སྙིགས་དུས་ཀྱི་ལྷ་ཆེན་པོ།
རྩོམ་ཡིག་འདི་ཐེངས། 803 བཀླགས་འདུག
།
དགོངས་པ་རྫོགས་པ།
བདེ་བར་གཤེགས་པ།
མྱང་ངན་འདས་པ།
ཐ་སྙད་ཀྱི་བླ་གབ་ཆེན་པོ་དག་ནི
བླ་མའི་སྐུ་ཚེ་རྫོགས་པའི་མཚན་བྱང་ཡིན་ལ།
སྤྲུལ་སྐུའི་དབུགས་རྒྱུན་ཆད་པའི་བརྡ་ཆད་ཡིན།
།
ཀྱེ་ཀྱེ་སྙིགས་དུས་ཀྱི་ལྷ་ཆེན་པོ།
སྐུ་མཚན་དཔེའི་མེ་ཏོག་ཡོངས་སུ་ཟིམ་དུས།
བླ་མའི་དགོངས་པ་རྫོགས་སྟངས་ནི་མངོན་པར་གསལ་ཞིང་མངོན་པར་དོད།
དེ་ཤེད་ཅིག་ལ། ངའི་སྣང་ཚུལ་དུ་མྱ་ངན་འདས་པ་ནི།
བླ་མ་ཞིག་གི་ཆེས་མཐའ་མའི་རྒྱུགས་སྤྲོད་རང་ལུགས་ཤིག་ཡིན་པའང་ཉམས་ལ་འཚེར།
ཉམས་ལེན་གྱི་ཤེལ་མིག་སྟོང་བའི་བདེར་གཤེགས་ཀྱི་ཐུགས་སྲས་ནི
དགོངས་པ་རྫོགས་པའི་ལམ་འཕྲང་གཅོད་མི་ནུས་པ་ཡང་ཁྱེད་ཀྱིས་གསལ་འདེབས་བྱས།
།
ཀྱེ་ཀྱེ་སྙིགས་དུས་ཀྱི་ལྷ་ཆེན་པོ།
ཁྱེད་བཞུད་ལམ་གྱི་ཞབས་རྗེས་རེ་རེ་ལས།
སྐྱེས་བུ་ཆེན་པོའི་མཚན་ཉིད་དོན་གྱིས་ངེས་ལ།
བླ་མ་བླ་མའི་མཛད་པ་དངོས་སུ་མཐོང་།
ད་རུང་། བྱམས་པ། སྙིང་རྗེ། བརྩེ་བ།
དེ་དག་ནི་ཁྱེད་ཀྱི་སྐུ་ཚེའི་འགྲོ་བ་འདྲེན་སྟོན་གྱི་ཕྱག་ཆ་སྣ་གཅིག་ཡིན་པ་བདག་གིས་བརྗོད་ཀྱིས་མི་ལང་།
ཕྱུག་དབུལ་གཉིས་མེད། དགྲ་གཉེན་རིས་མེད།
ཁྱབ་བརྡལ་གྱི་ཕྱག་ཟུང་དྲོན་མོ་ཀུན་ལ་བགོས་པ་ཡང་བསམ་གྱིས་མི་ཁྱབ།
ཨེ་མ་བདག་གི་དུས་གསུམ་གྱི་བླ་མ།
ས་ཆེན་གྱི་སེམས་དཔའ།
ཐུགས་རྗེས་སྐྱོངས་ཤིག ཐུགས་རྗེས་ཟུངས་ཤིག
།
ངའི་དད་པའི་ཨ་ལུང་ན་ཁྲི་གདུགས་ཀྱི་ཉི་མ་བཞིན
འོད་ཟེར་ཀྱི་བྱིན་རླབས་སྩོལ་མཁན་ཁྱེད་ཡིན་ལ།
ངའི་སྙིང་ཆུང་དམར་པོའི་དཀྱིལ་འཁོར་ན
བརྟན་བརླིང་ངང་གྲོང་ངེར་བཞུགས་ཐུབ་པ་ནི་ཁྱེད་ཁོ་ནའོ། །
སྙིགས་དུས་ཀྱི་ལྷ་ཆེན་པོ།
ཁྱེད་ལ་མཇལ་ཐུབ་ཅིང་མཛད་འཕྲིན་གཞལ་ནུས་པས
བླ་མའི་གབ་ཚིག་ལ་དོན་འགྲེལ་གཞི་ནས་ངེས་ཤིང
བླ་མའི་མཛད་པ་ལ་འགྲེལ་ཆེན་སེམས་ཀྱིས་བཏབ།
བདག་གི་སྤྱི་གཙུག་གི་བླ་མ།
སྙིང་དབུས་ཀྱི་སེམས་དཔའ།
ངས་ཁྱེད་ལ་ཡང་སྤྲུལ་མྱུར་བྱོན་གྱི་འོ་དོད་མི་བགྱི་ལ།
སླར་ཡང་འཁོར་བར་སྐྱེ་བའི་གསོལ་བ་མི་གདབ་བོ། །
དེ་ནི།
ང་དང་འགྲོ་བར་ཁྱེད་ཀྱི་ཐུགས་རྗེ་མ་མཁོ་བ་ག་ལ་ཡིན།
མཐའ་ཀླས་སེམས་ཅན་ལ་ཁྱེད་ཀྱི་བྱམས་བརྩེ་མ་དགོས་པ་དེ་བས་ཀྱང་།
འོན་ཏེ། ད་ལྟའི་མྱི་ལ་སྒྱུ་མ་ཆེ་ཞིང་གདུག་རྩུབ་མང་བས
བྱིས་པ་བསམ་མེད་ཅིག་ཁྱེད་ཀྱི་གདུང་ཚབ་ལ་བསྐོས་པ་ནི
བདག་གིས་ནམ་ཡང་གསོལ་བ་མི་འདེབས།
གུས་ཕྱག་མི་འཚལ།
བདག་གི་བླ་མ་རིན་པོ་ཆེ།
གལ་དེ་འགྲོ་བའི་ལས་དོན་ལ་སྡོམ་ཚིག་བཀོད་མེད་ན།
གདུལ་བྱའི་སླད་ཕྱིར་དུ་རྫོགས་ཚིག་བྲིས་མེད་ན།
ཁྱེད་ད་རུང་མི་ཡུལ་དུ་ཐེངས་གཅིག་འབྱོན་དགོས་པས
གསེར་ཞལ་སྟོན་ཕྱིར་མཛད་པ་མི་བརྗེ་རོགས།
ཐུགས་རྗེས་དགོངས། མཁྱེན་པར་མཛོད།
བསམ་ཚུལ་ཕྲིས།