ང་ཡི་ཞང་ཞུང་།

རྩོམ་ཡིག་འདི་ཐེངས། 3237 བཀླགས་འདུག

ཏི་སེ་གངས་རྒན་བླ་རུ་མཐོ་ས་ནས།།

མ་པང་མཚོ་གཉན་ཟབ་ཏུ་འཁྱིལ་ས་ན།།

རི་བོ་ནག་པོ་ཟོར་དུ་བརྒྱུས་པ་ལ།།

གཤེན་རབ་བོན་པོས་སྨྲང་ཚིག་ངག་ཏུ་གྱེར།།

།

གཡས་ན་སྟག་རི་ངར་གྱིས་ཁྲོ་བགས་དང་།།

གཡོན་ན་མུ་ལེ་མཚོ་ཡིས་མཛེས་ཉམས་འཁྱུད།།

དུག་རི་མདུན་དུ་བསྐྱེང་བའི་ཟོལ་འགྱུར་དེས།།

བདུད་འདུལ་བོན་པོས་སྒྲ་བླ་ཁབ་ཏུ་དྲངས།།

།

རྒྱུང་ཡ་གནམ་ལ་གཤེགས་པའི་མཁར་ཤུལ་དང་།།

བླ་ཆེན་རྒྱ་ལ་ཕེབས་པའི་དར་ལམ་ན།།

གུར་གྱམ་དགོན་པའི་གཡེར་དྲིལ་སིང་སིང་ཁྲོད།།

འཇིགས་མེད་ནམ་མཁའི་རྨི་ལམ་མཐའ་ནས་གསལ།།

།

ཁྱུང་ལུང་དངུལ་མཁར་དུད་དུ་སྦས་ཤུལ་ན།།

ཞང་ཞུང་མངའ་ཐང་རླུང་གིས་ཁྱེར་ཤུལ་ན།

མ་བཞེངས་རྡོ་སྐུ་ས་ནས་འབུས་པ་དེས།།

གཤེན་བཙུན་བོན་པོའི་ལས་མཐའ་གྲུབ་པའི་རྟགས།།

།

ཤག་ཤག་རླུང་བུས་རྒྱང་འབོད་བྱེད་དང་གཅིག།

བྱེ་མཁར་ལྷུན་པོས་མུ་འཚམས་སྦྲེལ་དང་གཉིས།།

པུ་ཧྲེང་རྐྱང་རྒོད་གང་སར་འཕྱན་དང་གསུམ།།

ང་ཡི་ཞང་ཞུང་མིག་གིས་བལྟད་མོར་སྣང་།།

།

གནམ་བོན་དགའ་བའི་དུངས་པ་གླེང་གི་མེད།།

མ་འཐད་ཚིག་གིས་གཤེ་བའི་ཆོ་འཁྲུལ་མེད།།

རིགས་ཀྱི་བླ་རྐང་འཚོང་བའི་ནུས་པའང་མེད།།

མེད་པ་གསུམ་འདི་ཤེས་ན་དགོས་པ་ཡོད།།

།

ཆུ་བཞི་ལྷུང་ལྷུང་རྒྱུ་བའི་གཞིས་ཁ་ནས།།

སྒང་དྲུག་གྲལ་ལ་བསྟར་བའི་ལུང་གཤོག་ཏུ།།

མདོ་ཁམས་མི་ཡི་སྲས་པོས་བྲིས་པ་ཡིན།།

ཡ་བྲང་ཁྱིམ་དྲོད་ལྡེ་བའི་གཡུ་འབྲུག་པས།།

།

ཡ་བྲང་གཡུ་འབྲུག གཟི་ཆུ་མིག་ཀྱང་ཟེར། སྡོད་གནས། བོད། ཆབ་མདོ། (དཀར་པོ་ལྷ་དང་ནག་པོ་བདུད།)སོགས་ཀྱི་རྩོམ་པ་པོ།