བན་བོན་རིས་མེད་དུ་རྨིས་པ་འོད་གསལ་མཐའ་ཡས་ཞེས་བྱ་བ།།
རྩོམ་ཡིག་འདི་ཐེངས། 585 བཀླགས་འདུག
ཀ་དག་ལྷུན་གྲུབ་རིག་པ་བྱང་ཆུབ་ཀྱི་སངས་རྒྱས།།
ཁ་དོག་རང་མདངས་ལྔ་ལྡན་ལོངས་སྤྱོད་ཀྱི་རྫོགས་སྐུ།།
གང་འདུལ་ཐབས་ལ་མཁས་པའི་འགྲོ་འདུལ་གྱི་སྤྲུལ་སྐུ།།
ང་བྲལ་དྲན་པ་ནམ་མཁའ་སྙིང་དབུས་སུ་བཞད་འདུག།
།
ཅ་ཅོ་འུར་སྒྲས་དབེན་པའི་ཀུན་བཟང་གི་གླིང་ཁར།།
ཆ་མེད་ཁྱབ་པའི་བདག་ཉིད་འོད་གསལ་དུ་གནས་སྐབས།།
ཇ་ཡུན་ཙམ་དུ་སྣང་བའི་གངས་དཀར་ཀྱི་ཏི་སེ།།
ཉ་གང་ཟླ་བཞིན་དཀར་གསལ་ལྷུན་པོ་དེ་མཇལ་སོང་།།
།
ཏཱ་ར་སྤྱན་རས་གཟིགས་དབང་དཀྱིལ་འཁོར་གྱི་བཀོད་པ།།
ཐ་སྙད་རིག་པས་གཞལ་བྱའི་བློ་ཡུལ་ལས་འདས་པའི།།
ད་གཟོད་གདོད་མའི་ཕ་ཁྱིམ་གཡང་དྲུང་གི་གཏེར་མཛོད།།
ན་མོ་དངས་འདོད་མོས་པའི་དགའ་ཚལ་ཞིག་མཇལ་ཐལ།།
།
པ་ར་མི་ཏཱའི་ཕྱིན་དྲུག་ལམ་རིམ་གྱི་སྔོན་འགྲོ།།
ཕ་མ་གཉིས་མེད་རྒྱུད་པའི་གསང་སྔགས་ཀྱི་ཐབས་གྲོལ།།
བ་དན་རུ་དར་སྒྲེང་པའི་ལྷ་ཀླུ་དང་གཉན་རིགས།།
མ་ལུས་མངོན་སྣང་ལྟ་བུའི་རྨི་ལམ་ཞིག་རྨིས་ཐལ།།
།
ཙ་ར་མ་གཅོད་གང་ཤར་རང་གྲོལ་དུ་བཏང་བས།།
ཚ་གྲང་མནར་གཅོད་མེད་པའི་ཞི་བདེ་ཡི་རྒྱལ་ཁམས།།
ཛ་ཡའི་བསྟན་པ་ཇི་བཞིན་བཤད་སྒྲུབ་ཀྱི་ཕྲིན་ལས།།
ཝ་ལེར་ཚོགས་དྲུག་འཆར་བའི་བདེན་གཏན་འདི་ཤོར་ཐལ།།
།
ཞྭ་དཀར་ཐོར་གཙུག་མཛེས་པའི་གཉའ་ཁྲི་ནས་བཟུང་སྟེ།།
ཟ་ཧོར་མཁན་ཆེན་བརྒྱུད་པའི་དམ་ཆོས་ཀྱི་བར་ལ།།
འ་ཅག་རྩོད་གླེང་དགོས་པ་རྡུལ་ཙམ་ཞིག་མི་འདུག།
ཡ་རབས་ལྟ་སྤྱོད་མཛད་པ་ནང་བསྟན་གྱི་སྙིང་པོ།།
།
ར་ལྟར་གྱོང་པའི་རྣམ་རྟོག་ལང་ཤོར་ཉིད་རྟུལ་ཞིང་།།
ལ་རྒྱའི་བསམ་སྤྱོད་གཞན་ཕན་དོན་གཉེར་ལ་བརྩོན་པས།།
ཤ་རུས་མི་གཟུགས་གྲུབ་པར་དོན་སྙིང་དང་ལྡན་ཕྱིར།།
ས་ལམ་ཡོན་ཏན་མཐའ་དག་གོང་འཕེལ་དུ་སོང་འདུག།
།
ཧ་ཅང་བཙུན་པའི་གོ་ཁྲབ་ལུས་ངག་ལ་གསོལ་ཞིང་།།
ཨ་ཧོ་མཁས་པའི་རྣམ་དཔྱོད་འགྲན་བྲལ་གྱི་རྒྱལ་པོ།།
ཀུན་བཟང་ཆོས་ཀྱི་རྒྱལ་ས་ཟིན་པར་ཞིག་རྨིས་ནས།།
སེམས་ལ་དགའ་བདེ་སྐྱིད་དགུའི་འོད་གསལ་ཅིག་ཤར་སོང་།།
།
བན་བོན་རྟོག་པའི་རྣམ་གྲངས་བདེན་མཉམ་དང་རྫུན་མཉམ།།
ངེས་དོན་བདེ་བཤེགས་སྙིང་པོའི་བསྟན་པ་ཉིད་མཇལ་ཚེ།།
འཁོར་འདས་འཁྲུལ་དག་ཐམས་ཅད་གཉུག་སེམས་ལ་ཐུག་པས།།
དྲང་དོན་ཕྱོགས་ཞེན་མདུད་པ་རང་ཞིག་ཏུ་སངས་ཐལ།།
།
བསམ་ཚུལ་ཕྲིས།