བོན་དཔེ་འགར་གཟིགས་པའི་མྱོང་ཟིན་གཞོན་ནུ་འོད་ལྡན།（ཁག་དང་པོ།）

རྩོམ་ཡིག་འདི་ཐེངས། 345 བཀླགས་འདུག

༄༅།།རང་ལ་བག་ཆགས་འཇོག་ཕྱིར་གངས་ཅན་བོད་ཀྱི་བོན་དཔེ་འགའ་ལ་གཟིགས་པའི་མྱོང་ཟིན་ཚིགས་བཅད་རྐང་བ་ལྔས་བསྡེབས་པ་གཞོན་ནུ་འོད་ལྡན་ཞེས་བྱ་བ་བཞུགས་སོ།།

།

ཞང་སྐད་དུ། སད་ནི་སྤུངས་སོ་རད་ན་ཙེ། དམུ་ར་ཏི་ཅུ་པ་ཏ་ཡ། ཀ་ཡ་ཨག་ཤོ་དྲི་ཏི་སུམ་ཨཀྱོ་སངས། གྱི་གྲན་པ་ཤང་སྡྷིང་འདུ། བོད་སྐད་དུ། ལྷ་མི་སྟོན་པ་རིན་པོ་ཆེ།། གཤེན་རབ་ཉིད་ལ་ཕྱག་འཚལ་ལོ།། ལུས་ངག་ཡིད་གསུམ་སྒྲིབ་པ་དག། དགྲ་བགེགས་དབང་སྡུད་དངོས་གྲུབ་སྩོལ།། བརྒྱ་བའི་མགོན་པོ་རྒྱལ་བ་གཤེན་རབ་དང་།། གདུང་སོབ་སྟོན་པ་མུ་ཆོ་ལྡེམ་དྲུག་སྟེ།། འཛམ་གླིང་རྒྱན་དྲུག་མཁས་པ་མི་བཞི་སོགས།། བསྟན་པའི་བདག་པོ་རྣམས་ལ་གུས་ཕྱག་འཚལ།། ལོ་པཎ་གཤེན་བརྒྱད་བྲུ་ཞུ་སྤ་རྨེའུ་དང་།། གཤེན་གྱེར་རྨ་དབྱིལ་མཉམ་མེད་བླ་མ་སྟེ།། འགྲོ་མགོན་དང་ནི་སྣང་སྟོན་ཟླ་བ་སོགས།། གཤེན་བསྟན་སྲོག་འཛིན་རྣམས་ལ་དུས་རྟག་བསྙེན།། སྙིགས་དུས་འགྲོ་བའི་མུན་པ་བསལ་ཕྱིར་དུ།། བོན་དཔེ་འགའ་ལ་གཟིགས་པའི་མྱོང་ཟིན་ཙམ།། ཚིགས་བཅད་རྐང་བ་ལྔ་ཡིས་བསྡེབས་པ་ཡི།། གཞོན་ནུ་འོད་ལྡན་བྱ་བ་འདིར་འགོད་དེ།། བོད་ཀྱི་ཕ་ཆོས་བོན་གྱི་རིག་གཞུང་དག། བོད་མི་ཁ་ཤས་བོན་ལ་འདྲིས་རྟོགས་དབེན།། བོད་ཀྱི་ཆོས་རིག་བོན་རྣམས་མི་ཉམས་ཕྱིར།། བོད་ལ་དགའ་བའི་བོན་ཕྲུག་བདག་གིས་སྤེལ།། བོན་འཁོར་ཚིག་བཞི་ཞེས་བྱའི་བརྒྱད་སྟོང་བོན།། ཡང་བཅུད་གཅིག་ཏུ་བསྡུས་པའི་སྙིང་བོའི་བོན།། གཤེན་གྱིས་དཀའ་ཐུབ་མཛད་ནས་བདུད་བཏུལ་རྟིང་།། སྔོན་ཚེ་ཁྱེའུ་ཆུང་ལ་བསྟན་གདམས་ངག་གང་།། ད་ནི་གཏོ་འབུམ་ལ་སོགས་འཁོར་ལ་བསྩལ།། ལྟ་སྤྱོད་གཞི་གསུམ་གནད་ཀྱིས་དབུ་ཕུབ་ཏེ།། བདེན་གཉིས་འཁོར་བའི་བོན་རྣམས་མ་ལུས་ཀུན།། རྣམ་པར་དབྱེ་ཞིང་བཀྲལ་བའི་ཕྲེང་བསྒྲིགས་ཏེ།། སོ་སོར་མ་ལུས་ཚིག་གིས་གསལ་བྱས་པ།། སྐུ་གསུམ་ལྷུན་གྲུབ་ངང་གིས་བདེ་ལེགས་རྫོགས།། སྦྱིན་སོགས་ཕྱིན་དྲུག་སྤྱོད་པའི་སྣང་བ་དེ།། ཐབས་དང་ཤེས་རབ་ཟུང