མཚམས་ཤིག་ལ། ༼སྡེ་ཚན་གསུམ༽
རྩོམ་ཡིག་འདི་ཐེངས། 372 བཀླགས་འདུག
།
ཉི་འོད་ཀློང་གི་རོལ་མོ་དག་ཅིག་ཅར་གྲགས་པ་བཞིན།
བྱ་གླག་གིས་སེམས་ཁྲལ་དང་།
བྲག་ཐེམ་གཉིས་གཤོག་སྟེང་གི་རྡུལ་བཞིན་སྤྲུགས།
སྐྱེ་འཆིའི་མེ་ལོང་དུ་གསང་སྟབས་ཀྱིས་གོམ་པ་སྤོས་པ་ན།
གློ་བུར་ཏུ་སྒོ་རྡུང་མཁན་དེ་སུ་ཡིན།
ཚ་གྲང་འཐག་པའི་ཐ་གུའི་སྣེ་མོ་གཉིས་སུ།
བདག་དང་གྲིབ་མ་སྟོང་ཉིད་དུ་འབྱམས་ཀླས་པ་བཞིན།
འཆི་བ་བསྒོམ་པ་བཞིན། སུ་དང་གང་ལ་མི་གཏོགས།
ཁང་མིག་སྟོང་བ་དེའི་གྱང་ངོས་སུ་བྱ་ཁྱུ་དཀར་པོ་ཞིག་བྲིས།
བྱ་ཁྱུའི་གཤོག་པར་སྐྱེ་བ་འདི་དང་ཕྱི་མ་གཉིས་བྲིས།
མིག་ཟུང་བཙུམས་ཀྱང་དྲན་པའི་ངོས་སུ་ནམ་མཁའ་མི་འདུག
ནག་པོའི་སྙན་ངག་པ་ཚན་པ་ཞིག
བདག་གི་དྲན་ཡུལ་གྱི་སྨག་མུན་གཙང་བོ་ནས་ཤི་སོང་ངོ་།
གློ་རྡེག་ལ་གསང་བའི་སྒོ་གླེགས་དེ་སྐྱེ་བ་ཕྱི་མ་ནས་བརྡུང་བ་ན།
འཇིག་ཚར་བའི་རྩེད་ར་ཞིག་ལ་ཆར་བ་ཤག་ཤག་ཏུ་བབས།
ཁྱེད་ནི་གཞན་ཞིག་མིན་ཏེ།
བདག་གི་མུན་ནག་དང་གཉིས་སུ་མེད།
།
ལྷིང་འཇགས་ཀྱི་ས་སྲོད།
།
སྐྲ་ལོ་དཀར་སོང
སྐྲ་ལོ་རེ་རེས་ང་ལ་ལམ་དཀར་བོ་རེ་བསྟན་མྱོང
ཨ་མ་ནི་ལམ་སྣེ་ན་མིག་ཆུ་མང་བའི་མཚོ་མོ་ཞིག་སྟེ
ཚད་མེད་པའི་ལོ་ཟླའི་འོག་ཏུ་ཆར་ཐིགས་རེ་བསྙིལ
ངའི་མིག་ཟུང་གིས ཆར་ཐིགས་རེ་རེ་རྒྱ་མཚོར་ངེས
མག་མོག་གི་དྲན་པས ཟིལ་བའི་གཡོར་གྲུ་ཞིག་བཟོས
ཨ་མ་ལགས རྨི་ལམ་དུ་ཐག་རིང་གི་བསིལ་གྲིབ་ཅིག་མཐོང་ངམ
གོམ་འགྲོས་ཇེ་དལ་དུ་སོང
སྐྱེ་ནས་ད་བར་དུ་ང་ལ་བྱིའུ་ཚང་གྲངས་མེད་ཅིག་བཟོས
བྱིའུ་ཚང་རེ་རེ་དྲོད་འཇམ་གྱིས་ཟིན་ཡོད
ཨ་མ་ནི དབེན་སིམ་གྱི་རས་འཐག་པའི་དཀོན་མཆོག་ཅིག་སྟེ
མཐོང་དུ་མི་བཏུབ་པའི་སྐུད་པ་རེས
ང་ཡི་ཚེ་སྲོག་གི་མུ་ཏིག་དག་ཕྱོགས་གཅིག་ཏུ་བརྒྱུས
ས་སྲོད་ཀྱི་ལྷིང་འཇགས་སུ
ཟིལ་བ་གྱོན་པའི་བྱིའུ་འགས་ང་རང་གཉིད་ལས་བསླངས
ང་ལ་མཛའ་མོ་མེད་ན་ཆོག
འོན་ཀྱང་ང་ཡི་འབྱུང་བཞིའི་ཁམས་སུ
དབེན་སིམ་དུ་སྡོད་པའི་ཆར་ཐིགས་ཤིག་ངེས་པར་འཐིམ་དགོས
ཁེར་རྐྱང་གི་མཚན་མོར་རྦ་རླབས་མེད་པའི་མཚོ་མོ་སྐྱེལ་མཁན་ཀྱེ
ཨ་མ་ལགས གཏིང་ཟབ་པའི་མཚོ་ནང་དུ་བདེ་སྐྱིད་འཕྱུར་བ་མཐོང་ངམ
།
གཙང་འགྲམ་གྱི་གདུང་སེམས།
།
ངའི་ལག་མཐིལ་གྱི་རི་མོའི་ནང་དུ་རྒྱ་མཚོ་ཆེན་པོ་ཞིག་ཡོད
གློ་རྡེག་ལ་ཁྱོད་ཀྱིས་རི་མོ་དེ་རང་སེམས་ཀྱི
ནག་ཐིགས་ཤིག་ཏུ་བསམ་བཞིན་བསུབས་པས
ང་རང་རྒྱ་མཚོ་ཆེན་པོ་དེའི་གཏིང་དུ་བྱིངས་སོང
གནས་དེ་རུ་མཚོ་འབུ་སྐར་མ་རེ་དང
ཁ་མི་གྲག་པའི་རྡོ་བ་རེ་ལས་ཅི་ཡང་མི་འདུག
ང་རང་རྡོ་བར་ཁེན་ནས་མཚོ་འབུ་སྐར་མ་རེ་རེའི
དྭངས་གཙང་གི་འགུལ་སྐྱོད་ལ་བལྟས་པ་ཡིན
ཁོ་ཚོས་ང་ཡི་རྨི་ལམ་དུ་ལྷིང་འཇགས་ཀྱི་སྒེའུ་ཁུང་ཞིག་བཟོས་སོང
སྒེའུ་ཁུང་ནང་ནས་ཆུང་དུས་ཀྱི་རྩེད་ར་མཐོང་ཐུབ
སྐབས་རེར་ངས་ཁོ་ཚོ་རང་གི་ཕ་མ་དང
གཉེན་ཉེ་མཛའ་གྲོགས་སོགས་ཡིན་པར་བློས་བསླངས་བྱས་པ་ཡིན
ཁོ་ཚོས་ང་ལ་སྣང་དོགས་བྱེད་མི་སྲིད
ང་ནི་རྡོ་བ་ཞིག་རེད་བསམ་ནས
ཁོ་ཚོས་ངའི་ལུས་སྟེང་ནས་གནས་ཚང་ཞིག་འཚོལ་བཞིན་འདུག
དོན་ངོ་མར་ངས་ཀྱང་གནས་ཚང་ཞིག་འཚོལ་བཞིན་ཡོད
མཚོ་ཞབས་ནས་ནམ་མཁར་བལྟས་ན
མཚོ་སྟེང་གི་འགྲུལ་བཞུད་མཐོང་ཐུབ
གྲུ་བ རྦ་རླབས གྲུ་ཡོར
གྲུ་ཁེམས་སོགས་མཐོང་ཐུབ
དུས་ཚོད་དང་མི་ཡུལ་གྱི་འགལ་འདུའི་རྦ་རླབས་ཀྱིས་དེད་པའི
གྲུ་བ་ནི་མཚོ་སྟེང་ནས་ཧ་ཅང་ཆུང
མཚོ་ཞབས་ཀྱི་མཚོ་འབུ་སྐར་མ་དག་ལས་ཀྱང་ཆུང
སྐྱོ་ཡུས་ཀྱི་གྲུ་ཁེམས་རེ་རེས་དངུལ་ཆུ་དང་མཚོ་ཆུ་མཉམ་དུ་དཀྲུགས
མི་ཡུལ་གྱི་ཉེས་པ་ལྟ་བུའི་གྲུ་ཡོར་གྱིས
མཚོ་ཞབས་འདི་མུན་པས་བསྒྲིབས་པ་ན
ང་ཡི་གནས་ཚང་ཞིག་འཚོལ་ཐབས་མ་བྱུང
མཚོ་འབུ་སྐར་མ་དེ་ཚོ་ཡང་ཡུལ་ལ་ལོག་ཐབས་མ་བྱུང
སྐབས་འདིར་ང་ཡི་མིག་ཆུ་གཤོག་པ་ཆད་པའི་ཕྱེ་ལེབ་ཅིག་ལྟར
ཡིད་ཀྱི་སྐྱོ་གདུང་དང་བཅས་འབྲི་བཞིན་པའི་རི་མོའི་སྟེང་དུ་བབས་པ་ན
རི་མོ་དེའི་ལས་སྐལ་ཆུ་ཐིགས་ཕྲ་མོས་་ཁུར་ནས་རྒྱ་མཚོར་འདྲེས་སོང
ཤུལ་དུ་ལུས་པའི་རི་མོ་བསུབས་ཤུལ་གྱི་ཤོག་བུ་སྟོང་བ་དེ་བྱེ་ཐང་སྐྱ་བོ་ཞིག་ཏུ་གྱུར་སོང
གཙང་འགྲམ་གྱི་ང་ཡང་ཕྱིར་ཡུལ་དུ་ལོག་སོང
།
༢༠༡༥།༡༠།༥ཉིན་གསེར་ཐང་ནས་བྲིས།
།
བསམ་ཚུལ་ཕྲིས།