༓ ཧི་མ་ལ་ཡི་འཇིག་རྟེན།
རྩོམ་ཡིག་འདི་ཐེངས། 1284 བཀླགས་འདུག
།
ཕྱྭ་སྣང་འཕྲུལ་གྱི་བང་རིམ་ལ།།
བླ་མེད་རྫོགས་ཆེན་ཅོད་པན་མཛེས།།
ཐེག་དགུ་བརྩེགས་པའི་གངས་རྒན་དེེ།།
ཧི་མ་ལ་ཡི་འཇིག་རྟེན་ཡིན།།
།
བཟོ་གསོ་སྒྲ་ཚད་བང་རིམ་ལ།།
མན་ངག་དོན་གྱི་ཡལ་འདབ་མཛེས།།
བཅུ་རིག་བརྩེགས་པའི་གངས་རྒན་དེ།།
ཧི་མ་ལ་ཡི་འཇིག་རྟེན་ཡིན།།
།
ཤཱཀ་གཤེན་བསྡེབས་པའི་བང་རིམ་ལ།།
འབྲས་ལྡན་དྲུག་གི་ཟེའུ་འབྲུས་བརྒྱན།།
མདོ་སྔགས་བརྩེགས་པའི་གངས་རྒན་དེ།།
ཧི་མ་ལ་ཡི་འཇིག་རྟེན་ཡིན།།
།
དབྱངས་གསལ་སོ་བཞིའི་བང་རིམ་ལ།།
སུམ་བརྒྱ་དྲུག་ཅུའི་སྐད་རིགས་མཛེས།།
འཕྲུལ་སྔགས་བརྩེགས་པའི་གངས་རྒན་དེ།།
ཧི་མ་ལ་ཡི་འཇིག་རྟེན་ཡིན།།
།
ཁ་འབབ་རྣམ་བཞིའི་བང་རིམ་ལ།།
ཤེས་རིག་སྟོང་གི་ཟིལ་པས་མཛེས།།
འདོད་དགུ་བརྩེགས་པའི་གངས་རྒན་དེ།།
ཧི་མ་ལ་ཡི་འཇིག་རྟེན་ཡིན།།
།
གླིང་བདུན་གྱེས་པའི་བང་རིམ་ལ།།
མུ་ཁྱུད་གངས་ཀྱི་ལྭ་བས་མཛེས།།
ས་འཛིན་བརྩེགས་པའི་གངས་རྒན་དེ།།
ཧི་མ་ལ་ཡི་འཇིག་རྟེན་ཡིན།།
།
ཁྲི་བདུན་རྨུ་ཐག་བང་རིམ་ལ།།
ཞེ་གཉིས་དབང་གི་མངའ་འབངས་ཆགས།།
ཆོས་སྲིད་བརྩེགས་པའི་གངས་རྒན་དེ།།
ཧི་མ་ལ་ཡི་འཇིག་རྟེན་ཡིན།།
།
ཞང་བོད་ཤེས་རིག་བང་རིམ་ལ།།
ཆོལ་གསུམ་རྣམ་དཔྱོད་མེ་ཏོག་འཁྲུངས།།
གཙུག་ལག་བརྩེགས་པའི་གངས་རྒན་དེ།།
ཧི་མ་ལ་ཡི་འཇིག་རྟེན་ཡིན།།
།
བསམ་ཚུལ་ཕྲིས།