་དུ་སྦྲེལ་བའི་ངག། སྣང་སྟོང་དབྱེར་མེད་ལམ་ནས་གཞི་ལམ་འབྲས།། གདུལ་བྱའི་ཁམས་དང་བསྟུན་འདི་གསུངས་པའི་དགེས།། བདག་སོགས་འཁོར་བའི་ལས་ཉོན་དག་པར་ཤོག། དྲང་སྲོང་བདེ་ལེགས་ཞེས་བྱའི་ཕྱག་དཔེ་འདི།། དོན་གཉེར་ཅོལ་ཆུང་བདག་འདྲས་ཀློག་ཐུབ་པ།། ཚེ་དང་བསོད་ནམས་བསྐལ་བའི་དཔལ་སྙམ་པས།། ནད་གདོན་དབུལ་ཕོངས་འཐབ་རྩོད་རབ་ཞི་ནས།། ཡེ་ཤེས་ཆེན་པོས་རང་རྒྱུད་ཟིན་པར་ཤོག། ཤེས་རབ་བླ་ན་མེད་པར་ཕྱིན་པའི་མདོ།། མངོན་པར་རྟོགས་པ་ལམ་གྱི་རིམ་རྒྱན་གང་།། སྟོང་ཕྲག་བརྒྱ་བའི་དོན་སྙིང་དག་བསྒྲིགས་ཏེ།། ཁམས་བརྒྱད་གཏན་ལ་འབེབ་བྱེད་སྙིང་བོ་ཀུན།། མ་ལུས་གཅིག་ཏུ་དྲིལ་བ་ཤེས་པས་མཇལ།། གཤེན་གྱི་དྲང་སྲོང་ཚུལ་ཁྲིམས་དཔལ་ཆེན་ནས།། སྦྱར་བའི་ཕྱག་དཔེ་བླ་མེད་མངོན་རྒྱན་འདི།། མཁས་དང་མཁས་མིན་ཀུན་ལ་བོགས་རེ་སྟེ།། བླ་མེད་ཕྱིན་ལུགས་ལེགས་པར་མཐོང་སྨོས་ན།། བདག་འདྲ་བཤད་ཅི་ཨེ་མ་སྟོབས་ཀྱིས་འཇུག། བདེར་གཤེགས་སྣ་ཚོགས་འབྱུང་གནས་གང་ཡིན་དང་།། ཟབ་ཡངས་རྒྱ་ཆེའི་རྟོགས་པའི་ལམ་མ་ནོར།། གཉིས་སྣང་དངོས་ཀུན་རྟེན་པའི་གཞིར་གྱུར་གང་།། ལུགས་དང་ལུགས་མིན་རྣམ་འབྱེད་ཕུགས་ཆོད་སོགས།། བདེན་བརྡར་སྟོན་པའི་ཡུམ་དེས་ཤིས་པ་སྩོལ།། ཁམས་བརྒྱད་སོ་སོའི་མཚན་ཉིད་དངོས་བསྟན་ནས།། སྐྱེ་མེད་འགག་མེད་རྒྱུ་འབྲས་རྟེན་འབྱུང་དང་།། ཕྱིན་དྲུག་དང་ནི་ས་བཅུ་ལམ་ལྔ་སོགས།། བཀར་རྟགས་ཕྱག་རྒྱས་མདུད་པ་ཀུན་ཁྲོལ་ཏེ།། སྣང་བ་བོན་ཉིད་དབྱིངས་སུ་ཞུགས་ཙམ་རྟོག། དམིགས་མེད་སྤྲོས་མེད་བརྗོད་འདས་བོན་ཐམས་ཅད།། མཉམ་ཉིད་བཅོ་བརྒྱད་དོན་ལ་འདུས་ཚུལ་དང་།། མཁས་རྣམས་མདོ་ཡི་བཅད་ཚིག་རྒྱས་པ་སོགས།། རྣམ་གྲངས་མིང་གིས་མདོ་གཞུང་ལེགས་བསྡུས་ཏེ།། འཁྲུལ་བྲལ་ཡེ་ཤེས་ཆེན་པོས་གསུང་བ་རྨད།། ཁྱད་པར་རྒྱལ་གཤེན་མཚན་བཟང་དཔེ་བྱད་ལ།། ལེགས་པའི་ཡོན་ཏན་དཔེ་དང་ངོ་བོ་ཡིས།། གསལ་སྟོན་ཕུན་ཚོགས་དཔལ་གྱིས་མངོན་འཁྱུད་དེ།། ལྐུག་པ་ཁ་འབྱེད་འཕྲུལ་ངག་བདེན་པའི་དོན།། རིན་ཆེན་གཟུངས་སྣོད་རུང་བར་བསིལ་སྦྱིན་མཛད།། ཚེ་ཚད་རིག་པར་མཇལ་བའི་ཤེས་རྣམས་ཀུན།། ཤེར་ཕྱིན་མངོན་རྒྱན་ཞིབ་ལུགས་འཁྲོལ་དཀའ་ན།། བདག་འདྲ་ཅི་སྨོས་བམ་ཀློག་གཞལ་ཚད་ཅིག། ཟིན་ཏིག་ཚུལ་དུ་མི་བརྗེད་གཟུངས་ལྡན་ལ།། བག་ཆགས་འཇོག་ཕྱིར་བྲིས་འདིས་དགེ་འཕེལ་ཤོག། འགྲོ་མགོན་བླ་མའི་བཞེད་གཞུང་སྨ་མེད་པ།། ས་ལམ་རིམ་བགྲོད་འཕྲུལ་གྱི་སྒྲོན་མེ་གང་།། རྒྱལ་བ་གཉིས་པ་མཉམ་མེད་ཆེན་པོ་ནས།། རང་གཞན་ཀུན་ལ་ཕན་ཕྱིར་ཚིག་སྤེལ་བ།། སྒོ་གསུམ་གུས་པས་བཏུད་ཏོ་བསྟོད་ཕྱག་བགྱི།། འཁོར་བའི་བོན་དང་མྱང་འདས་བོན་གྱི་ཁྱད།། བདག་འཛིན་བློ་དང་བདག་མེད་རྟོགས་པས་དབྱེ།། འཁོར་འདས་གཞི་རྩ་བདེན་གཉིས་སུ་འདུས་པ།། རྣམ་མཁྱེན་བཞེད་པས་ཡིན་ལུགས་དེ་བཞིན་དུ།། དོན་དམ་དང་ནི་ཀུན་རྫོབ་དཔེ་ཡིས་སྟོན།། སྤྲོས་བྲལ་བདེ་བ་ཆེན་པོའི་ཕོ་བྲང་ལ།། བདེན་བཞིའི་གནས་ལུགས་དེ་ཉིད་གསལ་བྱས་ཏེ།། ས་དང་ལམ་གྱི་ཡོན་ཏན་རིམ་བགྲོད་དེ།། ཡིན་ཚུལ་བཞི་ཡི་ལེའུ་དང་པོར་འཆད།། རྟེན་ཅིང་འབརེལ་འབྱུང་ཡིན་པའང་དེ་ཡིས་དཔོགས།། རྐྱེན་སློང་ལམ་དང་འཕྲད་པས་སངས་རྒྱས་རུ།། མངོན་པར་འཐོབ་འདོད་རིམ་པའི་ཐེམ་སྐས་ཏེ།། རྒྱུ་དང་རྐྱེན་དང་བསྐྱེད་སོགས་དགེ་གྲུབ་པས།། རྒྱལ་མཆོག་ཐུགས་རྗེའི་སྟོབས་ཀྱིས་ཉེར་དྲངས་པ།། དཔོན་གསས་ལ་བརྟེན་ལམ་གྱི་སྒྲོན་མེ་བཀར།། གཞི་ལམ་ཡོན་ཏན་རྫོགས་པའི་གཏིང་རྡོ་ལ།། བསོད་ནམས་ཚོགས་རྫོགས་ཡེ་ཤེས་དྲོད་བསྐྱེད་དེ།། འབྲས་བུ་སངས་རྒྱས་གོ་འཕང་མྱུར་བགྲོད་དུ།། མཚན་དང་རྣམ་དབྱེ་རྒྱས་འགྱུར་ཡང་དག་བོན།། ཐུགས་དག་མེ་ལོང་ངོས་སུ་མཐོང་ངེས་བསྟན།། གཞི་ལམ་འབྲས་གསུམ་གསལ་བྱེད་སྒྲོན་མེ་འདི།། རིགས་སྨྲ་བདག་ནི་ནུས་ཚོད་ཙམ་མཇལ་བ།། དད་པའི་སྤུ་ལོང་རབ་ཏུ་གཡོས་གྱུར་ནས།། འདོད་བློའི་ངག་ཚིག་པད་མའི་མདངས་བརྒྱན་པ།། འཁྲུལ་བཤགས་བདག་བཅས་གུ་ཡང་གནང་བ་སྩོལ།། དབུ་མ་བདེན་གཉིས་ཞེས་བྱའི་རྣམ་གཞག་གང་།། ཚ་རོང་གར་ཤེལ་ཤེས་རབ་འོད་ཟེར་ནས།། ཚེག་བར་བདུན་མའི་སྙན་ཚིག་ཕྲེང་བསྒྲིགས་ཏེ།། ཐེག་ཆེན་གཞུང་གི་སྙིང་བོ་བསྟན་གྱུར་བ།། འབད་པས་གཟིགས་སོ་རྣམ་དཀར་དགེ་ལེགས་སྩོལ།། འཛིན་པའི་བློ་ལ་གཉེན་པོའི་མཆོག་གྱུར་བ།། བདེན་གཉིས་མཐར་བཀྲལ་དགོངས་པའི་དོན་གྱི་གནད།། ཕྱི་ནང་འཁོར་འདས་བོན་གྱི་གནས་ལུགས་དག། ཇི་ལྟ་ཇི་བཞིན་དཔེ་དོན་རིགས་གསུམ་གྱིས།། ཕངས་མེད་འགྲོ་ལ་སྦྱིན་འདི་དངོས་གྲུབ་ཕོབས།། དེ་ཡང་ས་ལམ་འཕྲུལ་སྒྲོན་རང་འགྲེལ་འདི།། མཉམ་མེད་བླ་མས་རྒྱལ་བསྟན་གནས་ཕྱིར་དུ།། བཀྲ་ཤིས་སྨན་རིའི་ཁྲོད་དུ་སྦྱར་བ་དེས།། བདག་སོགས་འགྲོ་ལ་ཕན་པའི་སྨན་བྱིན་པ།། ཨེ་མ་དྲིན་ཆེ་རིག་པ་མཐར་ཕྱིན་ཤོག།གོང་གསལ་སྒྲོན་མེའི་གཞུང་གི་གནད་ཚིག་དག། གདུལ་བྱའི་བབས་དང་བསྟུན་ནས་གསེད་བཀྲོལ་བ།། ཕན་པར་འགྲེལ་མཛད་བདག་བློའི་ཀུད་མེད་ལ།། ཟླ་བསིལ་འགོག་མེད་སྦྱིན་པས་རིག་སྟོབས་འཕེལ།། འཕེལ་གང་དགའ་བས་བརྟས་པ་ཛམ་ལྷར་འཁྲུལ།། མེ་སྟོན་ཤེས་རབ་འོད་ཟེར་མཆོག་གིས་ནི།། བརྩམས་ཤིང་སྤེལ་བའི་དབུ་མ་བདེན་གཉིས་གཞུང་།། གོ་སླར་འཁྲོལ་ཕྱིར་རྗེ་བཙུན་མཉམ་མེད་པས།། འགྲེལ་བ་བརྩམས་པ་རང་གིས་དེ་མཐོང་བ།། ལྕགས་ཐོག་རྣོ་ཡི་དཔེ་བཞིན་གོ་ཙམ་བྱུང་།། ཟབ་མོའི་དོན་སྟོན་སྙིང་བོའི་བོན་རབ་མཆོག། མཆོག་ཏུ་འཛིན་པ་བདེན་གཉིས་གསང་བའི་གནད།། གནད་བརྒྱ་གཅིག་ཏུ་འདུས་པའི་ཕན་བྱེད་སྨན།། སྨན་པར་གྱུར་གང་འགྲེལ་འདིས་ལེགས་བཤད་སྟོང་།། སྟོང་གསུམ་ཁྱབ་པར་སྒྲོག་པ་ཅིས་མི་མཚར།། གཉེར་དོན་དང་ནི་བོན་གྱི་རང་བཞིན་དང་།། བཤད་ལུགས་རང་གཞུང་དང་བསྟུན་རྒྱས་པ་རུ།། རྣམ་པ་གསུམ་གྱི་སྒོ་ནས་ལེགས་འཆད་པ།། དེའང་བྱེ་བྲག་མཆོད་དང་དམ་བཅའ་སོགས།། རྣམ་པར་དབྱེ་ཞིང་དོན་ཁྲོལ་བདག་བློ་བསྐྱངས།། མཁན་མིང་འཛིན་པ་ཉི་རི་ཤེལ་བཞིན་ནས།། ལེགས་པར་བསྡུས་ཤིང་སྤེལ་བའི་རྣམ་འབྱེད་ཀྱི།། མཚན་ཉིད་ཚིག་བཀྲའི་རིམ་པ་མཐར་ཆགས་སུ།། བཀྲ་ཤིས་ཕུན་ཚོགས་དགེ་བས་ཆར་འཇོ་བ།། བདག་འདྲ་དད་ཅན་གཤིན་ས་བརླན་པར་མཛོད།། འཕྲུལ་སྒྲོན་མཆོད་བརྗོད་རྣམ་གཞག་ལས་འཕྲོས་ཏེ།། ཁོག་དབུབ་ཁྱུང་ཆེན་ལྡིང་འདྲའི་གསལ་བྱེད་དུ།། ཀླད་གཞུང་རྩོམ་པ་མཐར་ཕྱིན་ས་བཅད་གསུམ།། དགོས་དང་དམིགས་ཆེད་གང་ཡིན་ཕུལ་ཕྱིན་གྱི།། ཡང་དག་གནས་ལུགས་གཏན་འབེབ་མཛད་གང་དགེ། སྟོན་པ་དང་ནི་གདུང་སོབ་ཆེན་པོ་དང་།། འཛམ་གླིང་རྒྱན་དྲུག་ལོ་པཎ་གཤེན་བཞི་དང་།། བླ་ཆེན་དྲན་པ་འགྲོ་མགོན་བློ་གྲོས་སོགས།། ཚད་མའི་སྟོན་པ་རྣམས་ལ་ཁུངས་བཅོལ་ཏེ།། འཕྲུལ་གྱི་སྒྲོན་མེའི་བསྟན་བཅོས་བརྩམས་ལུགས་བཤད།། དགག་སྒྲུབ་རིག་པ་རྣོན་པོའི་ཐལ་ཕྲེང་གིས།། ས་བཅད་དང་ནི་རབ་དབྱེ་སོ་སོ་ཡི།། གཞུང་ཁུངས་ཇི་ལྟར་བྱུང་བའི་ཡིན་ལུགས་ཤིག། འཐད་ལྡན་བསྒྲུབས་པའི་འབྲས་རྟགས་བླ་མེད་པ།། མཚན་ཉིད་ཚིག་བཀྲས་འགྲོ་རྣམས་མུན་སེལ་སྒྲུབས།། བརྡ་སྤྲོད་ཀུན་སྙིང་སྲིད་པའི་སྒྲོན་མེ་འདི།། རྒྱ་བོད་ཞང་སོགས་བརྡ་ལ་ཀུན་བྱང་བ།། འཇིགས་མེད་ནམ་མཁའ་དཔལ་བཟང་གང་དེ་ཡིས།། ཁྱུང་ཆེན་སྤུངས་རིར་མགྱོགས་བྲིས་བྱས་གང་དགེས།། བདག་སོགས་བརྡ་ལ་རྨོངས་རྣམས་བསྐྱབ་ཏུ་གསོལ།། སུམ་རྟགས་ཀུན་ཚང་རྩ་འགྲེལ་ཟུང་མཐུན་འདིས།། བཀའ་དང་བསྟན་བཅོས་དགོས་འདོད་རབ་བཀྲལ་ནས།། ཚེག་བར་བདུན་མས་དཔེ་དོན་རྒྱས་བསྟན་པ།། རང་གཞན་ཀུན་ལས་ཁྱད་དུ་འཕགས་པ་ནི།། ཡི་གེ་འབྱུང་བས་སྟོན་འདི་ཅིས་མིན་ནམ།། འཕྲུལ་ཆེན་ཡིག་སྦྱོར་ཀུན་སྙིང་བརྡ་སྤྲོད་སྲོག། སྲོག་འཛིན་རྒྱལ་བསྟན་རི་དབང་བརྗིད་ཅིང་བརླིང་།། བརླིང་བའི་ལེགས་བཤད་ཐབས་ཤེས་ཟུང་གི་འཕྲུལ།། འཕྲུལ་ཡིག་བཞི་བཅུའི་རྣམ་གཞག་རྒྱས་པར་བསྟན།། བསྟན་པའི་གསལ་བྱེད་གཙུག་ལག་ནོར་བུའི་ཏོག། གཤེན་གྱི་ཐུགས་ལས་འབྲུ་ལྔ་འོད་དུ་ཕྱུང་།། ཐོ་ཡིག་བཞི་བཅུའི་ཐང་བབས་གོ་རིམ་དང་།། སྦྱར་བའི་ཡི་གེ་བཅུ་སོགས་བླངས་གྱུར་ཏེ།།གསལ་བཤད་སུམ་ཅུའི་རྣམ་གཞག་རྒྱས་པར་འཆད།། འཆད་པའི་རྦ་རླབས་སྲིད་རྩེའི་ཏོག་ཏུ་གཡོས།། ཡི་གེའི་ཁམས་དང་འབྱུང་བའི་སྡེ་ཚན་དང་།། སྔོན་མིང་རྗེས་གསུམ་འཐོབ་ལུགས་རིམ་པ་ནི།། མཛུབ་མོས་རི་སྟོན་དེ་ཉིད་གསལ་བའི་ཟླ།། ཟླ་གཞོན་ཁ་བའི་ལྷུན་པོ་སྤུངས་བྱས་ཏེ།། ཏི་སེའི་རྒྱན་དུ་གྲུབ་བོ་སྣོད་ལྡན་ཀྱེ།། ཡང་ཁྱད་ངག་འཛིན་ཕོ་མོ་མ་ནིང་དང་།། མགོ་འདོགས་བརྩེགས་གསུམ་དུས་གསུམ་སྐུལ་ཚིག་བཅས།། ལེའུ་ལྔ་ཡི་བདག་ཉིད་བརྩེ་བ་ཡིས།། དོན་གཉེར་བུ་ལ་ཕན་པའི་གསོས་སུ་སྦྱིན།། སྦྱིན་པའི་སྟོབས་ཀྱིས་ཨེ་མ་ཤེས་རབ་སྩོལ།། གོང་གི་བརྡ་སྤྲོད་སྲིད་སྒྲོན་རྩ་ཚིག་འདི།། འཇིགས་མེད་ཁོང་ནས་འུབ་ཆུད་ཀློང་གནས་སུ།། ཐོལ་བྱུང་བྲིས་པ་སི་ཏུའི་ཞལ་ལུང་བཞིན།། འཁྱེར་སླ་འཛིན་བདེ་སློབ་མའི་ཁམས་དང་མཐུན།། མཐུན་པའི་བཤེས་ཤིག་བསྟེན་ན་ཅི་མ་རུང་།། འདི་ཡང་གཞན་མིན་འདི་ཉིད་བརྡ་སྤྲོད་ཀྱི།། སྲིད་པའི་སྒྲོན་མེའི་སྲིད་འཛིན་ཆེན་པོ་རུ།། སྟོབས་ཀྱིས་འགྲེང་ཞིང་སྟོབས་ལྡན་ཚིག་ཉུང་བ།། ལེགས་བཤད་ཐར་ལམ་ལེགས་སྟོན་རྨད་བྱུང་ཚིག། རྒྱ་མཚོའི་བཅུད་བཞིན་རྒྱ་རྒྱ་ཆེན་པོས་བཅིངས།། དྲན་པའི་བཀའ་རྒྱ་རི་ཁྲོད་ཆེན་པོ་ཡིས།། ལྷ་གཉན་ལ་བརྒྱུད་དེ་ཡང་ལུང་སྒོམ་ལ།། བརྒྱུད་པའི་མན་ངག་མེ་ལོང་བདུན་པ་ཞེས།། རྫོགས་ཆེན་གནད་འདུས་སྙིང་གི་ཏོག་གྱུར་བ།། གཏེར་བོན་དེ་ཉིད་བདག་བློའི་ཁབ་ཏུ་རོལ།། ཉིད་ནས་རྒྱ་གར་བྲུ་ཤ་ཞང་ཞུང་སོགས།། མཁས་བཙུན་རྣམས་ཀྱི་དགོངས་པ་ལྷུར་བླངས་པ།། སྙན་རྒྱུད་གསེར་བྲིས་གདམས་པའི་བཅུད་མཐར་ཐུག། ཕྱི་ནང་གསང་གསུམ་གནད་འབྱིན་རྫོགས་པའི་གར།། བསྒྱུར་ལ་ལྟ་བའི་ཡང་སྙིང་དཔོག་མི་འབྱིན།། ས་ལམ་དང་ནི་རྒྱུ་འབྲས་མཐའ་དག་གི། བོན་རྣམས་གཅིག་ཏུ་རྫོགས་པའི་ཟབ་གནད་གང་།། ཀ་དག་ལྷུན་གྲུབ་ངེས་མེད་སྐྱེ་མཆེད་སོགས།། ལྟ་བའི་མཐར་ཐུག་འབྱིན་ལ་ཟླ་བྲལ་བ།། མེ་ལོང་བདུན་པ་ས་གསུམ་བང་གི་མཛོད།། དྲང་དོན་སྒྲོན་མ་མུན་སེལ་ཁོལ་ཕྱུང་གི། གཤེན་གྱི་མཛད་པ་མཐར་ཕྱུང་གཟེར་བུ་གང་།། གཟི་བརྗིད་དང་ནི་གཟེར་མིག་བསྡུས་པ་ཡིས།། མཛད་པའི་ཕྲིན་ལས་མ་ཡལ་རྗེན་པར་སྟོན།། སྟོན་པའི་ལས་དེས་བདག་ཡིད་སྐད་ཅིག་དྲོངས།། བོན་གྱི་ཆེ་བ་བརྗོད་པའི་གསལ་བྱེད་དུ།། མངོན་པར་འཕགས་པའི་མཛད་རྣམ་སྙིང་བསྡུས་འདིར།། མཛད་འཕྲིན་བཅུ་གཉིས་བསྐྱངས་པ་རིག་བྱེད་ཀྱི།། སྙན་ཚིག་གཏམ་གྱིས་ཉེར་དྲངས་ལེགས་འོང་བ།། བརྗོད་བྱ་རྗོད་བྱེད་འཛམ་གླིང་རྒྱན་གྲུབ་རྨད།། དང་པོར་ཚོགས་བསགས་མཐའ་མར་སངས་རྒྱས་ཀྱི།། གོ་འཕང་རིམ་བགྲོད་ཐར་བའི་ལམ་སྣེ་གང་།། གདུལ་བྱ་རྒྱ་མཚོའི་དཔལ་ཏུ་ཤར་བ་ནི།། འདུལ་བྱེད་སངས་རྒྱས་ས་ལ་ལེགས་སྨོན་པའི།། དད་ལྡན་རིག་སློབ་མྱོས་པའི་དཔེ་རུ་གྱུར།། ལྟ་བའི་སྡིངས་གྱུར་བདུད་ཟློག་གཟེར་བུ་སྟེ།། དྲང་དོན་མུན་སེལ་སྒྲོན་མའི་འགྲེལ་བ་ཉིད།། རྣམ་པ་བདུན་གྱིས་དོན་ཉིད་བསྟན་པ་ལས།། དཔོན་གསས་དང་ནི་ཡུལ་དང་གར་གཏོགས་དང་།། གང་བཏུས་མཚན་ཅི་དོན་ཆེད་ཡོན་ཏན་ནོ།། དྲང་དོན་སྒྲོན་མ་ལས་ནི་རིགས་དྲུག་གི། རང་སྦྱོང་གདམས་པ་ཟབ་མོའི་དོན་སྟོན་པ།། ཕྲིན་ལས་ཞི་དྲག་སྒོ་ནས་སྦྱོང་ལུགས་དང་།། དགོངས་པའི་སྟོབས་ཀྱིས་སྦྱོང་ལུགས་རྣམ་པ་གཉིས།། ཕ་རོལ་ཤེས་པར་བག་ཆགས་གསོས་སུ་འདེབས།། དྲང་དོན་སྒྲོན་མ་ལས་ནི་གཏམ་རྒྱུད་ཀྱི།། བརྡ་ཡི་གཟེར་བུ་ཞེས་བྱའི་གླེགས་བམ་གང་།། ཅོ་ཟ་བོན་མོ་ལ་སོགས་གུས་པས་ནི།། གཤེན་ལ་ཇི་ལྟར་ཚུད་པའི་ལོ་རྒྱུས་དག། མེ་ལོང་བདུན་པ་ནང་བཞིན་ཤར་མར་སྟོན།། སྤྱིར་ནི་དྲང་དོན་སྒྲོན་མ་མུན་སེལ་འདི།། དྲན་པས་གཟེར་བུ་རྣམ་པ་བཅོ་ལྔ་རུ།། བསྟན་པའི་ཐོག་མ་ལོ་རྒྱུས་གཟེར་བུ་དེ།། གོང་དུ་སོང་ལ་ད་ནི་སྟོང་ཐུན་གྱི།། མན་ངག་ཟབ་ལམ་རྫོགས་པའི་གནད་འདིར་སྟོན།། རྣམ་པ་བཅོ་ལྔ་ཚིགས་བཅད་སྟོང་བརྒྱད་ཅུ།། ཉིས་བརྒྱ་བདུན་ཅུ་གཅིག་ངེས་ཤོ་ལོ་ཀ།མི་ཡི་དག་ཚིག་གཤེན་ཚིག་སུམ་དགུའི་གཅིག། བོན་གྱི་སྡོམ་ཚིག་བཅུ་དང་ཤོ་ལོ་ཀ། གཅིག་ཏུ་སྟོན་ལ་གསལ་བའི་སྒྲོན་མེ་ཉིད།། ཡང་ཁྱད་གཞུང་དོན་སྒྲོན་མ་མུན་སེལ་དང་།། གཟེར་རྣམ་བཅོ་ལྔ་གཏམ་རྒྱུད་ཉི་ཤུ་བདུན།། སྟོང་ཐུན་མན་ངག་བདུན་སོགས་གཏན་འབེབས་གནས།། གྲངས་ཀྱི་བརྩི་བཞག་དོན་གྱི་མན་ངག་སོགས།། བྱིས་ཆུང་གོམ་ཚེ་སློབ་བཞིན་མ་ནོར་འཆད།། དལ་རྟེན་རྙེད་དཀའ་བོན་ལ་མཇལ་དཀོན་སོགས།། སྔོན་འགྲོའི་ཚིག་བཤད་དཔེ་དོན་རྟགས་གསུམ་གྱིས།། བདེན་པར་འཁྲིད་མཛད་བརྒྱད་ཁྲི་བཞི་སྟོང་གི། བོན་རྣམས་ལག་ལེན་བསྟར་ཚུལ་རིམ་པ་དག། སོམ་ཉིའི་དབེན་པར་འགྲོ་ལ་ཕངས་མེད་སྦྱིན།། རྫོགས་ཆེན་སྙན་རྒྱུད་རིན་ཆེན་ནམ་མཁའ་ཡི།། འཕྲུལ་མཛོད་ཆེན་པོར་རྒྱ་ཆེན་གྲངས་མང་ཡང་།། གཞུང་སྐབས་བརྒྱད་པ་དང་ནི་རྒྱབ་ཡིག་དང་།། ཁོག་དབུབ་དང་ནི་ས་གཅོད་ལྡེ་མིག་སྟེ།། ཀུན་འདུས་ལུང་གི་ལྡེ་མིག་དང་བཅས་འཆད།། མ་ཟད