༓ གདོད་མའི་སྙན་ངག་ཅིག་གི་རོལ་དབྱངས།  

རྩོམ་ཡིག་འདི་ཐེངས། 414 བཀླགས་འདུག

སྟོད་ཕྱོགས་ཀྱི་ཞང་ཞུང་ན།།

 གངས་རྒན་གྱི་ཏི་སེ་མཆིས།།

 སྤོས་རི་ནི་ལྷོད་ཀྱིས་འགྱིང་།།

 མ་ཕམ་ནི་ངང་གིས་འཁྱིལ།།

 དམུ་གཤེན་གྱི་རུས་རྒྱུད་འདི།།

 བྱ་ཁྱུང་གི་གདུང་ལས་གྲོལ།།

 གྱེར་གཞུང་གི་ཤེས་རབ་དེ།།

 གཏོ་སེལ་གྱི་རྨང་ལས་བྱུང་།།

 སྟོན་པ་ནི་གཤེན་རབ་སྟེ།།

 བོན་སྒོ་ནི་བརྒྱད་ཁྲི་གསུངས།།

 ཤེས་རིག་གི་མངའ་ཐང་འདི།།

 ཞང་ཞུང་གི་ཡུལ་ནས་དར།།

བྱ་རུ་ནི་མཚན་རྟགས་ཏེ།།

རྒྱལ་བོ་ནི་བཅོ་བརྒྱད་བྱུང་།།

བོན་སྲིད་ཀྱི་ལེགས་ཚོགསའདི།།

སྒོ་ཕུག་གི་ལྗོངས་སུ་ཁྱབས།།

གནམ་བོན་གྱི་གདམ་པ་འདི།།

འགྲོ་བ་ཡི་སྲོལ་དུ་གྲུབ།།

རྔ་གཤང་གི་དབྱངས་ཀྱིས་མཆོད།།

ལྷ་རབས་ནི་མཉེས་པར་བྱས།།

ཡར་ལུང་གི་སོག་ཁ་ནས།།

ཁྲི་བདུན་གྱིས་རུ་དར་ངོམས།།

ཤེས་རིག་ནི་བོན་གཞུང་སྟེ།།

སྐུ་སྲུང་དེ་གཤེན་གྱིས་མཛད།།

བོན་རྒྱལ་གྱི་སྐུ་རིང་ལ།།

རྒྱལ་ཁམས་ནི་བོན་གྱི་ཁམས།།

རྒྱལ་ཁྲིམས་ནི་བོན་གྱི་ཁྲིམས།།

བོད་པ་ནི་བོན་ལས་སྐྱེས།།

ཞང་བོད་ཀྱི་ཡུལ་དབུས་སུ།།

ཡི་གེ་དང་ཤེས་རིག་འཛོམས།།

འཆམ་མཐུན་ངང་བདེ་བར་གནས།།

གླིང་བཞི་རུ་སྙན་པ་འཕུར།།

ཆོས་རྒྱལ་གྱི་སྐུ་རིང་ལ།།

རྒྱ་གར་གྱི་ཡུལ་དབུས་ནས།།

ཐུབ་བསྟན་གྱི་རང་གཟུགས་དེ།།

བོད་ཡུལ་དུ་ནང་འདྲེན་བྱས།།

བཻ་རོ་ནི་བློ་མཁས་ཏེ།།

བོན་གཞུང་གི་ཡང་བཅུད་འགའ།།

ཐུབ་བསྟན་གྱི་གཞུང་ལ་བསྲེས།།

ཆོས་རྒྱུད་ནི་དར་ལ་རྒྱས།།

བན་བོན་གྱི་འཐབ་རྩོད་ལས།།

བོན་གཞུང་ནི་བརླགས་ཏེ་བཅོམས།།

བོན་བློན་ནི་བཀུམ་པར་བྱས།།

བོན་གཤེན་ཚོ་མཐར་རུ་སྤྱུགས།།

ཐུབ་བསྟན་གྱི་ངོ་བོ་ལས།།

ཆོས་རྒྱུད་འདི་མང་དུ་ཕྱེ།།

བདེ་བ་ཡི་རྨི་ལམ་དེ།།

འཇའ་ཚོན་གྱི་གཟུགས་སུ་གྲུབ།།

ས་འབྲི་ཡིས་མདུང་ལ་བྱས།།

ཕག་རིན་གྱིས་རལ་གྲི་འཕྱར།།

ཀར་དགེ་ཡི་མེ་མདའི་ཁྲོད།།

བོད་ཁམས་འདི་དམྱལ་བར་བཏང་།།

བོད་རྒྱལ་གྱི་མངའ་ཐང་དེ།།

སྟོང་བ་ཡི་དབྱིངས་སུ་བཏབས།།

བོད་ཡུལ་འདི་མ་འཇིག་ཙམ།།

ཕྱོགས་ཞེན་གྱི་ཀློང་ན་གནས།།