་དང་།། འདོད་རྒྱལ་རྗེས་གྲུབ་ལ་སོགས་མཐའ་ཡས་ཀྱང་།། ཉེར་མཁོ་གཅེས་བསྡུས་ཚུལ་གྱིས་རབ་སྤེལ་བ།། ཀ་ནས་ཨ་བར་བསྒྲིགས་པའི་ཕྲེང་བ་སོགས།། ཀློག་བདེ་འཛིན་སླ་འདིས་ཀྱང་ཀུན་མཁྱེན་འཐོབ།། གཙང་གཤེན་སྙན་ངག་མཁན་པོའི་རྒྱན་གསུམ་གྱི།། དཔེར་བརྗོད་འཁྲུལ་བྲལ་དཔྱོད་ལྡན་ཡིད་འཕྲོག་ཅེས།། སྙན་པའི་ངག་ལ་འདོད་འཇོའི་གར་རྩེན་པ།། གཙང་གཤེན་དགྱེས་པའི་བློ་ལྡན་མཆོག་ཉིད་ནས།། ལེགས་པར་སྦྱར་འདིས་གནས་ལྔའི་རིག་པ་འཕེལ།། དོན་རྒྱན་དང་ནི་སྒྲ་རྒྱན་གབ་ཚིག་དང་།། རང་བཞིན་དང་ནི་བྱ་དཀའི་རྣམ་འགྱུར་སོགས།། མེ་ལོང་མ་ཡི་ལུགས་རྣམས་སྦྱོང་འདྲ་བ།། རང་གི་བསྟན་དང་མཐུན་པར་བྱས་གྱུར་ནས།། དཔེར་བརྗོད་བརྩམས་འདི་ཀྱེ་མ་ངོ་མཚར་ཆེ།། རྒྱལ་བསྟན་རི་དབང་ལྷུན་པོའི་ཞབས་འདེགས་ལ།། རྒྱལ་རྣམས་སྦྱར་བའི་གསུང་རབ་མཐའ་ཡས་ཏེ།། རྒྱལ་མཆོག་སྟོབས་ཀྱིས་ངག་གི་རི་མོ་དག། རྒྱལ་བ་དགྱེས་པའི་དཔལ་ཏུ་ཡོངས་སྩོལ་ན།། རྒྱལ་སྲིད་ལོངས་སྤྱོད་མངའ་ཐང་ཅིས་མི་འཕེལ།།