་ལྟ་བའི་སྟོང་ཐུན་དྲུག་ལྡེ་དང་།། མན་ངག་གནད་ལྡེ་ཁྱད་བརྡ་བཅོ་བརྒྱད་སོགས།། གསལ་བྱེད་ཉི་མའི་འོད་ཟེར་ཕྱོགས་ཀུན་འགྱེད།། དྭངས་པའི་མཚོ་ལ་མཛེས་པའི་མེ་ཏོག་བཞིན།། རྣམ་པར་སྡུག་ཅིང་ཡིད་འོངས་གཟུགས་སུ་བྱེད།། རྫོགས་པ་ཆེན་པོའི་གཞུང་དོན་གཏན་ཚིགས་དག། བདག་འདྲས་ནུས་མིན་ཕུན་ཚོགས་བསོད་སྟོབས་ཀྱིས།། སྙན་རྒྱུད་གདམས་པའི་བཅུད་སྙིང་སྣ་ཚོགས་པ།། མཇལ་ལ་འཇིགས་མེད་ནམ་མཁའ་འཕྲུལ་ཆེན་གྱི།། ཐོག་མའི་འཛིན་པ་བདག་གིས་དེ་ལྟར་ཐལ།། ཡང་སྙིང་དོན་ལམ་གནད་དུ་དབབ་པ་ཡི།། འཕྲུལ་མཛོད་འགྲེལ་བ་གསེར་གྱི་གའུ་འདིར།། འགྲེལ་གཞུང་འདྲ་མིན་བསྡུར་ནས་རང་ལུགས་ཀྱི།། ལྟ་བའི་མཐར་ཐུག་ཚིག་མདུད་རྒྱ་གྲོལ་ཏེ།། ཉམས་ལེན་བོགས་ལ་སྨོན་རྣམས་གསོས་སུ་གདབས།། ཐེག་ཆེན་ཉམས་ལེན་སྒོ་ཡི་མཐར་ཐུག་གང་།། རྫོགས་ཆེན་འཕྲུལ་མཛོད་གསེར་དབྱུག་ཁབ་བསྒྱུར་ནས།། ལྡེ་དྲུག་གནད་གཉིས་གདམས་པ་བཅུ་བདུན་གྱི།། བརྗོད་བྱ་མ་ལུས་འོད་ཀྱི་ཁྱབ་ཚད་བཞིན།། འགྲེལ་ལ་འཇིག་མེད་སྟོབས་བཅུའི་ཁྲི་འཕང་བརྙེས།། ཀ་དག་ལྷུན་གྲུབ་ཇི་བཞིན་སྐྱེ་མཆེད་ཀྱི།། ཐ་སྙད་བཏགས་དོན་མཁས་ལ་རབ་བྱང་སྟེ།། ཡང་རྩེ་བླ་མེད་ཐེག་པའི་མདུད་བཀྲོལ་ཏེ།། ཐེག་ཆེན་སྤྱོད་པའི་སེམས་དཔར་ངག་སྟོན་པ།། སྟོན་པ་འདི་ཡིས་སེམས་ཅན་ཐར་བར་འདྲེན།། དཔེ་གཟིགས་དོན་གསུམ་གནས་ལ་རབ་ཞན་པའི།། ཅོལ་ཆུང་བདག་གིས་རྣམ་དཀར་བསམ་པ་ཡིས།། སྙན་རྒྱུད་མན་ངག་ནུས་ཙམ་ཀློག་གྱུར་བ།། དེ་ཉིད་སྟོན་རྣམས་བདག་འཁྲུལ་མཐོལ་བཤགས་ཏེ།། ཨེ་ཝཾ་ཆེན་པོས་བདག་རྒྱུད་ལེན་པར་ཤོག། འདི་ཡི་དགེ་བས་བདག་སོགས་འགྲོ་བ་ཀུན།། ཀུན་ཏུ་བཟང་བོའི་ས་ལ་ལེགས་འཁྲིད་དེ།། དེ་བཞིན་གཤེགས་པའི་ལུགས་རྣམས་མ་ལུས་སྟོན།། སྟོན་པའི་ཐུགས་རྗེས་བདག་ཡིད་འདྲེན་པའི་དཔལ།། དཔལ་ཏུ་སྩོལ་ཅིག་སར་བ་མང་ག་ལམ།། སྒ་རིགས་སྟོན་པ་ཤེས་རབ་འོད་ཟེར་ནས།། ལེགས་བཤད་ངག་གི་འདབ་གཤོག་མྱུར་བརྐྱངས་ཏེ།། ལྟ་ངན་བཟློག་པའི་ལུང་རིགས་གནམ་ལྕགས་ཐོགས།། འཕེན་ལ་གཏན་ཚིགས་ཐིགས་པའི་མདོ་འགྲེལ་གང་།། གཏན་ལ་དབབ་འདི་བདག་ཉིད་དང་བས་མཇལ།།