ང་ཡུལ་ཤུལ་ན་ཡོད།
རྩོམ་ཡིག་འདི་ཐེངས། 325 བཀླགས་འདུག
ས་ཡོམ་ཐེངས་ཤིག་གིས ཡུལ་ཤུལ་ཐལ་བར་གཏོར་སོང
ས་ཡོམ་ཐེངས་ཤིག་གིས ཡུལ་ཤུལ་དམ་དུ་བཅིངས་སོང
ས་ཡོམ་ཐེངས་ཤིག་གིས སྤུན་ཟླའི་སེམས་པ་མཐུན་སོང
ས་ཡོམ་ཐེངས་ཤིག་གིས མིག་ཆུ་ལ་འོད་ཞགས་འཚེར་སོང
ས་ཡོམ་ཐེངས་དེས ང་ཁྱོད་ཀྱི་བྲང་གཞུང་དུ་ཁྲིད་སོང་ལ
ས་ཡོམ་ཐེངས་དེས རང་ཉིད་ལ་འདྲི་ཚིག་མང་པོ་ཞིག་སླེབས
ས་ཡོམ་ཐེངས་དེས ཁྱོད་ཀྱི་ལག་ཟུང་ཁོང་གིས་བཟུང་སོང་ལ
ས་ཡོམ་ཐེངས་དེས ཁོང་གི་མིག་ཆུ་ཡང་གཞན་གྱིས་ཕྱིས་སོང
ས་ཡོམ་ཐེངས་དེས ང་ཚོའི་ཚེ་སྲོག་དང་རྒྱུ་ནོར་མང་བོ་ཁྱེར་སོང་རུང
ས་ཡོམ་ཐེངས་དེས ང་ཚོའི་སེམས་པ་གཅིག་ཏུ་བསྒྲིལ་ཡོད
ས་ཡོམ་པ་ནས་དེ་རིང་བར་བགྲང་བྱ་བཞི་ལྷག་འདས་ཟིན་ཡང
བགྲང་བྱ་བཞི་ལྷག་འདས་པའི་དེ་རིང་ཁྱོད་ནི་སྔར་ལས་མཛེས
ང་ཁྱོད་ཀྱི་བཞི་མདོ་རེ་རེ་བརྒྱུད་ནས་འགྲོ་དུས
ཧ་ཅང་བརྗིད་ཆེ་བའི་བོད་ཡིག་གི་སྒོ་བྱང་དེ་ཚོ་མཐོང་ཡོད་ལ
སུས་ཀྱང་བསུབ་མ་ཐུབ་པའི་ལྷད་མེད་ཀྱི་འཛུམ་ཆུང་ཡང་མཐོང་ཡོད
གང་ལྟར ཁྱོད་རང་རྒྱས་པ་ནི་ང་ཚོ་རྒྱས་པ་ཡིན་ལ
ང་རང་ཚོའི་མི་རིགས་ཀྱང་དར་ཞིང་རྒྱས་པ་ལོས་ཡིན
ང་ཁྱོད་ཀྱི་སྲོང་མདོ་ག་གེ་མོ་ཞིག་ཏུ་ཡོད
དམངས་གཙོའི་ལམ་ཟེར་བའི་བཞི་མདོ་དེར་ཡོད།
།
༢༠༡༥ / ༡༡ / ༢༥
བསམ་ཚུལ་ཕྲིས།