འབྲོག་མོ།
རྩོམ་ཡིག་འདི་ཐེངས། 693 བཀླགས་འདུག
འཇིག་རྟེན་སྣང་བ་ཟེར་ཡ།།
གློའུ་རེད་ཟེར་མཁན་ཡོད་ཀྱང་།།
འབྲོག་མོ་ཚིལ་དྲེག་ཅན་རེ།།
མཐོང་ན་ཆགས་པ་སྐྱེ་ཡོང་།།
།
རྩག་སྟུག་ཐུ་བ་བསམ་ན།།
ཡིད་ལ་ཞེ་མེར་ལངས་ཀི།
དྭངས་གཙང་བརྩེ་བ་བསམ་ན།།
ཞེ་དང་སྣང་བ་འཁྲེང་གི།
།
རི་སྡེ་ཆེ་ན་འདི་རེད།།
སྨན་ཤར་མང་ན་འདི་རེད།།
སེམས་དང་མིག་གི་བར་ན།།
འབྲོག་མོ་མ་གཏོགས་མི་འདུག།
།
ཕྱུག་པོའི་ལོངས་སྤྱོད་བསམས་ནས།།
འབྲོག་མོའི་རང་ཚུགས་འཆོར་གི།
སྣང་བ་གློའུ་རེད་ཟེར་དོན།།
དེ་འདྲ་ཨེ་ཡིན་བསམ་གི།
།
ཕྱུག་པོ་རྒྱུ་ངོ་ཆེ་རུང་།།
དབུལ་བོ་ཁ་ངོ་ཆུང་རུང་།།
སེམས་པ་རྒྱུགས་ཐེངས་གཅིག་གིས།།
འབྲོག་མོ་གཡས་བསྐོར་བརྒྱབ་ཆོག།
།
ཕ་མ་མོས་མཐུན་མེད་རུང་།།
བླ་མས་བཀའ་ཆད་བབས་རུང་།།
བརྩེ་སེམས་གཅིག་མཐུན་བྱུང་ཚེ།།
ཐོབ་ཤོར་གང་ལ་སྐྲག་རྒྱུ།།
།
གལ་ཏེ་བརྩེ་དུང་འདི་ཡིས།།
སྐྱོ་གདུང་ཆེན་པོ་སྟེར་ཡང་།།
དགའ་བཀུར་ཚད་མེད་ཅིག་གིས།།
བདེ་སྐྱིད་གཅིག་ཀྱང་བསྐྱལ་ཡོང་།།
།
དགའ་བ་མེ་བཞིན་འབར་ཡོང་།།
སུ་ཡིས་ཨུ་ཚུགས་བྱས་ཚེ།།
སྙིང་ཆུང་མེ་ལ་བསྲེགས་འདྲ།།
འཆི་གསོན་གཉིས་ཀྱང་བཤད་དཀའ།།
།
སེམས་ཀྱི་ཁུགས་སོ་ཞིག་ལ།།
བུ་མོའི་ཚིལ་དྲེག་ཆགས་ཡོད།།
སྔོན་བསགས་ལས་ཤིག་མེད་ན།།
ས་བོན་བཏབ་ནས་ཅི་བྱེད།།
།
ཁུ་སིམ་སིམ་གྱི་འབྲོག་མོ།།
གཤིས་རྒྱུད་ཅུང་ཙམ་གྱོང་ཡང་།།
རྣམ་དག་སེམས་སུ་བརྒྱུས་པའི།།
རྟག་བརྟན་བརྩེ་བ་མཛེས་སོང་།།
།
ཡ་ཆུང་སྙིང་ནས་འཁྲུངས་པའི།།
ཁ་ཡི་སྒོ་ལས་བབས་པའི།།
བརྩེ་སེམས་དར་གྱི་ཚོམ་བུ།།
འབྲོག་མོའི་ཞལ་ན་མཛེས་སོ།།
།
རི་རྐེད་སྨུག་པའི་ཀློང་ནས།།
རི་གླུ་སིང་སིང་འགུགས་པའི།།
འབྲོག་མོ་བོད་ལྭ་ཅན་དེ།།
འགྲོག་པའི་སྐལ་བ་ཡོད་རེད།།
།
མགོ་དཀྲིས་དམར་པོའི་འོག་ནས།།
ངོ་ཚ་ལངས་ཞོར་ཞིག་ལ།།
དགྱེ་ནས་འཛུམ་ཙམ་བསྟན་པ།།
སྙིང་གི་མཐིལ་ལ་ཤོར་སོང་།།
།
མཛུབ་མོས་ས་ཞིག་འདྲེད་ཞོར།།
མིག་གིས་ཟུར་མདའ་འཕངས་སོང་།།
མཁུར་ཚོས་དམར་པོའི་སྟེང་ལ།།
འོ་གཅིག་གཞག་ན་བསམས་བྱུང་།།
།
ང་ཡི་ཚོར་བའི་ཕྱེ་ལེབ།།
རྩྭ་ཐང་ཡངས་མོ་ཉུལ་དུས།།
རི་སྡེ་ཐར་ཐོར་ཞིག་ན།།
འབྲོག་མོ་ཆུང་ཆུང་ཡོད་རེད།།
།
ཕྱུགས་ཀྱི་ངུར་སྒྲའི་ཀློང་ན།།
རེ་སྨོན་ཆུང་ཆུང་ཁུར་བའི།།
བོོད་མོ་སྐེ་རྒྱན་ཅན་ཞིག།
ཚེ་གཅིག་དྲན་ཤིང་ཡིན་རེད།།
།
མེས་པོའི་རང་གཤིས་ཁུར་བའི།།
མངོན་ལྐོག་གཉིས་མེད་ཡིན་པའི།།
འབྲོག་མོ་སྣབས་ལུག་གཅིག་ལ།།
སྙིང་གཏམ་ཤ་འདྲེས་ཁྲག་འདྲེས།།
།
༢༠༡༥ ལོའི་དེ་རིང་།
བསམ་ཚུལ་ཕྲིས།