གཡུ་ཆུང་དྲུག་དཀར། །
རྩོམ་ཡིག་འདི་ཐེངས། 584 བཀླགས་འདུག
G.B.C.ལ་བྲིས་པའི་སྙིང་གཏམ་གཅེར་མཐོང་མ།
།
ལྷ་ཆེན་ཚངས་པའི་སྲས་མོ་མིན་ཡང་། །
ལྷ་མོ་འདྲ་བའི་གཡུ་ཆུང་དྲུག་དཀར། །
སྐད་ངག་ཁུ་བྱུག་སྔོན་མོ་མིན་ཡང་། །
ཁ་ཚིག་འཇམ་པའི་གཡུ་ཆུང་དྲུག་དཀར། །
།
མི་ཚོགས་མང་པོའི་ཁྲོད་ནས་མ་འཕྲད། །
ཀྱག་ཀྱོག་སྲང་ལམ་ནང་ནས་མ་འཕྲད། །
སྡོམ་དྲ་ལྟ་བུའི་དྲ་རྒྱའི་ལམ་ནས། །
འུ་གཉིས་འཕྲད་པ་བརྡ་རྟགས་ཆ་གཅིག །
།
དགའ་རབས་དུང་རབས་ཤོ་རྡེའུ་འཕེན་འཕེན། །
ཕོ་གསར་གསར་མོ་རྩེད་ཤོག་རྩེས་འདྲ། །
བསམ་པའི་གཏིང་གི་དུངས་བའི་ཚིག་དེས། །
སྐྲག་སྣང་ཚོར་བའི་ལུས་ཡོངས་རུལ་སོང་། །
།
ཚིག་གསུམ་ཕར་བཤད་འཛོམས་པའི་གཏམ་རེད། །
ལན་གསུམ་ཚུར་ཡོང་འཐད་པའི་བརྡ་རེད། །
ལྷན་འཛོམས་གཅིག་གི་བཟི་ཁ་བཙན་པོ། །
གྱེས་བྲལ་ཁྲོད་ནས་ད་གཟོད་མྱངས་བྱུང་། །
།
ཞེ་འདང་ཤ་མཆིན་བརླན་ས་ཁྱོད་ཡིན། །
བརྩེ་ཆེན་སེམས་པ་གཏད་ས་ཁྱོད་ཡིན། །
སྙིང་གཏམ་ཚིག་གསུམ་བཤད་ས་ཁྱོད་ཡིན། །
འདང་ཆེན་རོགས་ཀྱི་དྭངས་མ་ཁྱོད་ཡིན། །
།
མ་མཐོང་སེམས་ཀྱི་དྲན་ས་ཁྱོད་ཡིན། །
མཐོང་ན་མིག་གིས་ཅེར་ས་ཁྱོད་ཡིན། །
ཁྱོད་ཀྱི་འཛུམ་མདངས་ང་ཡི་སྐྱིད་ཡིན། །
སྐྱིད་ཀྱི་མཚོ་མོ་མིག་གི་མདངས་ཡིན། །
།
མཐུན་གསུམ་རྨི་ལམ་ནང་ནས་ཁྱོད་དྲན། །
ཟས་ཞིམ་ཁ་ལ་འཁྱེར་དུས་ཁྱོད་དྲན། །
སྡུག་གི་མགོ་བོ་སྨད་དུས་ཁྱོད་དྲན། །
མ་དྲན་མི་དྲན་ཟེར་ཡང་ཁྱོད་དྲན། །
།
མ་འཕྲད་ལོ་ཟླ་བགྲང་གིས་མི་ཟིན། །
མ་དྲན་དུས་ཚོད་སྐར་གང་མ་བྱུང་། །
དྲན་པ་རྫོགས་མེད་སྙིང་གི་གཏམ་འདི། །
དྲན་པས་མ་བཟོད་ཐོལ་དུ་ཐལ་ལོ། །
།
བསམ་ཚུལ་ཕྲིས།