༓ མིང་དང་སྒོར་མོའི་དོན། །

བླ་མའི་ཞལ་ནས་བསྟན་འགྲོའི་དོན་དུ་བསྔགས། །
དཔོན་པོའི་ངག་ནས་འབངས་ཀྱི་ཆེད་དུ་གསུང་། །
དགེ་བཤེས་རྣམས་ཀྱིས་གྲྭ་སའི་སླད་དུ་བགྲང་། །
གླེང་ཚུལ་ཙམ་ལས་མིང་དང་སྒོར་མོའི་དོན། །

ཤེས་ཡོན་ཅན་དག་རྩོམ་ཡིག་འབྲི་བར་འབད། །
སློབ་མ་དག་གིས་ཡིག་རྒྱུགས་བསྡུར་བར་བྱེད།
ཚོང་བ་དག་གིས་འཕྲིན་བཅོལ་ལྷ་སྲུང་བསྐུལ། །
ཁ་ཕྱོགས་ཙམ་ལས་མིང་དང་སྒོར་མོའི་དོན། །

ཡོད་ན་ངོམས་པ་མེད་པའི་འདོད་པ་དང་། །
མེད་ན་འགྲོ་འདུག་དཀའ་བའི་འཇིག་རྟེན་དུ། །
ཐམས་ཅད་བྲེལ་བས་སྨྱོན་པར་གྱུར་བ་འདི། །
དོན་ལ་གཞིགས་ན་མིང་དང་སྒོར་མོའི་དོན། །

ཐམས་ཅད་དེ་ལྟར་མིན་པར་སྨོན་ན་ཡང་། །
བརྟགས་ན་དེ་ལས་འདའ་བ་མ་མཐོང་བས། །
སུས་ཀྱང་ཡིད་ལ་བརྣག་ཅིང་འདོད་པའི་དོན། །
མིང་དང་སྒོར་མོ་ཡིན་པར་སུ་ཡིས་བསྙོན། །

དེ་སྐད་མགྲིན་པའི་སྦུབས་ལས་དྲངས་པ་ཡི། །
གསོང་བོར་བརྗོད་པའི་སྙན་ཚིག་དམ་བུ་ར། །
རིག་བྱེད་ངག་གི་བྱིན་རླབས་ཞུགས་པ་དེས། །
སྙིགས་མའི་རླབས་ཕྲེང་གཡོ་བའི་གྲུ་རུ་བྲིས། །